Mataupu 117

Sa Matuā Tiga a o Iai i le Faatoaga

INA ua uma ona tatalo Iesu, ona latou usuina ai lea ma ona aposetolo faamaoni e toʻa 11 pese o viiga i a Ieova. Ona latou ō ifo lea nai le potu i luga, ua oo atu i fafo i le mālū o le pogisa o le po, ma toe ui atu i le Vanu o Ketarono e agaʻi i Petania. Ae i le auala, sa latou malōlō ai i se nofoaga e masani ona latou fiafia i ai, o le faatoaga o Ketesemane. O lena faatoaga sa i luga po o tafatafa o le Mauga o Olive. Sa masani ona feiloai ai i inā Iesu ma ona aposetolo i totonu o le togāolive.

I le tuua o le toʻavalu o ona aposetolo—atonu e latalata i le faitotoa e ulu atu ai i le faatoaga—na ia faatonuina ai i latou: “Ia outou nonofo i inei, seia ou alu atu i ilā ou te tatalo.” Ona ia ave lea o le isi toatolu—o Peteru, Iakopo, ma Ioane—ma agaʻi e mamao atu i totonu o le faatoaga. Na oo ina tiga ma ātu le finagalo o Iesu. Na ia fetalai atu i a i latou: “Ua matuā tiga loʻu loto e oo i le oti. Ia outou nonofo pea i inei, ma ia tatou mataala faatasi ma aʻu.”

I le sōsō atu laitiiti i luma, ona faapaʻū faō ifo lea o Iesu i le eleele ma amata ona tatalo ma augani atu: “Loʻu Tamā e, afai e mafai, ia ave ese lenei ipu i a te aʻu; ae aua le faia loʻu loto, a o lou finagalo.” O le ā na ia uiga i ai? Aisea na “matuā tiga [ai lona] loto e oo i le oti”? Pe na solomuli ea o ia mai lana filifiliga ina ia maliu ma saunia le togiola?

E matuā leai lava! Sa leʻi augani atu Iesu ina ia faasaoina o ia mai le oti. E oo lava i le manatu ina ia alofia se maliu faataulagaina, e pei ona fautuaina ai e Peteru, sa avea o se mea valea i a te ia. Na i lo o lea, sa tiga o ia ona o le popole neʻi avea le auala o le a lē pine ae maliu ai—e pei o se tagata agasala inosia—ma itu e faalumaina ai le suafa o lona Tamā. Sa ia silafia ua toe o ni nai itula ona faasatauroina loa lea o ia i luga o se laau e pei o se tagata aupito silisili ona leaga—o sē upuvale faasaga i le Atua! O le mea lena sa matuā ātu ai o ia.

Ina ua uma ona ia tatalo mo se taimi umi, ona toe foi atu lea o Iesu ma iloa ua momoe ona aposetolo e toatolu. Ona ia fetalai atu lea i a Peteru e faapea: “Pe faapena ea ona outou lē lavā ona tatou mataala faatasi ma aʻu i le itu po e tasi? Ia outou mataala ma tatalo pea, ina neʻi oo mai le faaosoosoga i a te outou.” Ae peitai, i lona silafiaina o le tulaga faigata sa iai i latou ma le leva o le po, na ia fetalai atu ai: “Ua manao i ai le loto, a o le tino ua vaivai.”

Ona toe maliu ese atu lea o Iesu mo le taimi lona lua ma aioi atu, ia aveesea e le Atua mai i a te ia “lenei ipu,” o lona uiga, o le vaega tofia a le Atua, po o lona finagalo, mo ia. Ina ua foi mai o ia, na ia toe maua foi le toatolu o momoe ae sa tatau ona latou tatalo ina ia aua neʻi tofotofoina i latou. Ina ua fetalai atu Iesu i a te i latou, sa latou lē iloa se tala e tali atu ai.

I le iuga, o le taimi lona tolu lea, na savalivali teisi atu ai Iesu pe tusa o le togi o le maa le mamao, ona tootuli ifo lea o ia ma sa matuā alaga atu ma loimata, ua tatalo o ia: “Loʻu Tamā e, a e finagalo i ai, ia e ave ese lenei ipu i a te aʻu.” Na matuā lagona e Iesu le matuitui o tiga ona o le faalumaina o le a tuuina atu e lona maliu e pei o se pagota i le suafa o lona Tamā. Ioe, i le tuuaʻia o ia o sē e upuvale—o sē e faifai i le Atua—sa toetoe lava a lē mafai ona ia onosaia!

Ae peitai, sa faaauau ona tatalo Iesu: “Aua le faia loʻu loto, a o lou finagalo.” Sa gauai ma le usiusitai Iesu i le finagalo o le Atua. I lena taimi, na faailoa mai ai se agelu mai le lagi ma faamalosia o ia i ni upu faalaeiau. Sa faapea foi ona taʻu atu e le agelu i a Iesu ua talia o ia e lona Tamā.

Peitai, pagā se avega sa tauave e Iesu! O lona lava soifua e faavavau, atoa ma le ola e faavavau o tagata uma sa faalagolago i a te ia. Sa matuā ootia faalogona tiga. O lea na faaauau ai ona tatalo ma le matuā pulunaunau Iesu, ma o lona afu sa pei o ni ʻaluʻalu toto a o sisina ifo i le eleele. “E ui e seāseā ona tupu lenei mea,” ua matauina e le Journal of the American Medical Association, “e mafai ona tupu le afutoto pe a oo i ni tulaga matuā mafatia o faalogona ootia.”

Mulimuli ane, na toe foi atu Iesu mo le taimi lona tolu i ona aposetolo, ma na toe maua foi i latou o momoe. Na vaivai i latou ona o le matuā tiga i le alofa. Na ia faapea atu: “Pe tou te momoe ea ma malōlō i se taimi faapenei!” Soia! Ua oo mai le itu po; faauta, ua tuuina atu le Atalii o le tagata i lima o ē agasala. Inā tutū ia, ia tatou ō. Faauta, ua latalata mai o ia na te faalataina aʻu.”

A o tautala o ia, sa fotuaʻi mai Iuta le Sekara, sa ō mai faatasi ma le au e toatele sa tauaveina sulu ma molī ma auupega. Mataio 26:30, 36-47; 16:21-23; Mareko 14:26, 32-43; Luka 22:39-47; Ioane 18:1-3; Eperu 5:7.

▪ Ina ua tuua le potu i luga, o fea na taʻitaʻia i ai e Iesu le au aposetolo, ma o le ā na ia faia i inā?

▪ A o tatalo Iesu, o le ā sa faia e le au aposetolo?

▪ Aisea na matuā tiga ai Iesu, ma o le ā le olega na ia faia i le Atua?

▪ O le ā sa faaalia i le afu o Iesu na pei o ni ʻaluʻalu toto?