Sa Tiga Alofa mo Ē Mafatia
Mataupu 57
Sa Tiga Alofa mo Ē Mafatia
INA ua uma ona tausalaina Faresaio ona o lo latou auauna i ā latou lava uputuu, ona maliu ese lea o Iesu ma ona soʻo. Atonu o e manatua, e leʻi mamao atu, na faalavelavea ai lana taumafaiga ina ia ō ese ma ona soʻo e fai sina malologa, ina ua maua i latou e le motu o tagata. Ae o lea la, ua ia maliu atu ma ona soʻo i laufanua o Turo ma Saitonu, e mamao lava i le itu i mātū. E foliga mai sa na o le pau lea o le malaga a Iesu ma ona soʻo na sopo atu i tuaoi o Isaraelu.
Ina ua maua se fale e nonofo ai, ona faailoa atu lea e Iesu faapea, na te lē o toe manao lava e iloa e se tasi le mea o loo latou iai. Peitai, e oo lava i na nuu e lē ni Isaraelu, sa lē mafai lava ona lilo ai o ia. Na alu ane i a te ia se fafine Eleni, na fanau i inā i Foinie i Suria, ma aioi atu e faapea: “Le Alii e, le Alo o Tavita, ia e alofa mai i a te aʻu. Ua leaga lava laʻu tama teine i le temoni ua iai.” Peitai, sa leʻi tali atu Iesu i se upu.
Mulimuli ane, ona fai atu lea o ona soʻo i a Iesu: “Ia auina ese atu o ia; auā ua ia alaga mai pea ma mulimuli mai i a i tatou.” I le faamatalaina o le mafuaaga na ia lē amanaia ai o ia, na fetalai atu Iesu: “E leʻi auina mai aʻu i nisi ae i mamoe ua leiloa o le aiga o Isaraelu.”
Peitai sa leʻi faavaivai ai le fafine. A ua faalatalata atu i a Iesu ma tootuli i ona luma. Ua ia aioi atu: “Le Alii e, ia e fesoasoani mai i a te aʻu!”
Pagā le ootia atonu sa iai i le finagalo o Iesu ona o le augani faamaoni ane a le fafine! E ui i lea, na ia toe faasino atu foi i lana uluai avega tauave, o le auauna atu lea i tagata o le Atua, o Isaraelu. I lena lava taimi, e foliga mai ina ia tofotofoina le faatuatua o le fafine, sa ia taʻu atu ai le manatu faifai o tagata Iutaia i tagata o isi atunuu, i lona finau atu: “E lē tatau ona ave meaai a le fanau ma lafo i tamai ulī.”
E ala i lona siufofoga tiga alofa ma ona foliga faaalia, e mautinoa ai sa faaalia e Iesu ona lava faalogona mafana i tagata e lē o ni Iutaia. Sa ia faamāmāina foi le faatusatusaina o tagata o Nuuese i ulī, i lona faatusaina o i latou i “tamai ulī” po o tamai maile. Na i lo le faatautee, sa faaaogā e le fafine lena faamatalaga a Iesu e uiga i manatu faifai o tagata Iutaia ma aioi atu ai ma le loto maulalo: “Ioe, le Alii e, ae o le mea moni e ʻaai tamai ulī i momoi mea e pauu ifo i laulau a o latou matai.”
Na tali atu Iesu: “Funa e, ua tele lou faatuatua, Ia faapea lava ona faia e pei o lou manao.” Ma na faia lava faapena! Ina ua toe foi atu o ia i lona aiga, na ia iloa ai lana tama teine i le moega, ua maloloina atoatoa.
Mai le talafatai o le laufanua o Saitonu, na agaʻi atu ai Iesu ma ona soʻo i le isi itu o le atunuu, i punā vai o le vaitafe o Ioritana. E foliga mai na latou asā le Ioritana i se vaega e i luga atu o le Sami o Kalilaia ma oo atu ai i le laufanua o Tekapoli i le itu i sasae o le sami. O i inā na latou aʻea ai se mauga, peitai, na maua lava i latou e le motu o tagata ma avane ai i a Iesu o latou tagata pipiʻo, o pipili, o tauaso, o gūgū, ma le toatele o ē mamai ma ē mumutu. Sa na ona latou lafo atu lava o i latou i aao o Iesu, ma na ia faamaloloina i latou. Na maofa tagata, a o latou vāai atu i gūgū ua tautatala, o ē sa vae pipiʻo ua savavali, ma ua pupula tauaso; ona latou vivii atu ai lea i le Atua o Isaraelu.
Sa uai faapitoa atu lava Iesu i se tasi tagata o lē sa tutuli ma sa faigata ona tautala. E masani lava ona maasiasi gofie tagata tutuli, ae maise lava pe a tumutumu. Atonu sa matauina faapitoa lava e Iesu le lē toʻa o lenei tagata. O lea, i lona tiga alofa, sa tatai ese ai o ia e Iesu mai le mea sa tumutumu ai tagata. Ina ua na o i laua, sa faailoa atu ai e Iesu le mea o le a faia i a te ia. Ona tuu lea e Iesu o ona tamatamailima i totonu o taliga o le tagata, ma ina ua uma ona feanu, sa ia paʻi atu i lona laulaufaiva. Ona tepa aʻe lea o Iesu i le lagi, ua matuā mapuea foi ma fetalai atu: “Ia matala ia.” Ona toe lelei ai lea o le faalogo a lea tagata, ma ua mafai foi ona ia tautala e pei ona masani ai.
Ina ua faia e Iesu le tele o nei faamalologa, sa matuā talileleia ma talisapaia e le motu o tagata. Ua latou faapea ane: “Ua lelei tele ana mea uma ua fai. O ia na mafai ai ona toe faalogo ē sa tutuli, ua toe gagana foi ē sa gūgū.” Mataio 15:21-31; Mareko 7:24-37.
▪ Aisea na lē vave faamaloloina ai e Iesu le tama teine a se fafine Eleni?
▪ Mulimuli ane, o fea na ave i ai e Iesu ona soʻo?
▪ Sa faapefea ona faamaloloina ma le tiga alofa e Iesu le tagata tutuli o lē sa faigata ona tautala?