Mataupu 93

Pe a Faaalia mai le Atalii o le Tagata

A O IAI pea Iesu i le itu i mātū (i Samaria po o Kalilaia), ae fesili ane le ʻau Faresaio i a te ia e uiga i le oo mai o le Malo. Sa talitonu i latou e faapea, o le a oo mai le malo ma se alaga tele ma se sauniga tele, ae na fetalai atu Iesu: “E lē oo mai le malo o le Atua ma le vaaia e mata, e lē fai ane foi tagata, ‘Faauta, ua i inei!’ pe, ‘Ua i ilā!’ Auā, faauta! ua iai lava i a te outou le malo o le Atua.”

O afioga a Iesu “ua iai lava i a te outou,” e tele taimi ua faaliliuina ai e faapea, “ua i totonu i a te outou.” O lea ua manatu ai nisi e faapea, o le uiga o afioga a Iesu, ua pule le Malo o le Atua i totonu o loto o auauna a le Atua. Ae e manino lava, sa lē iai le Malo o le Atua i loto o na Faresaio lē talitonu na fetalai atu i ai Iesu. Ae na iai i a te i latou, ona sa faatasi ai ma i latou, Iesu Keriso, lē na tofia e fai ma Tupu mulimuli ane i le Malo o le Atua.

E lē taumatea ina ua tuumuli ese le ʻau Faresaio, sa talanoa atili ai loa Iesu ma ona soʻo e uiga i le oo mai o le Malo. Sa faatumutumu i lona mafaufau lona faatasi mai i le lumanai i le mana o le Malo ina ua ia lapatai atu: “A fai ane foi tagata i a te outou, ‘Faauta o i inei!’ pe, ‘Faauta o i ilā!’ Aua tou te ō i ai pe mulimuli atu i [na Mesia pepelo]. Auā e pei ona emo mai o le uila i le tasi itulagi e malamalama atu i le tasi itulagi, e faapea foi le Atalii o le tagata i lona aso.” O lea, na faaalia ai faapea e Iesu, e pei lava ona malamalama o se vaipanoa tele i le emo a le uila, o le a faapena foi ona iloa manino e tagata uma o ē fia vāai i ai, faamaoniga o lona faatasi mai i le mana o le Malo.

Ona faia lea e Iesu o ni faatusatusaga ma mea na tutupu anamua, e faaalia ai uiga o tagata i le taimi o lona faatasi mai i le lumanai. Na ia faamatalaina e faapea: “E pei ona faia i ona po o Noa, e faapea foi pe a sau le Atalii o le tagata . . . E pei foi ona faia i aso o Lota: ua latou aai ma inu, ua latou faatau mai, ma faatau atu, ua latou totō, ma latou fau fale. A o le aso lava na alu ese ai Lota mai Sotoma, na totō faaua ifo ai le afi ma le teio mai le lagi ma faaumatia ai i latou uma. E faapea foi le aso e faaalia mai ai le Atalii o le tagata.”

Sa leʻi faapea mai Iesu na ala ona faaumatia tagata i ona po o Noa ma aso o Lota, ona sa na o le tulituliloa lava o gaoioiga masani o le aai ma inu, faatau mai, faatau atu, totō ma fau fale. E oo lava i a Noa ma Lota ma o la aiga, sa latou faia na mea. Peitai, sa faia e isi tagata na mea i aso uma e aunoa ma le uai atu i le finagalo o le Atua, ma o le mafuaaga lena na faaumatia ai i latou. O le mafuaaga lava foi lea e tasi, o le a faaumatia ai tagata pe a faaalia mai Keriso i le taimi o le puapuaga tele o lenei faiga o mea.

I le faamamafaina o le tāua o le tali vave atu i faamaoniga o lona faatasi mai i le lumanai i le mana o le Malo, na faaopoopo atu ai Iesu: “O lē ua i luga o le fale i lea aso, a o iai ana mea e fia aveese mai le fale, aua neʻi alu ifo i le fale e ave ana mea, e faapea foi lē o i le fanua, aua le foi ane e ave ana mea ua tuua. Ia outou manatua le avā a Lota.”

Pe a aliai mai faamaoniga o le faatasi mai o Keriso, e lē tatau i tagata ona faatagaina le pupū tele i a latou mea faitino, e fai ma itu e faatuatuai ai ona latou vave gaoioi. A o alu ese atu le avā a Lota mai Sotoma, e foliga mai sa ia toe tepa i tua ma moomoo i mea na tuua, ma na avea ai o ia ma tupua masima.

I le faaauauina o lana faamatalaga e uiga i le tulaga o le a iai i le taimi o lona faatasi mai i le lumanai, na taʻu atu ai e Iesu i ona soʻo: “O lea lava po, e i le moega e tasi tagata e toalua; e avea le tasi, ae tuua le tasi. E olo faatasi fafine e toalua, e avea le tasi ae tuua le tasi.”

O le uiga o le avea, e talitutusa lea ma le ulu atu o Noa ma lona aiga i le vaa, ma le aveesea e agelu o Lota ma lona aiga mai Sotoma. Sa iu i le faaolataga. I le isi itu, o le uiga o le tuulafoaiina, o le pagatia lea i le faaumatiaga.

Ona fesili ane lea o le ʻau soʻo: “Le Alii e, i fea?”

Na tali atu Iesu: “O le mea e iai le tino, e ofaga foi i ai aeto.” O i latou o le a “avea” mo le faaolataga, e pei i latou o ni aeto vāai mamao o loo ofaga faatasi atu i “le tino.” O le tino, e faatatau lea i le Keriso moni i lona faatasi mai lē vaaia i le mana o le Malo ma i le faigaai faaleagaga ua saunia e Ieova. Luka 17:20-37; Kenese 19:26.

▪ Sa faapefea ona iai le Malo i le ʻau Faresaio?

▪ I le ā le auala ua pei ai le faatasi mai o Keriso o le emo o le uila?

▪ Aisea e faaumatia ai tagata ona o a latou gaoioiga i le taimi o le faatasi mai o Keriso?

▪ O le ā le uiga o le avea, po o le tuulafoaiina?