Mataupu 103

Sa Toe Asiasi atu i le Malumalu

NA FAATOʻĀ uma lava ona tofafā Iesu ma ona soʻo i le po lona tolu i Petania talu ona latou taunuu ane mai Ieriko. E malama aʻe le taeao o le Aso Gafua, le aso 10 o Nisani, ua iai i latou i le ala agaʻi i Ierusalema. Ua fia taumafa Iesu. Ma ina ua silasila atu o ia i le laau o le mati ma ona lau, sa ia maliu atu loa i ai e silasila po o iai ni ona fua.

Na fai si vave tutupu o lau o le laau, semanu faatoʻā amata le fuata mai i a Iuni, a o lea faatoʻā oo i le faaiuga o le masina o Mati. Peitai, e foliga mai sa manatu Iesu e faapea, ona ua vave ona tutupu ona lau, atonu foi la ua vave ona iai ni ona fua. Ae sa faameo o ia. Na faaalia e lau o le laau se vaaiga taufaasesē. Ona fetuu ai lea e Iesu o le laau, i lona fetalai atu, “Aua le toe ʻaina lava e se tagata sina ou fua e oo i le faavavau.” O iuga o lena gaoioiga a Iesu ma lona uiga, na iloa i le taeao na sosoo ai.

A o faaauau pea le malaga a Iesu ma ona soʻo, e leʻi pine ae taunuu loa i Ierusalema. Na maliu atu o ia i le malumalu, lea na ia asiasi atu i ai i le aoauli o le aso ua tuanai. Peitai, i le aso lena na ia faia ai loa se gaoioiga, e pei ona sa ia faia i tausaga e tolu ua mavae ina ua maliu atu o ia i le Paseka i le 30 T.A. Sa tutuli i fafo e Iesu i latou sa faia a latou faafetauaiga i le malumalu, ma tafuli laulau a tagata faatau tupe ma i latou sa faatau lupe. Na te leʻi faatagaina foi se tasi e avatu ni avega e ui atu i le malumalu.

Na ia tausalaina i latou o ē na faafesuiaia tupe ma faatauina atu manu i le malumalu, i lona fetalai atu i ai e faapea: “E lē ua tusia ea, ‘E taʻua loʻu fale o le fale tatalo mo nuu uma’? A ua faia e outou ma ana o ē fao mea.” Na avea i latou ma faomea, ona sa latou tāpā ni tau tetele faasili mai i a i latou o ē sa leai se isi mea e sulu i ai seʻi vaganā ai le faatauina mai i a te i latou o manu e manaomia mo taulaga. O lea na manatu ai Iesu i nei faiga faapisinisi o se faiga fai faamalosi po o le faomea.

Ina ua faalogo faitaulaga sili, o tusiupu, ma alii sili i le mea na faia e Iesu, ona latou toe sailia foi lea o se auala ina ia fasiotia ai o ia. Na faamaonia ai le lē masuia o o latou loto. Peitai, latou te leʻi iloa se auala e faaumatia ai Iesu, talu ai sa mulimuli atu pea tagata uma ina ia faalogologo i a te ia.

E ese ai mai tagata moni o Iutaia, na ō mai foi tagata o Nuu Ese i le Paseka. O i latou na o tagata faatoʻā liliu, o lona uiga ua faaliliuina i le lotu a tagata Iutaia. O nisi tagata Eleni, atonu o ni tagata liliu, sa latou faalatalata atu i a Filipo ma talosaga atu e fia feiloai i a Iesu. Ona alu lea o Filipo i a Aneterea, atonu ina ia fesili atu pe talafeagai lea feiloaiga. E foliga sa iai pea Iesu i le malumalu, i le mea e mafai ai e tagata Eleni ona vaaia o ia.

Na silafia e Iesu sa itiiti ni nai aso o totoe mo ia, o lea na ia faia ai se tala faatusa matagofie o lona tulaga: “Ua oo mai ona po e oo ai le Atalii o le tagata i lona mamalu. E moni, e moni, ou te fai atu i a te outou, Afai a e lē paʻū le fua o le saito i le eleele ma pala ai, e tumau pea o le mea e tasi; ae afai e pala, ona fua mai ai lea o fua e tele.”

O le fatu e tasi o le saito e itiiti lona tāua. Peitai, e faapefea pe a tuu i le eleele ma “pala,” ma iʻu ai lona ola o se fatu? Ona tatupu lea ma i se taimi ona tupu ai lea ma avea ma laau e maua mai ai le tele anoanoai o saito. E faapena Iesu, sa na o ia o se tagata lelei atoatoa e toatasi. Ae pe a maliu o faamaoni i le Atua, ona avea lea o ia ma auala e tuuina atu ai le ola e faavavau i tagata faamaoni o ē o iai foi lea lava agaga faataulagaina totino lea sa i a te ia. O lea, na fetalai atu ai Iesu: “O lē faapelepele i lona ola e faamāumau e ia i ai, a o lē ʻinoʻino i lona ola i lenei lalolagi, e leoleo ai e ia e oo i le ola faavavau.”

E manino lava e lē o manatu Iesu mo na o ia lava, auā na ia toe faamatala atili mai: “A fia auauna mai se tasi i a te aʻu, ia mulimuli mai o ia i a te aʻu; o le mea ou te iai aʻu, e iai foi laʻu auauna; pe a auauna mai foi se tasi i a te aʻu, ona viia lea o ia e le Tamā.” Maeu se taui ofoofogia ona o le mulimuli atu i a Iesu ma auauna i a te ia! O le taui lea o le faamamaluina e le Tamā ina ia aufaatasi ai ma Keriso i le Malo.

I le manatu e uiga i le puapuaga tele ma le maliu tiga na taatia mai mo ia, na faaauau atu ai Iesu: “O loo ātu nei loʻu loto, pe se ā foi se mea ou te fai atu? Loʻu Tamā e, faaola mai i a te au i lenei itu aso.” Ana seʻi mafai la ona alofia le mea sa tatalia o ia! Peitai e leai, e pei ona ia fetalai: “O le mea lava lea na ou oo mai ai i lenei itu aso.” Na malie atoatoa Iesu i fuafuaga uma a le Atua, e aofia ai lona lava maliu faataulagaina. Mataio 21:12, 13, 18, 19; Mareko 11:12-18; Luka 19:45-48; Ioane 12:20-27.

▪ Aisea na manatu ai Iesu e maua ni fua o le mati e ui lava e lē o le tau lea e fua ai?

▪ Aisea na taʻua ai e Iesu i latou na faia fefaatauaiga i le malumalu o ē “fao mea”?

▪ I le ā le auala sa pei ai Iesu o se fatu saito ua pala?

▪ O le ā le lagona sa i a Iesu e uiga i le puapuaga ma le maliu na tatali mai mo ia?