Mataupu 64

Se Lesona i le Loto Faamagalo

E FOLIGA mai sa iai pea Iesu ma ona soʻo i le fale i Kapanaumi. Sa ia talanoaina ma i latou le auala e taulimaina ai faafitauli i le va o uso, o lea na fesili atu ai Peteru: “Le Alii e, e faafia ea ona agaleaga mai loʻu uso i a te aʻu, ma ou faamagalo i a te ia?” Talu ai sa manatu aʻoaʻo lotu a Iutaia, e na o le faatolu ona faamagalo i se tagata, o lea atonu sa manatu ai Peteru, o se matuā agalelei lava pe a fai atu “seia atu fitu?”

Ae o lena faiga o le faitauina faapena, e sese. Na faasaʻo atu e Iesu Peteru: “Ou te lē fai atu i a te oe, seia atu fitu, a ia fitugafulu ni fitu.” Na ia faaalia ai i inā, e leai se mea e gata mai ai ona faamagalo atu e Peteru i lona uso.

Ina ia faamamafa i le au soʻo la latou matafaioi o le faamagalo atu, na faamatala atu ai e Iesu i a te i latou se tala faatusa. Sa faatatau lea tala faatusa i se tupu o lē sa manao i ana auauna e toe totogi ane a la aitalafu. Na avane i a te ia le tasi auauna o lē sa ia nonōina se tupe tele e 60,000,000 tenari. Sa matuā lē mafai lava ona ia totogia. O lea, e pei ona faamatalaina e Iesu, sa faatonu ai loa e le tupu ina ia faatauina o ia ma lana avā ma lana fanau ina ia totogi mai ai le aitalafu.

Sa tootuli ifo loa le auauna i vae o lona matai ma aioi atu e faapea: “Ia e faapalepale mai i a te aʻu, ou te totogi atu ai au mea uma.”

Ona o lona tiga alofa i le auauna, na faamagalo ai ma le alofa mutimutivale e le matai le aitalafu tele a le auauna. Na faamatala atili atu e Iesu, sa leʻi pine ona faia faapea, ae alu atu loa lenei auauna ma saili i le isi uso a auauna o lē sa na o le 100 tenari na aitalafu ai i a te ia. Ua puʻe foi e lenei tamaloa lona uso a auauna ma titina i a te ia, ua faapea atu: “Inā totogi mai ia aʻu mea ua i a te oe.”

Ae sa leai se tupe a le uso a auauna. O lea na ia tootuli atu ai i vae o lē na ia aitalafu ai ma aioi atu: “Ia e faapalepale mai i a te aʻu, ou te totogi atu ai au mea.” I le lē pei o lona matai, sa leʻi alofa mutimutivale lena auauna, a ua ia tuuina atu lona uso a auauna i le falepuipui.

Sa faaauau ona faamatala atu e Iesu, o lea na ō atu ai isi auauna o ē na vāai i le mea na tupu, ma taʻu atu i lo latou matai. Na matuā ita tele le matai ma valaau atu i le auauna. Ua ia faapea atu: “Le auauna leaga e, na aʻu faamagaloina atu aʻu mea uma na i a te oe, ina ua e aioi mai i a te aʻu. Pe lē tatau ea ona e alofa atu i lou uso a auauna, e pei o aʻu foi na ou alofa atu i a te oe?” Ona o lona toatamai tele, na tuu atu ai e le matai le auauna lē alofa i ē faataumaoi, seia totogi mai ana mea uma.

Ona fetalai faaiu atu ai lea o Iesu: “E faapea foi ona faia i a te outou e loʻu Tamā o i le lagi, pe afai tou te lē taitasi ma faamagalo ma o outou loto atoa i o outou uso.”

Maeu se lesona lelei o le loto faamagalo! Pe a faatusatusa atu i le aitalafu tele o agasala ua faamagalo ai i tatou e le Atua, e tusa lava la po o ā agasala e fai mai e se uso Kerisiano i a te i tatou, ae o se mea faatauvaa lena. E lē gata i lea, e faitau afe ona faamagalo i tatou e Ieova. E masani lava ona tatou lē iloa a tatou agasala faasaga i a te ia. O lea la, pe lē mafai ea ona tatou faamagalo i o tatou uso mo ni nai taimi, e tusa lava pe iai se mafuaaga saʻo tatou te faitio ai? Ia manatua, e pei ona aʻoaʻo atu e Iesu i lana Lauga i luga o le Mauga, o le a ‘faamagalo e le Atua a tatou agasala, pe afai tatou te faamagalo atu i ē ua agaleaga mai i a te i tatou.’ Mataio 18:21-35; 6:12; Kolose 3:13.

▪ O le ā na pogai ai le fesili a Peteru e uiga i le faamagaloina o lona uso, ma aisea na ia manatu ai o se agalelei, pe a faafitu ona faamagaloina se tasi?

▪ Na faapefea i le tali atu a le tupu i le aioiga a lana auauna mo le alofa mutimutivale ona eseese ma le tali atu a le auauna i le aioiga a lona uso a auauna?

▪ O le ā ua tatou aʻoaʻoina mai le tala faatusa a Iesu?