Sa A‘oa‘oina se Fafine Samaria
Mataupu 19
Sa Aʻoaʻoina se Fafine Samaria
A O LATOU malaga atu mai Iutaia i Kalilaia, sa ui ane ai Iesu ma ona soʻo i le itumalo o Samaria. Ona o le vaivai i la latou malaga, na latou malōlō ai i se taimi faaaoauli i tafatafa o se vaieli e latalata i le aai o Sukara. O le vai lenei sa eliina e Iakopo i senituri ua mavae, ma o loo iai pea e oo mai i le asō, e lē mamao mai le aai o loo iai nei o Nablus.
A o malōlō ai i inā Iesu, a ua ō atu ona soʻo i le aai e faatau mai ni meaai. Ina ua sau se fafine Samaria e utu vai, sa talosaga atu i ai Iesu: “Seʻi aumai sina vai, soʻu inu ai.”
O le tulaga sa masani ai, e leai ni fesootaiga a tagata Iutaia ma Samaria, ona sa mauaa ai le faailoga tagata. O lea, na maofa ai le fafine ma fesili ane e faapea: “Pe faapefea i a te oe o le tagata Iutaia, ona fai mai i a te aʻu mo se vai inu, a o aʻu o le fafine Samaria?”
Ua tali atu Iesu: “Ana e iloa . . . lē o loo fai atu i a te oe, ‘Aumai ia sina vai mo aʻu,’ semanu ua e ole mai i a te ia, ona ia foaiina atu lea i a te oe o le vaiola.”
Na fai ane le fafine: “Le Alii e, e leai sau mea utu vai, e maulalo foi le vaieli. O fea la e te maua mai ai lena vaiola? E sili ea oe i lo matou tamā o Iakopo, o lē na tuuina mai i a te i matou le vaieli, ma sa feinu ai foi o ia, ma lana fanau, atoa ma ana manu?”
Ua fetalai atu Iesu: “O i latou uma e feinu i lenei vai e toe fia feinu foi. A o lē e inu i le vai ou te avatu i a te ia, e lē toe fia inu ia e faavavau; a o le vai ou te avatu i a te ia, e avea lea o se vaipuna i a te ia, e puna i luga ina ia maua ai le ola e faavavau.”
Ona tali ane lea o le fafine: “Le Alii e, au mai ia i a te aʻu lena vai, ina ia ou lē toe fia inu ai, pe toe sau ai foi i inei e utu vai.”
Na fetalai atu loa Iesu: “Alu ia oe, ma valaau i lau tane, i le toe sau ai i inei.”
Fai mai a ia: “E leai saʻu tane.”
Na ioe atu Iesu i lana tali e faapea. “Ua tonu lau upu, ‘E leai sau tane.’ Auā sa i a te oe tane e toalima, ma o lē foi o loo lua nonofo nei, e lē o sau tane.”
Ua fai mai ma le ofo le fafine: “Le Alii e, ua ou iloa nei o oe o le perofeta.” I le faaalia o lona naunau faaleagaga, na ia faapea atu ai, o tagata Samaria “sa tapuai i lenei mauga [o Keresema, lea sa tu latalata ane]; a ua outou [tagata Iutaia] fai mai o Ierusalema le nofoaga e tatau ona tapuai atu ai tagata.”
E ui i lea, sa lē o le nofoaga o le tapuaiga le mea tāua na faasino atu e Iesu. Na fetalai atu o ia: “E oo mai ona aso, . . . o ē tapuai faamaoni latou te tapuai i le Tamā i le agaga ma le upu moni, auā o loo saili le Tamā i ē tapuai faapena i a te ia. O le Atua o le Agaga lava ia, o e tapuai i a te ia, e tatau ona tapuai atu ai i le agaga ma le upu moni.”
Na matuā maofa le fafine. Ma ua faapea mai: “Ua ou iloa o le a maliu mai le Mesia, o lē ua igoa i a Keriso, pe a maliu mai o ia, o le a ia faailoa mai mea uma i a te i matou.”
Ona folafola atu lea e Iesu: “O aʻu lava lenei, o lē tautala atu i a te oe.” Seʻi manatu i ai! Sa alu ane lenei fafine i le aoauli e utu vai, atonu ina ia alofia ai le fetaiai ma fafine o le aai o ē inoino i a te ia ona o lona olaga sa ola ai, ae o lea ua talileleia e Iesu i se ala e sili ona lelei. Na ia fetalai saʻo atu i a te ia i mea na te leʻi faailoaina atu i isi. O ā iuga na oo i ai?
