Sa Ia Pa‘i atu i Lona Ofu
Mataupu 46
Sa Ia Paʻi atu i Lona Ofu
NA OO atu tala i Kapanaumi e uiga i le toe foi ane o Iesu mai Tekapoli, ma sa faapea ona faapotopoto ane ai le motu o tagata e toatele i le matafaga e faafeiloai i a te ia. E lē taumatea sa latou faalogo i lona faatoafilemuina o le afā, ma lona faamaloloina o le tagata na uluitinoina e temoni. A o ia savali ifo i le matafaga, sa latou lolofi ane i a te ia, ona o le naunau ma le faatalitali.
O se tasi o i latou sa naunau e fia vaai i a Iesu, o Iairo, o ia o se alii pule i le sunako. Sa ia tootuli atu i a Iesu ma aioi atu pea i a te ia: “Ua toeitiiti lava oti si oʻu afafine. Seʻi e maliu ane ia oe ma faaee ou aao i luga i a te ia, ina ia malolo o ia ma ola ai pea.” Talu ai sa na o le pau lava lea o lona afafine ma e na o le 12 foi ona tausaga, sa faapea ona pele ai o ia i a Iairo.
Sa tali atu loa i ai Iesu, ma agaʻi atu i le fale o Iairo, faatasi ma le motu o tagata. Maeu se matuā fiafia o tagata a o latou faatalitalia le faia o se isi vavega. Peitai, sa iai se tasi fafine i le motu o tagata, sa mua ona mafaufau i lona lava faafitauli matuiā.
Mo le 12 tausaga, sa mafatia ai lenei fafine i se puna toto. E toatele fomai sa alu atu i ai o ia, ma faaalu uma ai ana tupe i togafitiga. Ae na te leʻi maua ai se fesoasoani; na i lo lea, sa faasolo ina leaga tele lona faafitauli.
E pei ina atonu ua e iloa, e lē gata ina sa vaivai tele ai lona tino, ae sa avea lona maʻi o se mea e faalumaina ai ma maasiasi ai o ia. Sa lē mafai ona soona talanoa se tasi e uiga i lena maʻi i le lautele. E lē gata i lea, e tusa ai ma le Tulafono Faa-Mose, o se fafine e maua i le puna toto, sa lē mamā ai o ia, ma so o se tasi lava e paʻi i a te ia po o ona lavalava ua pisipisia i le toto, sa manaomia ona taele ma sa lē mamā ai foi lena tagata seia oo i le afiafi.
Sa faalogo lenei fafine i vavega a Iesu, ma alu atu ai loa e saili i a te ia. Ona o lona tulaga lē mamā, sa ia faavāvā faalilolilo atu ai i le motu o tagata ma faapea ifo i lona loto: “Afai ou te paʻi atu tau lava o ona ofu, ona ou mālōlō ai lea.” Ina ua ia faia faapena, sa ia lagona faafuaseʻi ai le utu o lona palapala!
“O ai lea na paʻi mai i a te aʻu?” Pagā lona gatete i na upu a Iesu! Na mafai faapefea ona ia silafia? Sa tetee atu Peteru: ‘Le Aʻoaʻo e, ua fetaomi ma fetuleni mai le motu o tagata i a te oe, ae e te fetalai mai ea, “Po o ai lea na paʻi mai i a te aʻu?”’
Ua silasila solo Iesu mo le fafine, ma faapea atu: “Na paʻi mai lava se tasi i a te aʻu; auā ua ou iloa ua alu atu le mana nai i a te aʻu.” O le mea moni, sa lē na o se paʻi e masani ai, auā o le faamalologa lea na iʻu i ai sa alu atu ai le malosi o Iesu.
Ina ua ia iloa ua lē o toe lilo o ia, sa alu ane ai loa le fafine ua tootuli atu ma le mataʻu ma le gatete tele i luma o Iesu. Ua ia faamatala atu foi i luma o tagata uma le tala moni e uiga i lona maʻi, ma le auala ua faatoʻā faamaloloina ai o ia.
Ona o le ootia i le tautinoga atoa a lenei fafine, sa faamafanafana atu ai ma le alofa Iesu i a te ia e faapea: “Loʻu afafine e, ua e ola i lou faatuatua. Inā alu ia oe ma le manuia, ma ia e mālōlō i lou maʻi tiga.” Maeu le lelei o le iloa, o Lē ua filifilia e le Atua e pulea le lalolagi, o ia o se tagata e mafana, ma tigaalofa, o lē e lē gata ina manatu i tagata, ae o loo iai foi le mana e fesoasoani ai i a i latou! Mataio 9:18-22; Mareko 5:21-34; Luka 8:40-48; Levitiko 15:25-27.
▪ O ai Iairo, ma aisea na ia sau ai i a Iesu?
▪ O le ā le faafitauli na iai i se tasi fafine, ma aisea na faigata tele ai ona alu ane i a Iesu mo se fesoasoani?
▪ Sa faamaloloina faapefea le fafine, ma sa faamafanafana atu faapefea Iesu i a te ia?