Mataupu 2

Sa Faaaloalogia o Ia a o Leʻi Fanau Mai

INA ua uma ona taʻu ane e le agelu o Kaperielu i le tamaitai talavou o Maria faapea o le a ia fanau maia se tama e avea ma tupu e faavavau, ona fesili atu lea o Maria: “A faapefea le mea nei, auā ou te leʻi iloa se tane?”

Na fai atu Kaperielu i a te ia: “E afio ifo le agaga paia i ou luga, e faamalumalu ifo foi i a te oe le mana o le Silisili Ese, ma o le mea foi lea e taʻua ai lē a fanau mai e paia, o le Alo o le Atua.”

Ina ia fesoasoani i a Maria e talitonu i lana feau, na fai atu atili ai Kaperielu: “Faauta foi, o lou aiga o Elisapeta ua to o ia ina ua loomatua, o le ono ai lenei o ona masina; o lē sa taʻua e pa, auā e leai se mea e faigata i le Atua.”

Sa talitonu Maria i a Kaperielu. Ma o le ā lana tali atu? Na ia alaga atu e faapea: “Faauta, o aʻu nei o le auauna teine a Ieova! Ia faia i a te aʻu e tusa ma lau fetalaiga.”

E leʻi leva ona alu ese Kaperielu, ae sauni loa Maria e asiasi atu i a Elisapeta, lea o loo nonofo ma lana tane o Sakaria, i se nuu maugā o Iutaia. E tusa o le tolu i le fa aso e alu ai se malaga umi i inā mai le aiga o Maria i Nasareta.

Ina ua mulimuli ane taunuu atu Maria i le fale o Sakaria, sa ulufale atu loa o ia ma ofo alofa atu. Ina ua faalogo ane i ai Elisapeta, ona ulufia lea o ia i le agaga paia, ma ua faapea atu i a Maria: “Amuia oe i fafine, amuia foi lē a fanau mai i a te oe. Ua ou maua faapefea lenei faaeaga, o le sau o le tinā o loʻu Alii i a te aʻu? Auā, faauta! ina ua ou faalogo atu i lau ofo alofa mai, ona osooso ai lea ma le olioli o le tama i loʻu manava.”

Ina ua ia faalogo atu i lenei mea, ona tali atu lea o Maria ma lona loto faafetai: “E vivii atu loʻu loto i a Ieova, ua lē mafai foi ona taofia le olioli o loʻu loto i le Atua o loʻu Faaola; auā ua ia silasila mai i le tulaga faatauvaa o lana auauna teine. Auā faauta, e amata atu nei ona faaamuia mai i a te aʻu o tupulaga uma, ona ua faia e Lē e ona le mana o mea silisili mo aʻu.” E ui ina sa faaalia le finagalo malie i a te ia, ae na avatu lava e Maria le viiga uma i le Atua. Sa ia faapea atu: “E paia lona suafa, ma e au tupulagā foi lona agalelei i a i latou o ē matatau i a te ia.”

Sa faaauau ona vivii atu Maria i le Atua i se pese faavaloaga ua faagaeeina e faapea: “Ua ia faia mea mamana i lona aao, ua faataapeapeina e ia o ē faamaualuluga i manatu o o latou loto. Ua ia aveesea ē malolosi mai o latou nofoalii ae faamaualugaina ē faamaulalo; ua ia fafagaina atoatoa i mea lelei ē sa matelaina ma ua ia aauina fua atu ē mauoa. Ua ia fesoasoani mai i lana auauna o Isaraelu, e faamanatu i lona alofa mutimutivale, e pei ona ia fetalai ai i o tatou augātamā, i a Aperaamo ma i lana fanau, e faavavau.”

E tusa ma le tolu masina o nofo ai pea Maria i a Elisapeta, ma e lē taumatea sa avea o ia o se fesoasoani tele i na vaiaso mulimuli o le maitaga o Elisapeta. O se mea lelei tele, ona sa mafai e nei fafine faamaoni e toalua ona mafuta faatasi i lenei taimi faamanuiaina o o la olaga, a o la tauaveina ni tamaiti faatasi ma le fesoasoani a le Atua.

Pe na e matauina ea le faaaloaloga sa tuuina atu i a Iesu a o leʻi fanau mai o ia? Sa taʻua o ia e Elisapeta o “loʻu Alii,” ma sa osooso foi ma le olioli lana tama e leʻi fanau mai i lona manava, ina ua faatoʻā asiasi atu i ai Maria. Ae e mulimuli ane, sa leʻi aloaia tele e isi Maria ma lana tama e leʻi fanau mai, e pei ona o le a tatou tagai i ai. Luka 1:26-56.

▪ O le ā le tala a Kaperielu sa faamalamalama ai i a Maria le auala o le a to ai o ia?

▪ Sa faapefea ona faaaloalogia Iesu a o leʻi fanau mai?

▪ O le ā na fai atu ai Maria i se pese faavaloaga e vivii atu ai i le Atua?

▪ O le ā le umi o nofo Maria i a Elisapeta, ma aisea na talafeagai ai le nofo o Maria i a Elisapeta i lena taimi?