Toatele Samaria sa Talitonu
Ina ua toe foi ane ona soʻo mai Sukara ma meaai, sa latou maua ai Iesu i le vaieli o Iakopo lea na latou tuua ai o ia, ma o i inā o loo la talanoa ai ma le fafine Samaria. Ina ua taunuu ane le au soʻo, ona tuu ai lea e le fafine o lana fagu vai, ae alu atu i le aai.
Ona o lona fiafia tele i mea na taʻu atu e Iesu i a te ia, na fai atu ai le fafine i tagata o le aai: “Inā ō mai ia, inā vāai i le tagata ua na taʻua mai i a te aʻu o mea uma lava ua ou faia.” Ona ia fesili atu lea i se auala e faagaeetia ai lo latou fia iloa: “Pe lē o le Keriso ea lea?” Sa aogā le fesili—auā na ō atu ai loa nei tagata seʻi o latou vāai.
I lena taimi, sa tauanau ai e le au soʻo Iesu ina ia taumafa i meaai na latou aumaia mai le aai. A ua tali atu Iesu: “O i a te aʻu meaai tou te lē iloa.”
Ona tuufesilisili lea o le au soʻo: “Pe na aumai e se tasi sana meaai?” Ua faamatala atu e Iesu: “O laʻu meaai, ia ou faia le finagalo o lē na auina mai aʻu, ma faaiu lana galuega. Tou te lē fai ane ea, E toe fa masina, i le oo ai i le seleselegasaito.” Peitai, i le faasino atu i le seleselega faaleagaga na fetalai atu ai Iesu e faapea: “Inā tetepa aʻe ia o outou mata, ma vaavaai i le fanua ua sinasina mai mo le seleselegāsaito. O lē selesele foi, ua uma ona maua lona totogi, ma ua ia faaputuina ni fua mo le ola e faavavau; ina ia taufai olioli ai o lē lulu saito ma lē selesele.”
Atonu sa silafia e Iesu le aogā sili o le la talanoaga ma le fafine Samaria—ua toatele ai ē na faatuatua i a te ia ona o le molimau a le fafine. Sa molimau atu le fafine i tagata o le aai e faapea: “Ua na taʻua mai i a te aʻu o mea uma lava na ou faia.” O lea la, ina ua ō ane tamaloloa o Sukara i a te ia i le vaieli, sa latou aioi atu i a te ia ina ia nofo e toe talanoa atili ma i latou. Na talia e Iesu le valaaulia ma nofo ai loa mo aso e lua.
A o faalogologo tagata Samaria i a Iesu, ua atili ai ona toatele ē na talitonu. Ona latou fai ane lea i le fafine: “E lē ona o lau upu ua matou faatuatua ai nei i a te ia; auā o i matou lava ua matou faalogologo, ua matou iloa foi, e moni lava, o le Faaola lenei o le lalolagi.” E mautinoa na saunia e le fafine Samaria se faaaoaoga lelei, i le auala tatou te molimau atu ai e uiga i le Keriso e ala i le faagaeetia o le fia iloa ina ia toe sailiili atili mai ai le ʻau faalogologo!
Ia manatua ua toe fa masina ona oo lea i le seleselega—e foliga mai o le seleselega lea o karite, e fai i le tau e totogo ai laau i Palesitina. Atonu la o le vaitaimi lea o Novema po o Tesema. O lona uiga, ina ua mavae le Paseka o le 30 T.A., sa faaaluina ai e Iesu ma ona soʻo pe tusa o le valu masina i Iutaia, e aʻoaʻo atu ai ma papatiso atu. A o lea la o le a latou ō atu i lo latou nuu moni o Kalilaia. O le ā o le a tupu i a i latou i inā? Ioane 4:3-43.
▪ Aisea na maofa ai le fafine Samaria ina ua fetalai atu Iesu i a te ia?
▪ O le ā na aʻoaʻoina ai o ia e Iesu e uiga i le vaiola ma le mea e tapuai atu ai?
▪ Sa faapefea ona faailoa atu e Iesu ia lava i le fafine, ma aisea sa matuā maofa ai i lena mea?
▪ O le ā le molimau na faia e le fafine Samaria, ma o le ā le iuga?
▪ E faapefea ona fesootai meaai a Iesu ma le seleselega?
▪ E mafai faapefea ona tatou fuafuaina le umi o le faiva a Iesu i Iutaia ina ua mavae le Paseka o le 30 T.A.?