Mataupu 82

Sa Toe Agaʻi atu Iesu i Ierusalema

SA LEʻI pine ae toe maliu atu foi Iesu, ua aʻoaʻo atu i lea aai ma lea aai, ma i lea nuu ma lea nuu. E foliga mai, ua oo o ia i le itumalo o Perea, e ui atu i le Vaitafe o Ioritana mai Iutaia. Ae sa ia fuafua e agaʻi atu i Ierusalema.

Ona o le filosofia faa-Iutaia faapea e na o se numera faatapulaa o tagata e aogā i ai le faaolataga, atonu na mafua ai ona fesili ane se tagata e faapea: “Le Alii e, e toaitiiti ea ē faaolaina?” I lana tali atu, na faamalosi atu ai Iesu i tagata ina ia manatunatu i le mea e manaomia mo le faaolataga e faapea: “Ia outou finafinau [o lona uiga, ia tauivi, pe ia tautiga] ina ia ulu atu i le faitotoa vaapiapi.”

O sea taumafaiga filigā e faanatinati, “auā” e pei ona fetalai atili Iesu, “e toatele latou te saili ina ia ulu atu ai, ae lē mafai.” Aisea latou te lē mafai ai? Fai mai a ia, ‘afai e uma ona tulai lē ona le fale ma faamau le faitotoa ae tutū mai tagata i fafo ma tuʻituʻi mai e faapea, “Le Alii e, ia e tatala mai i a te i matou,” o le a ia tali atu i ai: “Ou te lē iloa outou pe mai fea. Inā ō ese atu ia i a te aʻu, o outou uma o ē fai amioleaga!”’

O i latou sa tapunia i fafo e leʻi ō i totonu, atonu na ō atu i se taimi e talafeagai mo i latou lava. Peitai o le taimi lena ua tapunia ai ma faamauina le faitotoa mo avanoa. Ina ia mafai ona ulu atu i totonu, sa tatau ona latou vave ō atu, e tusa lava pe lē talafeagai lena taimi mo i latou. O le mea moni, o i latou e faatuai ona latou faia le tapuaiga i a Ieova ma sini autu i le olaga, latou te maua se iuga faanoanoa!

O le mea sa sili ona lē taulau ai tagata Iutaia ia na auina atu Iesu e auauna i ai, o lo latou lē puea lea o le avanoa ofoofogia e talia ai le sauniuniga a le Atua mo le faaolataga. O lea na fetalai atu ai Iesu, o le a i a i latou le tagiauē ma le lilivau o nifo pe a lafoina i latou i fafo. I le isi itu, o tagata mai “sasae ma sisifo, ma le itu i mātū, atoa ma le itu i toga,” ioe, mai atunuu uma, “o le a taooto i le laoai i le malo o le Atua.”

Sa faaauau ona fetalai atu Iesu: “O i latou o ē mulimuli [o tagata faatauvaa e lē ni Iutaia, atoa ma ē mafatia o Iutaia] o le a avea ma ē muamua, a o i latou o ē muamua [o tagata Iutaia e tamaoaiga faaletino ma aloaia faalelotu] o le a avea ma ē mulimuli.” O le avea o i latou ma ē mulimuli, o lona uiga o na tagata e faatalalē i mea faaleagaga, ma le lē loto faafetai, o le a lē iai i le Malo o le Atua.

Ua ō ane foi le ʻau Faresaio ma faapea atu i a Iesu: “Inā alu ia oe i lou ala, auā ua manao Herota [Anitipa] e fasioti i a te oe.” Atonu sa amata e Herota lava ia lenei tala faatupu ina ia sola ese ai Iesu mai lona nuu. E lē taumatea sa fefe Herota ina neʻi toe aafia o ia i le fasiotiga o se tasi o perofeta a le Atua, e pei ona ia aafia ai i le fasiotiga o Ioane le Papatiso. Peitai na fetalai atu Iesu i le ʻau Faresaio: “Inā ō ia ma fai atu i lena alope, ‘Faauta! o loo ou tulia i fafo temoni, o loo ou faamaloloina foi ē mamai i le asō ma a taeao, ma a oo i le aso lona tolu ona ou faaiuina ai lea.”

Ina ua faaiuina lana galuega i inā, ona faaauau lea o le malaga a Iesu i Ierusalema, auā e pei ona ia faamatalaina, “e lē mafai lava ona fano se perofeta i fafo atu o Ierusalema.” Aisea na faatalitalia ai faapea o le a fasiotia Iesu i Ierusalema? Auā o Ierusalema o le laumua lena, sa iai le faamasinoga maualuga a le ʻau Saniterini e toʻa 71 ona sui, ma o i inā sa osia ai taulaga i manu. O le mea lea, sa lē tuua ai le “Tamai Mamoe a le Atua” ina ia fasiotia i se isi mea, ae i Ierusalema.

Na tagiauē Iesu e faapea: “Ierusalema e, Ierusalema e, o lē fasiotia perofeta, ma fetogi i maa ē na aauina atu i a te oe, ua tele lava loʻu manao e faapotopoto i lau fanau, e pei o le moa ona ofoofotai i lana toloai i lalo o ona apaau, ae lē mafafai outou! Faauta! Ua tuua lo outou fale e faatafunaina.” Ona o le teena o le Alo o le Atua, na malaia ai le nuu!

A o faaauau le malaga a Iesu i Ierusalema, sa valaaulia o ia i le fale o se taʻitaʻi o le ʻau Faresaio. O le aso lea o le Sapati, ma sa tulimataia o ia e tagata, ona sa iai i inā se tagata na maʻi i le fula, atonu na feosofi i ona lima ma ona vae. Na fetalai atu Iesu i le ʻau Faresaio ma le ʻau popoto i le Tulafono o ē na iai, i se fesili e faapea: “Pe sa ea ona faamalolo i maʻi i le sapati?”

E leai se tasi na tali ane. O lea na faamalolo ai e Iesu le tamaloa, ma tuuina atu e alu. Ona ia fesili atu lea: “O ai so outou afai e paʻū lona atalii po o lana povi i le lua, pe lē vave ea ona alu atu ma avane i luga i a te ia i le aso sapati?” E leai foi se tasi na tali ane i se upu. Luka 13:22–14:6; Ioane 1:29.

▪ O le ā na faaalia e Iesu, e manaomia mo le faaolataga, ma aisea na toatele ai ē na i fafo e leʻi ō i totonu?

▪ O ai ē “mulimuli” na avea ma ē muamua, ma ē “muamua” na avea ma ē mulimuli?

▪ Aisea atonu na latou fai atu ai faapea o loo manao Herota e fasioti i a Iesu?

▪ Aisea sa lē tuua ai se perofeta e fasiotia i fafo atu o Ierusalema?