Mataupu 11

Sa Sauniunia e Ioane le Ala

UA MAVAE nei tausaga e sefulu ma le fitu talu ona avea Iesu o se tamaitiiti e 12 tausaga, lea na tuufesili i aʻoaʻo i le malumalu. O lea la ua oo i le tau e totogo ai mea i le tausaga e 29 T.A., ma e foliga mai ua talanoa uma tagata e uiga i le tauusoga o Iesu o Ioane, o lē sa talaʻi i nuu uma na siomia ai le Vaitafe o Ioritana.

O Ioane, o se tagata e faagaee loto i ona foliga, atoa ma lana tautala. Sa fai lona ofu i fulufulu kamela, ae fusi lona sulugatiti i le fusi paʻu. O ana meaai o iniseti o sē akerise ma le meli vao. Ma o le ā lana feau? “Inā salamō ia, auā ua latalata mai le malo o le lagi.”

O lenei feau sa faagaeetia ai lana au faalogologo. Na iloa ai e le toatele lo latou manaoga ina ia salamō, o lona uiga, ia suia o latou manatu ma ia teena auala tuai o o latou olaga matagā. O lea, mai le oganuu atoa na siomia ai le Ioritana, faapea foi ma Ierusalema, sa ō ane ai le toatele o tagata i a Ioane, ma na ia papatisoina i latou, e ala i le faatofuina i le vai o Ioritana. Aisea?

Sa papatisoina e Ioane tagata e fai ma faailoga, pe faaalia atu ai lo latou salamō mai o latou loto ona o agasala i le feagaiga o le Tulafono a le Atua. O lea, ina ua ō ane nisi o le au Faresaio ma le au Satukaio i le vai o Ioritana, sa tausalaina i latou e Ioane. Na ia faapea atu: “O outou o fanau a gata feai. Ia outou fua mai ni fua e tatau mo le salamō; aua foi neʻi outou manatu e faapea ifo i a te outou, O Aperaamo lo matou tamā. Auā ou te fai atu i a te outou e mafai lava e le Atua ona faatupuina mai i nei maa ni fanau ma Aperaamo. O loo tu nei le matau i tafuʻe o laau; o laau uma e lē fua mai i fua lelei, e taia i lalo ma lafoina i le afi.”

Ona o le uai uma atu o tagata i a Ioane, na aauina ane ai e tagata Iutaia ni ositaulaga ma sa Levī i a te ia. Sa fesili atu i latou nei: “O ai ea oe?”

Na tautino atu e Ioane: “E lē o aʻu o le Keriso.”

Ua latou toe fesili atu: “A o ai la? O oe ea o Elia?”

Na tali atu o ia: “E lē o lea.”

“O oe ea o Le Perofeta?”

“E leai!”

Ona latou tauanau atu lea: “O ai ea oe? ina ia matou avatu ai se tali i a i latou na aauina mai i matou. Se ā ea sau upu i a te oe?”

Ua faapea atu Ioane: “O aʻu o le leo o lē alaga i le vao, ‘Inā faalaulelei ia le ala o Ieova,’ e pei ona fai mai ai le perofeta o Isaia.”

Ona latou toe fesili fia iloa ane lea: “Se ā foi le mea e te papatiso ai, pe afai e lē o le Keriso oe, e lē o Elia, e lē o Le Perofeta?”

Ua tali atu o ia: “Ou te papatiso i le vai; a o loo tu mai i totonu i a te outou le tasi, tou te lē iloa o ia. O ia lea o loo mulimuli mai.”

Sa sauniuni e Ioane le ala i lona toe fuataiina lea o loto o tagata ina ia talia le Mesia, o lē o le a avea ma Tupu. Fai mai Ioane e uiga i a te Ia lena: “O Ia lea o loo mulimuli mai i a te aʻu, e sili ona malosi o ia i a te aʻu, e lē aogā foi aʻu ona tatala i nonoa o ona seevae.” O le mea moni, sa faapea mai foi Ioane: “O lē o loo mulimuli mai i a te aʻu, na muamua o ia i a te aʻu, auā na iai o ia ae ou te leʻi iai aʻu.”

O lea, o le feau a Ioane, “ua latalata mai le malo o le lagi,” na avea o se faasilasilaga i le lautele e faapea, e lē o toe mamao ae amata le faiva a le Tupu tofia a Ieova, o Iesu Keriso. Ioane 1:6-8, 15-28; Mataio 3:1-12; Luka 3:1-18; Galuega 19:4.

▪ O le ā le ituaiga o tagata sa iai Ioane?

▪ Aisea na papatisoina ai e Ioane tagata?

▪ Aisea na mafai ai ona fai atu Ioane ua latalata mai le Malo?