Mataupu 55

Sa Ō ese le Toatele o Soʻo Mai i a Iesu

O LOO aʻoaʻo atu Iesu i se sunako i Kapanaumi e faatatau i le avea o ia ma areto moni mai le lagi. O lana lauga, atonu o se sosooga lena o le talanoaga na amataina ma tagata ina ua latou maua o ia i lo latou foi ane mai le itu i sasaʻe o le Sami o Kalilaia, lea na latou ʻaai ai i areto ma iʻa na saunia faavavega.

Na faaauau e Iesu ana upu e faapea: “O le areto ou te avatua o loʻu tino lea e sui aʻi ola o le lalolagi.” I tausaga e lua faatoʻā mavae atu i le tau e totogo ai mea i le 30 T.A., na taʻu atu ai e Iesu i a Nikotemo e faapea, ua alofa tele mai le Atua i le lalolagi ua ia aumai ai lona Alo e fai ma Faaola. O lea la na faailoa atu ai e Iesu e faapea, so o se tagata lava o le lalolagi e ʻai faafaatusa i lona tino, e ala i le faaalia o le faatuatua i le taulaga ua toeitiiti ona ia faia lea, e mafai ona maua le ola e faavavau.

Peitai, na faatausuai tagata i upu a Iesu. Ua latou fesili ane: “E mafai faapefea e lenei tagata ona aumai lona tino tatou te ʻaai ai?” Sa manao loa Iesu e faamalamalama atu i lana au faalogologo, o le ʻaina o lona tino o le a faia i se auala faafaatusa. O lea, ina ia faamamafa lenei mea, na ia toe fetalai atu ai foi i se isi mea e sili atu ona teena pe a faia i se auala faaletino.

Sa folafola atu e Iesu: “Afai tou te lē ʻaai i le tino o le Atalii o le tagata ma lē inu foi i lona toto, ua lē i totonu i a te outou le ola. O lē ʻai i loʻu tino ma inu i loʻu toto ua i a te ia le ola e faavavau, ma ou te toe faatuina foi o ia i le aso gataaga; auā o loʻu tino o le meaai moni lea, ma o loʻu toto o le meainu moni lea. O lē ʻai i loʻu tino ma inu i loʻu toto e tumau o ia i a te aʻu, o aʻu foi i a te ia.”

E moni, sa matuā lē logoleleia le aʻoaʻoga a Iesu e pei sa ia fautuaina le ʻaina o tagata. Ae o le mea mautinoa, sa leʻi faapea atu Iesu e tatau ona ʻaina lona tino pe inu i lona toto i se tulaga faaletino. Sa na ona ia faamamafaina ai e faapea o i latou uma e maua le ola e faavavau, e tatau ona faaalia le faatuatua i le taulaga o le a ia faia pe a ia ofoina atu lona tino lelei atoatoa faaletagata ma sasaa atu lona toto ola. Peitai, e oo lava i le toatele o ona soʻo sa leʻi taumafai e malamalama i lana aʻoaʻoga, a ua latou tetee atu: “O se lauga matautia lenei; o ai e mafai ona faalogologo i ai?”

Ina ua ia silafia o loo muimui le toatele o ona soʻo, sa fetalai atu loa Iesu: “Pe tou te tausuai ea ona o lenei mea? O lea, pe faapefea pe a outou vaai atu i le Atalii o le tagata o alu aʻe i le mea sa iai o ia muamua? . . . O upu na ou fai atu ai i a te outou, e faaleagaga, e maua ai le ola. Ae o loo iai nisi o outou e lē talitonu mai lava.”

Na fetalai atili atu Iesu: “O le mea lea na ou fai atu ai i a te outou, e lē mafai e se tasi ona sau i a te aʻu pe a lē foaiina atu i a te ia e loʻu Tamā.” O lea na ō ese ai le toatele o ona soʻo ma ua lē toe mulimuli atu i a te ia. Sa faliu ane loa Iesu i ona aposetolo e toʻa 12 ma fesili atu i ai e faapea: “Pe tou te fia ō ese foi ma outou?” Na tali ane Peteru: “Le Alii e, a matou ō ea i a te ai? O loo i a te oe upu o le ola e faavavau; ua matou talitonu ma ua matou iloa o Oe o Lē Paia a le Atua.” Maeu se faailoaga lelei o le faamaoni, e ui ina atonu sa leʻi malamalama atoatoa Peteru ma isi aposetolo i le aʻoaʻoga a Iesu e uiga i lenei mataupu!

E ui ina sa faafiafiaina o ia i le tali a Peteru, ae na faailoa atu e Iesu: “Na ou leʻi filifilia ea outou e toasefulu ma le toalua? Ae peitai, o se tasi o outou o le fasioti tagata ia.” Sa fetalai atu o ia e uiga i a Iuta le Sekara. Atonu i lena taimi, sa matauina ai e Iesu i a Iuta se “amataga” o se ala sese.

Na seʻi faatoʻā uma lava ona faateʻia e Iesu tagata e ala i le teena o a latou taumafaiga ina ia fai o ia ma tupu, ma atonu sa latou tau manatu, ‘Pe mafai faapefea ona avea lenei tagata ma Mesia pe afai na te lē talia le tulaga tonu o le Mesia?’ Sa teu foi lena mea i mafaufau o tagata. Ioane 6:51-71; 3:16.

▪ Mo ai na ofo atu i ai e Iesu lona tino, ma e ao faapefea ona latou ʻaai i lona tino’?

▪ O ā isi fetalaiga a Iesu na faateʻia ai tagata, peitai o le ā sa ia faamamafaina?

▪ Ina ua ō ese le toatele mai i a Iesu, o le ā le tali a Peteru?