Mataupu 25

Sa Tiga Alofa i se Lepela

A O ASIASI ane Iesu ma ona soʻo e toafā i aai o Kalilaia, sa salalau le tala i le itumalo atoa, e uiga i mea ofoofogia sa ia faia. Na oo atu le tala o ana galuega i se tasi aai o loo iai se tamaloa e maʻi i le lepela. Ua faamatalaina o ia e le fomai o Luka e faapea sa “lilofia i le lepela.” O āuga o lenei maʻi matautia, e faifai malie lava ona faaleagaina ai vaega eseese o le tino. Sa iai la lenei tagata lepela i se tulaga faanoanoa.

Ina ua oo atu Iesu i le aai, ona faalatalata ane lea o le tagata lepela i a te ia. E tusa ai ma le Tulafono a le Atua, e tatau i se tagata lepela ona alaga e lapatai atu, “Ua leaga, ua leaga!” ina ia puipuia ai isi mai le faalatalata ane ma pisia ai. A o lea ua tootuli ifo le tagata lepela ma aioi atu i a Iesu e faapea: “Le Alii e, a e finagalo i ai, e mafai lava ona e faamamā mai i a te aʻu.”

Maeu le faatuatua o le tamaloa i a Iesu! Ae pagā se vaaiga faanoanoa i lona tino ona o lona maʻi! O le ā sa faia e Iesu? Faamata o le ā se mea e te faia? Ona o lona alofa, na aapa atu ai le aao o Iesu ua paʻi atu i le tamaloa, ma faapea atu: “Ou te loto i ai. Inā mamā ia oe.” O le taimi lava lena na teʻa ese ai loa le maʻi lepela mai i a te ia.

Pe e te manao ea i se tasi e tiga alofa faapena e avea ma ou tupu? O le mea sa faia e Iesu i lenei tagata lepela, tatou te mautinoa ai, i le taimi o le pulega a Lona Malo, o le a faataunuuina ai le valoaga a le Tusi Paia e faapea: “E alofa atu ia i lē ua vaivai ma lē ua mativa, ma e faasaoina e ia ola o ē matitiva.” Ioe, o i inā o le a faataunuuina ai e Iesu le faanaunauga o lona loto ina ia fesoasoani atu i ē uma o loo pagatia.

A o leʻi faamaloloina foi e Iesu le tagata lepela, a ua leva ona faaosofia le naunau fia iloa o tagata ona o le faiva a Iesu. I le faataunuuina o le valoaga a Isaia, na fetalai atu ai Iesu i le tamaloa sa ia faamaloloina e faapea: “Ia oe, neʻi e taʻu atu se tala i se tasi.” Ona ia faatonu atu lea i a te ia: “Ia e alu ma faaali atu oe i le faitaulaga, ma ofoina atu o mea na poloai ai Mose mo lou faamamāina e fai ma molimau i a te i latou.”

Peitai, ona o le fiafia tele o le tamaloa sa lē mafai ai ona ia natia le vavega. Na alu atu o ia ma faasalalau solo le tala i so o se nofoaga, o lea na faapogaia ai le naunau tele ma le fiailoa o tagata, ma ua lē mafai ai ona maliu faaaliali atu Iesu i le aai. Ona nofo ai lea o Iesu i nofoaga tuufua e lē nonofo ai nisi, ma ua ō ane i ai tagata mai itu uma e faalogologo i a te ia ma ia faamaloloina o latou maʻi. Luka 5:12-16; Mareko 1:40-45; Mataio 8:2-4; Levitiko 13:45; 14:10-13; Salamo 72:13; Isaia 42:1, 2.

▪ O ā āuga o le maʻi lepela, ma o le ā le lapataiga sa tatau i se tagata lepela ona avatu?

▪ Na aioi faapefea se tagata lepela i a Iesu, ma o le ā e mafai ona tatou aʻoaʻoina mai le tali a Iesu?

▪ Sa lē usiusitai faapefea i a Iesu le tamaloa na faamaloloina, ma o ā iuga na oo i ai?