Mataupu 115

Sa Mapuna aʻe se Finauga

MUAMUA lava i lea afiafi po, na aʻoaʻo ai e Iesu se lesona matagofie o le auaunaga loto maulalo i le mulumuluina o vae o ona aposetolo. Ina ua mavae lea, ona ia amataina lea o le Faamanatuga o lona maliu lea ua toeitiiti oo ane. O lea la, ae maise lava i le manatu i le mea na seʻi faatoʻā uma ona faia, na tupu ai se mea e faateʻia ai. Sa aafia ona aposetolo i se fefinauaiga aasa i le po o ai o i latou e sili! Atonu o se tasi lena o vaega o se finauga sa faaauau pea.

Ia manatua ina ua uma le liua faamamaluina o Iesu i luga o le mauga, na fefinauai ai le au aposetolo po o ai o i latou e sili. E lē gata i lea, sa talosaga atu Iakopo ma Ioane i ni nofoaga sili i le Malo, na iu ai foi i se isi fefinauaiga atili i le va o aposetolo. O lea la, i lona po mulimuli faatasi ma i latou, pagā le faanoanoa atonu sa i a Iesu i le silasila atu i a i latou o toe fefinauai foi! O le ā na ia faia?

Na i lo le otegia o le au aposetolo ona o a latou amio, na onosai foi Iesu e toe talanoa atu i a i latou ma faapea atu: “O tupu o nuu ese ua aliitai i latou; o ē pule foi i a i latou ua taʻua i latou o ē agalelei. Ae lē faapea outou; . . . Auā po o ai lē sili; o lē taoto ea e ʻai, po o lē auauna mai? Pe lē o lē taoto ea e ʻai?” Ona ia faamanatu atu lea i a i latou o lana faaaʻoaʻoga, i lona fetalai atu: “A o aʻu nei, o loo i a te outou pei o le auauna lava.”

E ui lava i o latou lē lelei atoatoa, ae sa tutumau pea le au aposetolo i a Iesu i le taimi o ona tofotofoga. O lea na ia fetalai atu ai: “E faapei ona tofia mai e loʻu Tamā o le malo i a te aʻu, e faapea foi ona ou tofia outou.” O lenei feagaiga totino i le va o Iesu ma ona soʻo faamaoni na faafesootai atu ai i latou i a te ia ina ia auai i lana pulega mamalu. E na o se numera faatapulaaina e 144,000 o le a aveina atu mulimuli i lenei feagaiga mo se Malo.

E ui lava na tuuina atu i le au aposetolo lenei fuafuaga ofoofogia o le auai faatasi ma Keriso i le pulega o le Malo, ae i lea taimi sa vaivai faaleagaga i latou. Na fetalai atu Iesu: “E tausuai outou uma ona o aʻu i lenei lava po.” Ae peitai, i le taʻuina atu i a Peteru faapea sa tatalo o Ia e fai mona sui, na timai atu ai Iesu: “Pe a liua mai oe, ona e faamalosi ai lea i ou uso.”

Na faamatala atu e Iesu: “Laʻu fanau e, e toe itiiti nai aso ou te iai i a te outou, tou te saili mai i a te aʻu, ae pei ona ou fai atu i a Iutaia, O le mea ou te alu i ai, tou te lē mafai ona ō i ai; e faapea foi ona ou fai atu nei i a te outou. O le poloaiga fou ou te tuu atu ai i a te outou, ia outou fealofani; faapei ona ou alofa atu i a te outou, ia fealofani foi outou. O le mea lea e iloa ai e tagata uma lava o oʻu soʻo outou, pe afai ua outou fealofani.”

Sa fesili atu Peteru: “Le Alii e, po o fea e te maliu atu i ai?”

Na tali atu Iesu: “O le mea ou te alu i ai, e te lē mafai ona mulimuli atu nei i a te aʻu, a o se aso e te mulimuli atu ai i a te aʻu.”

Sa fesili fia iloa atu Peteru: “Le Alii e, pe se ā le mea ou te lē mafai ai ona mulimuli atu nei i a te oe? Ou te tuuina atu loʻu ola ona o oe.”

Na tali Iesu: “E te tuuina atu ea lou ola ona o aʻu? E moni, ou te fai atu i a te oe, O lenei aso, o le po nei lava, a o leʻi vivini faalua se moa, ae ua e faafiti faatolu mai i a te aʻu.”

Na tetee atu Peteru: “E ui lava ina tā oti faatasi ma oe, ou te lē faafiti lava i a te oe.” Ma a o fai mai foi faapena isi o le au aposetolo i le upu lava lea e tasi, a ua gugutu atu Peteru: “E ui lava ina tausuai o tagata uma ona o oe, ou te lē tausuai lava aʻu.”

I le faasino atu i le taimi ina ua ia aauina atu aposetolo i se talaʻiga faataamilo i Kalilaia e aunoa ma ni ato tupe ma ni taga meaʻai, ona fesili atu lea o Iesu: “Pe na outou matitiva ea i se mea e tasi?”

Na latou tali atu: “E leai lava.”

Ona ia fetalai atu lea: “A o lenei, ai se tagata e ana se ete tupe, inā tago ia i ai, e faapea foi sana ʻato, o le tagata foi e leai sana pelu, ia avatu lona ofu e faatau aʻi mai. Auā ou te fai atu i a te outou, e tatau ona taunuu mai i a te aʻu o le mea ua tusia, o lea, ‘Na faitauina foi o ia faatasi ma ē pagotata’; auā foi o le a faaiuina mea ua tusia i a te aʻu.”

Na faasino atu lena fetalaiga a Iesu i le taimi o le a faasatauroina ai o ia faatasi ma pagota, po o tagata solitulafono. Sa ia faaalia foi faapea o le a fesagaʻi ona soʻo ma sauāga matuitui i se taimi mulimuli ane. Na latou fai atu: “Le Alii e, faauta, o pelu nei e lua.”

A ua tali atu o ia: “Ua lava na.” E pei ona o le a tatou iloa, ona o le iai o pelu i a i latou, sa vave mafai ai e Iesu ona aʻoaʻoina se isi lesona matuā tāua. Mataio 26:31-35; Mareko 14:27-31; Luka 22:24-38; Ioane 13:31-38; Faaaliga 14:1-3.

▪ Aisea na faateʻia ai i le fefinauaiga a le au aposetolo?

▪ Sa faapefea ona taulimaina e Iesu le finauga?

▪ O le ā ua faataunuuina ona o le feagaiga na faia e Iesu ma ona soʻo?

▪ O le ā le poloaiga fou na tuu atu e Iesu, ma o le ā le tāua o lea mea?

▪ O le ā le soona mautinoa naua na faaalia e Peteru, ma o le ā na fetalai atu ai Iesu?

▪ Aisea na eseese ai faatonuga a Iesu e uiga i le tauaveina o se ato tupe ma se taga meaʻai, ma faatonuga na sa ia muai tuuina atu?