Mataupu 38

Pe sa Lē Lava le Faatuatua o Ioane?

SA LOGO tala Ioane le Papatiso, o lē ua tusa nei ma le lua tausaga o iai i le falepuipui, e uiga i le toe faatuina o le tama a le fafine Naina ua oti lana tane. Peitai, sa manao Ioane e faalogo saʻo atu lava i a Iesu e uiga i lena mea, ma o lea na ia aauina atu ai ona soʻo e toalua ina ia fesili atu e faapea: “O oe ea o Lē Maliu mai pe matou te faatalitali i se tasi?”

E foliga mai o se fesili uigaese lenei, ae maise lava ona sa vaai tino Ioane i le agaga o le Atua o afio ifo i luga o Iesu ma sa ia faalogo foi i le faamaoniga mai le siufofoga o le Atua, ina ua papatisoina Iesu e tusa ma le lua tausaga muamua atu. Atonu e avea le fesili a Ioane ma itu e ono faapogaia ai nisi e faia se faaiuga faapea sa tauāu ina vaivai lona faatuatua. Ae e lē o le tulaga lena. Ana faapea sa amata ona masalosalo Ioane, semanū la e lē tautala faaviivii Iesu e uiga i a te ia, e pei ona ia faia i lena taimi. Ae aisea la na lāgā ai e Ioane lenei fesili?

Atonu sa tau lava ina manao Ioane i se faamautinoaga mai i a Iesu e iloa ai o Ia o le Mesia. O le a avea lena o se faalaeiauga tele i a Ioane a o faiifo lona malosi i le falepuipui. Ae e foliga mai e tele nisi mea o loo aofia ai i le fesili a Ioane na i lo lena. Atonu sa ia fia iloa pe e toe iai se isi e sau, e fai ma sui, na te faamaeaina le faataunuuga o mea uma na valoia o le a faataunuuina e le Mesia.

E tusa ai ma valoaga o le Tusi Paia ia sa masani ai Ioane, e tatau ona avea Lē Faauuina a le Atua e fai ma tupu, o sē laveai. A o lea e faapagotaina pea Ioane, e ui ina ua tele ni masina talu ona mavae le papatisoga o Iesu. O lea, e mautinoa lava sa fesili atu Ioane i a Iesu e faapea: ‘O oe moni ea o lē o le a faavaeina le Malo o le Atua i le mana tele, pe e iai se tasi e ese, e fai ma sui, o lē e ao ona matou faatalitali i ai na te faataunuuina valoaga ofoofogia uma e faatatau i le mamalu o le Mesia?’

Na i lo o le taʻu atu i soʻo o Ioane e faapea, ‘E moni o aʻu lava lē o le a maliu mai!’ I lena lava taimi sa faia ai loa e Iesu ni faailoga mataina e ala i le faamaloloina o tagata e toatele, ma aveesea ai o latou maʻi ma tiga uma. Ona ia fetalai atu lea i le au soʻo: “Inā outou ō atu ia ma taʻu atu i a Ioane mea na outou vaai ma faalogo i ai: ua pupula tauaso, ua savavali pipili, ua faamamāina lepela ma ua faalogoa tutuli, ma ua toe faatutuina ē ua oti, ua folafola atu foi le tala lelei i tagata matitiva.”

I se isi faaupuga, sa fesili atu Ioane ma le faamoemoe, o le a faia e Iesu e sili atu i lo o mea sa ia faia ma atonu o le a faasaoloto ai foi ma Ioane. Peitai, na taʻu atu e Iesu i a Ioane ina ia aua neʻi ona faatalitalia ni mea e sili atu i lo o vavega sa faia e Iesu.

Ina ua ō soʻo o Ioane, ona faliu ane lea o Iesu i le motu o tagata ma taʻu atu i a te i latou e faapea, o Ioane o le “avefeau” lea a Ieova sa valoia mai i le Malaki 3:1, ma o ia foi o le perofeta o Elia lea sa valoia mai i le Malaki 4:5, 6. Ona ia viiviia lea o Ioane i le faatutusaina o ia ma so o se perofeta sa soifua muamua atu i a te ia, i lona faamatala atu e faapea: “E moni ou te fai atu i a te outou, e leʻi tu mai i ē na fananau mai i fafine se tasi e sili i a Ioane le Papatiso; a o lē e aupito itiiti i le malo o le lagi e sili lea i a te ia. Ae afua mai i ona po o Ioane le Papatiso seia oo i nei ona po, ua avea ai le malo o le lagi ma sini e tausiniō i ai tagata.”

Sa faaalia i na upu a Iesu, o le a lē iai Ioane i le Malo faalelagi, talu ai o lē aupito itiiti i inā e sili lea i a Ioane. Sa saunia e Ioane le ala mo Iesu, ae na maliu o ia a o leʻi faamaufaailogaina e Iesu le feagaiga, po o le maliega ma ona soʻo, ina ia avea ai i latou ma pule lagolago faatasi ma ia i lona Malo. O le pogai lena sa fetalai atu ai Iesu e faapea, o le a lē iai Ioane i le Malo faalelagi. Na i lo o lea, o le a avea Ioane ma tagatanuu o le Malo o le Atua i le lalolagi. Luka 7:18-30; Mataio 11:2-15.

▪ Aisea na fesili ai Ioane po o Iesu o Lē Maliu mai pe e ao ona faatalitali i se isi?

▪ O ā valoaga sa fetalai i ai Iesu, na faataunuuina e Ioane?

▪ Aisea o le a lē faatasi ai Ioane le Papatiso ma Iesu i le lagi?