Mataupu 127

Sa Tanumia i le Aso Faraile—Se Tuugamau Gaogao i le Aso Sa

O LE taimi lea ua faasolo ina afiafi tele o le Aso Faraile, ma o le a amata le Sapati o Nisani 15 i le goto o le la. Sa tautau pea le tino maliu o Iesu i luga o le laau, ae o loo ola pea tagata faomea e toalua na i ona autafa. Sa taʻua le afiafi o le Aso Faraile o le aso o Sauniuniga ona o le aso lea sa sauniuni ai e tagata mea taumafa ma faauma ai so o se galuega na manaomia vave sa lē mafai ona faatali seia mavae le Sapati.

O le Sapati lea ua toeitiiti amata e lē gata o se Sapati masani, (le aso lona fitu o le vaiaso) ae o se Sapati e faaluaina, po o le Sapati “sili” foi lea. Na taʻua faapea, ona o Nisani 15 o le uluai aso lea o le Tausamiga e fitu aso o Areto e Lē Faafefeteina (ma e avea pea o se Sapati, e tusa lava po o le ā le aso o le vaiaso e paʻū i ai), na paʻū i le aso lava e tasi e pei o le Sapati masani.

E tusa ai ma le Tulafono a le Atua, sa lē tatau ona tuu ai pea tino oti e tautau i le satauro e atoa se po. O lea na fai atu ai tagata Iutaia i a Pilato ina ia faavavevave ona faaoti i latou na faasalaina e ala i le gauia o o latou vae. Ona gaui ai lea e fitafita o vae o faomea e toalua. Ae ona e foliga ua maliu Iesu, na lē gauia ai ona aao. Na faataunuuina ai i lena mea le mau o le Tusi Paia: “E le gauia sona ivi.”

Ae peitai, ina ia leai se masalosalo e uiga i le maliu moni o Iesu, na tutuʻi ai e se tasi o fitafita lona itu i le tao. Na ati atu le tao i le ogatotonu o lona fatu, ma tafe mai ai loa le toto ma le vai. Na lipotia mai e le aposetolo o Ioane, o lē sa avea o se molimau vaai tino, e faapea na faataunuuina ai i lena mea se tasi foi o mau o le Tusi Paia: “E vaai i latou i Lē na latou tuʻia.”

Na iai foi i le taimi o le faasalaga o Iesu, Iosefa mai le aai o Arimataia, o se sui taʻuleleia o le au Saniterini. Sa musu o ia e au atu i la latou taupulega e tusa ma le faaiuga lē tonu a le faamasinoga sili faasaga i a Iesu. O Iosefa o le soʻo moni lava o Iesu, e ui sa fefe e faailoa atu o ia o se soʻo o Iesu. Ae peitai, sa ia faaalia le lototele ma alu atu i a Pilato e talosaga atu i ai mo le tino o Iesu. Na valaau atu Pilato i le taʻitaʻiʻau e pule, ma ina ua uma ona faamautinoaina e le taʻitaʻiʻau ua maliu Iesu, ona tuuina atu lea e Pilato o le tino maliu.

Sa ave e Iosefa le tino ma aui i se ie lino e mamā lelei e sauniuni ai mo le tanuga. Sa fesoasoani i a te ia Nikotemo, o se tasi o sui o le au Saniterini. Sa lē taulau foi ona faaalia e Nikotemo lona faatuatua i a Iesu ona o le fefe ina neʻi leiloa lona tulaga. Ae na ia aumaia nei se taʻaiga ie pe tusa ma le selau pauna Roma [po o le 33 kilokalama] o le muro ma aloe taugata. Sa aui le tino o Iesu i fusi na iai na mea manogi, e pei lava o le auala sa faia ai le tu faa-Iutaia e saunia ai tino mo le tanuga.

Ona tuu ai lea o le tino i le tuugamau fou a Iosefa lea sa vane i le papa i se togalaau e lata ane. I le iuga, sa fuli atu ai se maa tele i luma o le gutu o le tuugamau. Ina ia faaiuina le tanuga a o leʻi oo i le Sapati, sa faavave ai ona faia le sauniuniga o le tino. O le mea lea, na faanatinati atu ai Maria le Makatala ma Maria le tinā o Iakopo le Itiiti, o ē atonu sa fesoasoani i le teuina o le tino, i lo latou aiga e sauniuni atili nisi mea manogi ma suāuu manogi. Sa latou fuafua a mavae le Sapati, ona latou faia atili lea o nisi mea manogi i le tino o Iesu ina ia taatia ai mo se vaitaimi umi.

O le aso na sosoo ai, o le Aso Toonai lea (le Sapati), na ō atu ai ositaulaga sili ma Faresaio i a Pilato ma faapea atu: “Le alii e, ua matou manatua, na fai mai lena tagata pepelo ina o ola o ia, ‘A mavae aso e tolu ou te toe tu mai ai.’ O lenei, ia e fetalai ane, ia faamauina le tuugamau seia oo i le aso tolu, ina neʻi ō atu ona soʻo i le po, ma gaoi i a te ia, ma latou fai atu i le nuu, ‘Ua toe tu mai o ia nai ē ua oti’; ona sili ai lea o le pepelo e mulimuli i lē na muamua.”

Na tali atu Pilato: “Ua i a te outou leoleo. Inā ō ia, faitalia outou ona faamau ai.” O lea na latou ō ai ma faamau le tuugamau, e ala i le faamauina o le maa ma tuu ai fitafita Roma e leoleo ai.

I le taeao po lava o le Aso Sa na aumai ai e Maria le Makatala, Maria le tinā o Iakopo, faatasi ma Salome, Ioana, ma isi fafine ni mea manogi e teu ai le tino o Iesu. Sa latou ō ane ma faapea ane le tasi i le isi: “Po o ai o le a na fuliesea le maa mai le gutu o le tuugamau mo i tatou?” Ae ina ua taunuu atu, sa latou iloa ai na lūlū se mafuie ma na fuli ese ai e le agelu a Ieova le maa. Sa leai ni leoleo, ma na gaogao le tuugamau! Mataio 27:57–28:2; Mareko 15:42–16:4; Luka 23:50–24:3, 10; Ioane 19:14, Ioane 19: 31–20:1; Ioane 12:42; Levitiko 23:5-7; Teuteronome 21:22, 23; Salamo 34:20; Sakaria 12:10.

▪ Aisea na taʻua ai le Aso Faraile o le aso o Sauniuniga, ma o le ā le Sapati “sili”?

▪ O ā mau o le Tusi Paia na faataunuuina e tusa ai ma le tino o Iesu?

▪ O le ā sa faia e Iosefa ma Nikotemo i le tanuga o Iesu, ma o le ā le la faiā i a Iesu?

▪ O le ā le talosaga na faia e ositaulaga i a Pilato, ma o le ā lana tali atu?

▪ O le ā na tupu i le taeao po lava o le Aso Sa?