Sa Le‘i Taulau ona Latou Maileia Iesu
Mataupu 108
Sa Leʻi Taulau ona Latou Maileia Iesu
O NA sa aʻoaʻo atu Iesu i le malumalu ma na seʻi faatoʻā ia taʻu atu lava i ona fili faalelotu ni tala faatusa e tolu na faaalialia ai a latou amio leaga, na feitai ai le au Faresaio ma faia se taupulepulega e maileia o ia, ina ia ona faia se tala na latou manatu e mafai ona molia ai o ia. Sa latou taupulepule e faia se togafiti ma aauina atu o latou soʻo, faatasi ma le au Herotiano, ina ia taumafai e mailei o ia.
Na fai atu nei tamaloloa: “Le aʻoaʻo e, ua matou iloa o oe lē faamaoni, ua e aʻoaʻo foi i le ala o le Atua ma le faamaoni, e te lē mataʻu foi i se tasi; auā ua e lē faailogaina se tagata. O lenei, ia e taʻu mai i a te i matou, pe se ā lou taofi? pe sa ea ona avatu o lafoga i a Kaisara pe leai?”
Sa leʻi faavaleaina Iesu i na upu faaviivii pepelo. Sa ia silafia lelei faapea afai e fai atu, ‘E leai, e leai se tulafono po o le lē tatau ona totogi o lenei lafoga,’ o le a taʻusalaina o ia i le fouvale faasaga i a Roma. Peitai, afai e fai atu o ia, ‘Ioe, e tatau ona tou totogi lenei lafoga,’ ona feita ai lea o tagata Iutaia i a te ia, auā na inoino i latou i le gauai atu i a Roma. O lea na tali atu ai o ia: “O outou tagata pepelo, se ā le mea ua outou tofotofo mai ai i a te aʻu? Faaali mai ia i a te aʻu se tupe o le lafoga.”
Ina ua latou avane i a te ia le tupe, ona fesili atu lea o ia: “O ai ea e ona lenei faatagata ma lenei tusi?”
Sa latou tali atu: “E o Kaisara.”
“O lenei, o mea a Kaisara, ia outou avatu i a Kaisara; a o mea a le Atua ia avatu ia i le Atua.” O lea, ina ua faalogo na tagata i lena tali atamai, ona latou ofo ai lea. Ma sa latou ō ese ae tuua na o ia.
Ina ua vaai atu ua lē taulau le au Faresaio i le mauaina o se mea e tuuaʻia ai Iesu, na faalatalata atu ai le au Satukaio, o ē na faapea ane e leai se toetu, ma fesili atu i a te ia: “Le aʻoaʻo e, ua fai mai Mose, ‘Afai e oti se tasi e leai sana fanau, ia fai lana avā ma avā a lona uso, ia tupu ai se gafa mo lona uso.’ Sa i a te i matou le au uso e toafitu; na fai avā le ulumatua, ua oti foi o ia; e leai foi sana fanau, o lea na tuuina atu ai lana avā mā lona uso. Na faapea foi o lona lua, ma lona toatolu, ua oo lava i le toafitu. Ae muliaʻi oti foi le fafine. O lenei, a oo i le toetu, o ai so latou o le toafitu e fai māna le avā? Auā na fai avā uma i ai.”
Ona tali atu lea o Iesu ua faapea atu: “E lē o lenei ea ua outou sese ai, ina ua outou lē iloa upu o Tusi, ma le mana o le Atua? Auā pe a latou toe tutū mai i ē ua oti, latou te lē fai avā pe nofo tane; ae peitai latou te faapei o agelu o i le lagi. A o ē ua oti, ma lo latou toetu, ua outou lē faitau ai ea i le tusi a Mose, i le laau talatala, na fetalai mai le Atua i a te ia, ua faapea, O aʻu o le Atua o Aperaamo, o le Atua foi o Isaako, o le Atua foi o Iakopo? E lē o le Atua ia o ē ua oti, a o le Atua o ē ola; o lea, ua tele ai lava lo outou sese.”
Sa toe maofa foi le motu o tagata i le tali a Iesu. E oo lava i nisi o tusiupu sa latou faailoa atu: “Le aʻoaʻo e, ua tonu lau upu.”
Ina ua iloa e le au Faresaio ua lē mautali le au Satukaio i a Iesu, ona latou faapotopoto ai lea ma ō atu i a te ia. Ina ia tofotofoina atili o ia. Sa fesili atu se tasi o i latou: “Le aʻoaʻo e, o lē fea poloaiga o i le tulafono ua sili?”
Na tali atu Iesu: “E sili lenei i poloaiga uma, ‘Faalogo mai ia Isaraelu e; o Ieova lo tatou Atua, o Ieova e tasi lava ia. Ma e tatau ona e alofa i a Ieova lou Atua ma lou loto atoa, ma lou ola atoa, ma lou manatu atoa, ma lou malosi atoa.’ E faapena foi lona lua, o lenei, ‘Ia e alofa atu i lē lua te tuaoi, ia pei o oe lava i a te oe.’ E leai lava se tasi poloaiga e sili i na poloaiga.” O le mea moni, sa faaopoopo atu Iesu: “O na poloaiga e lua ua autū ai le tulafono uma ma le au perofeta.”
Na ioe atu i ai se tusiupu: “Le aʻoaʻo e, o le tonu lea ua e fetalai mai ai. Auā e toatasi lava le Atua; e leai lava se tasi ua na o ia. Ia alofa foi i a te ia ma le loto atoa, ma le manatu atoa, ma le agaga atoa, ma le malosi atoa; ma ia alofa i lē la te tuaoi e pei o ia lava i a te ia, e sili lea i taulaga mu atoa, ma taulaga uma.”
I le matauina o le tali atu ma le poto a le tusiupu, ona taʻu atu lea e Iesu i a te ia: “E te lē vāvā mamao oe ma le malo o le Atua.”
O le tolu ai lea o aso—Aso Sa, Aso Gafua, ma le Aso Lua—talu ona aʻoaʻo atu Iesu i le malumalu. Sa faalogologo ma le fiafia tagata i a te ia, e ui ina mananao taʻitaʻi lotu e fasioti i a te ia ae sa lē taulau foi a latou taumafaiga. Mataio 22:15-40; Mareko 12:13-34; Luka 20:20-40.
▪ O le ā le taupulepulega leaga na faia e Faresaio ina ia maileia ai Iesu, ma o le ā sa ono iʻu i ai pe ana fai e tali atu ioe po o le leai?
▪ Sa faapefea ona faaleaogaina e Iesu taumafaiga a le au Satukaio e maileia o ia?
▪ O le ā le isi taumafaiga atili na faia e le au Faresaio e tofotofo ai Iesu, ma o le ā sa iʻu i ai?
▪ I le taimi o lana faiva mulimuli i Ierusalema, e fia aso na aʻoaʻo atu ai Iesu i le malumalu, faatasi ai ma ā iʻuga?