Mataupu 40

Se Lesona i le Alofa Faamagalo

E LĒ taumatea sa iai pea Iesu i Naina, i le mea e leʻi leva ona ia faatuina ai le tama a le fafine ua oti lana tane, pe atonu foi sa ia asiasi atu i se aai e latalata ane. Sa manao le Faresaio e igoa i a Simona ina ia vaaitino lava i lē sa faia nei galuega ofoofogia. O lea na ia valaaulia ai Iesu la te talisua faatasi.

Ona o le manatu i lea faatasiga o se avanoa e auauna atu ai mo i latou e auai, sa talia ai e Iesu le valaaulia e pei foi ona ia talia le valaaulia ina ia aai faatasi ma le au ao lafoga, atoa ma ē agasala. Ae ina ua ia ulu atu i le fale o Simona, sa leʻi faia i a Iesu le tulaga faaaloalo e masani ona faaalia i mālō. Sa vevela ma palapalā vae ma seevae ona sa faimalaga ane i auala pefua, ma o se tu masani o le agaga talimalo le mulumulu o vae o mālō i vai mālūlū. Peitai, sa leʻi mulumuluina aao o Iesu ina ua taunuu atu. E leʻi sogi faafeiloai atu foi i a te ia, e pei ona masani ai. Ma e leʻi uuina foi lona ao i le suauu e masani ai i le taliina o mālō.

I le gasologa o le taumafataga, a o taooto mālō e taumamafa, ae ulufale lemū atu loa i le potu se fafine e leʻi valaauliaina. Sa lauiloa lenei fafine i le aai o sē e ola i se olaga lē mamā. Ae atonu sa faalogo o ia i aʻoaʻoga a Iesu, e aofia ai lana valaaulia i a i ‘latou uma sa mafatia ina ia ō mai i a te ia mo se malologa.’ Ma i le matuā uunaia i mea sa ia vaai ma faalogo i ai, o lea na ia saili ai i a Iesu.

Na ui atu le fafine i tua o Iesu a o iai i le laulau, ma tootuli atu i ona aao. A o toulu ifo ona loimata i aao o Iesu, sa ia soloiesea i ona lauulu. Na ia avane foi le suauu manogi mai lana fagu, ma liligi ifo i aao o Iesu a o ia sogi lemū atu i ai. Sa vaavaai atu pea i ai ma le lē fiafia Simona. Na ia faapea ifo i a te ia: “Ana se perofeta lenei tagata, po ua ia iloa le ituaiga o fafine lea o loo paʻi atu i a te ia, o ia o se tagata agasala.”

Ina ua silafia e Iesu ona manatunatuga, ona ia fetalai atu lea e faapea: “Simona e, o loo iai se mea ou te fia fai atu i a te oe.”

Fai mai a ia: “Le aʻoaʻo e, inā fetalai maia!”

Ua fetalai atu Iesu: “E toalua ni tagata na aitalafu i se tasi tagata. Sa aitalafu le tasi i tenari e limaselau, a o le isi e limasefulu. Ina ua leai ni a la mea e toe totogi atu ai, sa ia faamagalo i a te i laua uma. O lea, o ai o i laua o le a sili ona alofa i a te ia?”

Na tali ane ma le lē fiafia Simona i lenei fesili, e foliga mai e faasalaese, “Ou te masalo o lē na ia faamagalo atu i ai mea e tele.”

Ua fetalai atu Iesu: “Ua tonu lou manatu.” Ona ia faliu ane lea i le fafine, ma ia fetalai atu i a Simona: “O e vaai mai ea i lenei fafine? Na ou ulu mai i lou fale; e te leʻi aumaia ni vai e mulumulu ai oʻu vae. Ae ua faasisina ifo e lenei fafine ona loimata i oʻu vae, ma soloese ai i ona lauulu. E te leʻi sogi mai foi i a te aʻu; ae o lenei fafine, talu lava ona ou ulufale mai, ua lē aunoa ona sogi lemū mai i oʻu vae. E te leʻi uuina loʻu ulu i le suauu; ae o lenei fafine, ua ia uuina oʻu vae i le suauu manogi.”

Sa avatu e le fafine faamaoniga o le salamō moni mai lona loto ona o ana amioga lē mamā i aso ua mavae. Ua fetalai atu foi Iesu e faapea: “O lea ou te fai atu ai i a te oe, e ui ina tele agasala a lenei fafine, ae ua faamagaloina, auā ua tele lona alofa; ae o lē ua faamagaloina i ai mea e itiiti, e itiiti lona alofa.”

E lē faapea na manatu māmā pe faaleamanaia e Iesu amioga lē mamā. Ae na i lo lea, na faaalia ai i lenei mea lona tigaalofa ma le malamalama i tagata o ē sa faia mea sese i le olaga, ae na toe faaalia lo latou salamō ona o na amioga leaga, ma ua ō ane ai i a Keriso mo se mapusaga. I le avatuina o le malologa moni i le fafine, na fetalai atu ai Iesu e faapea: “Ua faamagaloina au agasala . . . Ua e ola i lou faatuatua; inā alu ia ma le manuia.” Luka 7:36-50; Mataio 11:28-30.

▪ Sa faapefea ona talia Iesu e Simona lē sa talimalo i a te ia?

▪ O ai sa saili i a Iesu, ma aisea?

▪ O le ā le tala faatusa na taʻu atu e Iesu, ma sa faapefea ona ia faatatauina?