Se Lesona i le Loto Maulalo
Mataupu 62
Se Lesona i le Loto Maulalo
INA ua mavae ona faamaloloina le tama na uluitinoina e le temoni i le vaega e latalata i Kaisareia Filipi, ona finagalo lea o Iesu e toe foi atu i lona aiga i Kapanaumi. Peitai, sa manao o ia e malaga na o i latou ma ona soʻo ina ia mafai ai ona ia saunia atili i latou mo lona maliu ma ā latou avega tauave mulimuli ane. Na ia faamatala atu i a te i latou: “E tuuina atu le Atalii o le tagata i lima o tagata, latou te fasioti foi i a te ia; ae e toe faatuina o ia pe a mavae aso e tolu.”
E ui ina sa muai fetalai Iesu e uiga i lenei mea, ma na vaaitino foi aposetolo e toatolu i lona faaliliuga i le taimi na talanoaina ai lona “tuumuli ese,” ae sa lē malamalama lava ona soʻo e uiga i le mataupu. E ui foi ina e leʻi taumafai se tasi o i latou e tetee i le fasiotia o ia, e pei ona sa faia muamua e Peteru, ae sa latou fefefe e toe fesiligia atili o ia e uiga i lea mea.
Mulimuli ane, sa latou taunuu i Kapanaumi, lea sa avea ma nofoaga e faamautu i ai le faiva a Iesu. O le nuu moni foi lea o Peteru ma le toatele o isi aposetolo. O i inā na ō ane ai i a Peteru ni tagata e aoina lafoga i le malumalu. Atonu i le taumafai e faaaafia Iesu i le solia o tu masani, na latou fesili ane ai e faapea: “E lē faia ea e lo outou aʻoaʻo le lafoga [o titarama e lua] i le [malumalu]?”
Na tali atu Peteru: “E fai lava.”
Ae na silafia e Iesu le mea na tupu, e ui ina sa ia taunuu mulimuli ane i le fale. O lea, a o leʻi faatū mai e Peteru le mataupu, sa fesili ane Iesu: “Simona e, pe ni ā fa oe? E ao tiute po o lafoga mai i a te ai e tupu o le lalolagi? O a latou fanau ea, po o tagata ese?”
Na tali atu Peteru: “O tagata ese.”
Ona faapea ane lea o Iesu: “O lea foi ua saoloto ai le fanau.” Talu ai o le Tamā o Iesu o le Tupu lea o le lagi ma le lalolagi, o Lē sa tapuaia i le malumalu, sa lē manaomia ai la i le tulafono ona totogi e le Alo o le Atua se lafoga i le malumalu. Ua fetalai atu foi Iesu: “A o lenei, neʻi latou tausuai i a i tatou, inā alu ia oe i le vai, ma lafo ai se mātau, o le uluai iʻa e te maua, ia e tago i ai, ma fafasi lona gutu, ona e maua ai lea o le setatara [e fa titarama]. Ia e ave, ma avatu i a te i latou mā aʻu atoa ma oe.”
Ina ua faapotopoto faatasi le au soