Sa Fesiligia e Uiga i le Anapogi
Mataupu 28
Sa Fesiligia e Uiga i le Anapogi
UA MAVAE atu le pe tusa o se tausaga, talu ona auai Iesu i le Paseka o le 30 T.A. O le taimi foi lea ua tusa o ni nai masina talu ona faafalepuipuiina Ioane le Papatiso. E ui i sona manao ina ia avea ona soʻo ma soʻo o Keriso, ae sa leʻi faia faapena e ona soʻo uma.
O lea la, na ō atu ai i a Iesu nisi o soʻo o Ioane lē o loo faafalepuipuiina ma fesili atu: “Se ā le mea ua matou anapopogi ai ma le au Faresaio, ae e lē o anapopogi ou soʻo?” E faalua i le vaiaso ona anapopogi le au Faresaio ona o se tu lea a la latou lotu. Ma e lē taumatea sa faapena ona mulimuli ai soʻo o Ioane i lea tu. Atonu foi sa latou anapopogi ona o le faanoanoa i le faafalepuipuiina o Ioane ma ua tau mānatu ai pe aisea ua lē aufaatasi atu ai soʻo o Iesu i a te i latou i lenei faailoaina o le faanoanoa.
Na tali atu Iesu, i le faamatalaina e faapea: “E mafai ea ona faanoanoa o aumea a le faatoafaiava a o iai o ia i a te i latou? Ae oo mai ona aso e aveeseina ai le faatoafaiava mai i a te i latou, ona latou anapopogi ai lea.”
Sa tatau ona manatua e soʻo o Ioane, na taʻua e Ioane lava ia Iesu, o ia o le Faatoafaiava. O lea, a o faatasi ai Iesu, sa leʻi manatu Ioane o se mea ua alagātatau ona ia anapogi, pe faapena foi i soʻo o Iesu. Mulimuli ane, ina ua maliu Iesu, ona faanoanoa ai lea o ona soʻo ma anapopogi. Ae ina ua toe faatuina aʻe o ia ma afio atu i le lagi, sa leai se mafuaaga atili latou te toe faanoanoa ai ma anapopogi.
Ona sosoo ai lea ma le fetalai atu o Iesu i nei tala faatusa e faapea: “E leai se tasi na te fonoa le matuā ofu i le ie fou; auā e masae le ofu i lona fono, ona atili ai lea ona masae. E lē utufia foi e tagata le uaina fou i fagupaʻu tuai; auā afai latou te faia faapea, ona pāpā ai lea o fagupaʻu ma masaa ai le uaina ma faaleagaina ai fagupaʻu. Peitai e utufia e tagata le uaina fou i fagupaʻu fou.” O le ā le sootaga o nei tala faatusa ma le anapogi?
Sa fesoasoani Iesu i soʻo o Ioane le Papatiso ina ia latou talisapaia e faapea, e lē tatau i se tasi ona faatalitalia ona soʻo ina ia gauai atu i faiga tuai faa-Iutaia, e pei o a latou anapogi faalelotu. E leʻi sau o ia ina ia toe fonofono ma faasaoina faiga tuai tau tapuaiga na o le a faatamaia. Sa lē taitai lava ona gauai atu le Faa-Kerisiano i faiga faa-Iutaia o na ona po ma ana uputuu faaletagata. E leai, o le a lē avea e pei o se fono fou i se matuā ofu tuai, po o se uaina fou i se fagupaʻu tuai. Mataio 9:14-17; Mareko 2:18-22; Luka 5:33-39; Ioane 3:27-29.
▪ O ai na anapopogi, ma mo le ā le fuafuaga?
▪ Aisea na lē anapopogi ai soʻo o Iesu a o faatasi ai o ia ma i latou, ma e mulimuli ane sa faapefea ona mou atu le pogai mo le anapogi?
▪ O ā tala faatusa na faamatala atu e Iesu, ma o ā uiga o na tala faatusa?