Mataupu 67

Sa Lē Taulau ona Latou Puea o Ia

A O FAAGASOLO pea le Tausamiga o Faleapitaga, a ua aauina ane e taʻitaʻi lotu ni alii leoleo e pue i a Iesu. Sa leʻi taumafai o ia e lafi. Na i lo o lea, sa faaauau pea ona aʻoaʻo atu Iesu i le lautele e faapea: “E toeitiiti ni nai aso ou te iai i a te outou ona ou alu atu ai lea i a te ia na auina mai aʻu. E saili outou i a te aʻu, ae tou te lē maua aʻu, o le mea foi ou te iai aʻu, tou te lē mafai ona ō i ai.”

Ona o le lē malamalama o tagata Iutaia, na latou tuufesili ai i a i latou lava e faapea: “Po o fea a alu i ai o ia, e lē mafai ai ona tatou maua o ia? Pe alu ea ia i tagata Iutaia o loo taapeape i Eleni, ma aʻoaʻo atu i Eleni? O le ā ea le uiga o lena upu na ia fai mai ai, ‘E saili outou i a te aʻu, ae tou te lē maua aʻu; o le mea foi ou te iai aʻu, tou te lē mafai ona ō i ai’?” O le mea moni, sa fetalai atu Iesu e uiga i le latalata ane o lona maliu ma lona toetu i le ola i le lagi, lea e lē mafai ona mulimuli atu i ai ona fili.

Ua oo i le aso lona fitu ma o le aso faaiu foi lea o le tausamiga. I taeao taitasi o le tausamiga, e sasaa ai i fafo e le ositaulaga ni vai na ia asuina aʻe mai le Taelega i Seloa, ina ia tafe atu ai i le mea o loo tu ai le fata faitaulaga. Na alaga atu Iesu, atonu ina ia faamanatu ai i tagata lenei sauniga i aso fai soo: “Afai e fia inu se tasi, inā sau ia i a te aʻu e inu ai. O sē faatuatua i a te aʻu, e pei ona fai mai le Tusi Paia, E tafe aʻe ai mai totonu i a te ia vaitafe o vai o le ola.”

O le mea moni, sa fetalai atu Iesu e faatatau i iuga ofoofogia pe a liligiina ifo le agaga paia. I le tausaga na sosoo ai na liligi ifo ai lena agaga paia i le aso Penetekoso. O i inā, na tafe atu ai vaitafe o vai o le ola ina ua amata e soʻo e toʻa 120 ona auauna atu i tagata. Ae e oo ane i lena taimi, e leʻi iai se agaga, auā o le taimi lena e leʻi faauuina soʻo o Keriso i le agaga paia ma valaaulia mo le ola i le lagi.

I le tali atu i aʻoaʻoga a Iesu, na amata ai ona faapea ane nisi: “E moni, o le Perofeta lava lenei,” e mautinoa sa faasino atu i le perofeta e silisili i lo o Mose o lē na taʻua i folafolaga o le a afio mai. O isi sa fai ane: “O le Keriso lenei.” A o isi sa tetee e faapea: “Pe tupu mai ea le Keriso mai Kalilaia? E lē ua fai mai ea le Tusi Paia, e tupu mai le Keriso mai le fanauga a Tavita, e mai Peteleema foi, o le aai sa iai Tavita?”

O lea na fevaevaeai ai le motu o tagata. Sa mananao nisi e puʻe i a Iesu, ae leai lava se tasi na paʻi atu i a te ia. Ina ua toe foi atu alii leoleo e lē o avatua Iesu, ona fesili ane lea o faitaulaga sili ma le au Faresaio: “Pe se ā le mea ua outou lē taʻitaʻi mai ai i a te ia?”

Na tali atu alii leoleo: “Ua leai lava se tagata e tautala e pei o lena tagata.”

Ona o lo latou feita, na matuā faasaga ai le au taʻitaʻi lotu e faaseā, i faamatalaga sese, ma le tau faifai. Ua latou tauemu e faapea: “Po ua faaseseina foi outou? Po ua talia ea o ia e se tasi o le au faipule, po o se tasi o le au Faresaio? A o lenei vao o tagata ua lē iloa le Tulafono, ua fetuuina lava i latou.”

O le taimi lena na tautala atu ai loa le Faresaio o Nikotemo, o ia foi o se faipule o tagata Iutaia (o lona uiga, o ia o se sui o le au Saniterini), e lagolagoina Iesu. Atonu o e manatua, i le lua ma le ʻafa tausaga ua mavae, na alu ane ai Nikotemo i a Iesu i le po ma faaalia lona faatuatua i a te ia. O lea la ua fai atu Nikotemo: “Pe faasalaina ea se tagata i la tatou tulafono, a o leʻi muai faalogologo atu i a te ia, ma iloa ana mea ua fai?”

Na atili ai ona feitai le au Faresaio, ona ua iai se tasi o i latou e puipuia Iesu. Ua latou faapea atu ma le loto tiga: “E te se Kalilaia ea foi oe? Inā saili ia ma iloa, e lē tu mai se perofeta mai Kalilaia.”

E ui lava e lē o taʻu saʻo maia e le Tusi Paia e faapea, o le a tu mai se perofeta mai Kalilaia, ae sa latou manatu o le a tupuga mai le Keriso i inā, i lo latou faapea atu o le a iloa le “malamalama tele” i lena nuu. E lē gata i lea, na fanau mai Iesu i Peteleema, ma o ia o sō o le fanau a Tavita. E ui ina atonu sa iloa e le au Faresaio lenei mea, ae e foliga mai o i latou ia na mafua ai ona salalau atu manatu sese sa iai i tagata e faatatau i a Iesu. Ioane 7:32-52; Isaia 9:1, 2; Mataio 4:13-17.

▪ O le ā le mea na tupu i taeao taitasi o le tausamiga, ma sa faapefea ona faauai ane i ai e Iesu manatu o tagata?

▪ Aisea na lē taulau ai i alii leoleo ona puea Iesu, ma sa faapefea ona tali ane i ai le au taʻitaʻi lotu?

▪ O ai Nikotemo, o le ā lona uiga sa faaalia i a Iesu, ma o ā faiga na faia i a te ia e ana aumea Faresaio?

▪ O le ā le faamaoniga e iloa ai sa tupuga mai le Keriso mai Kalilaia?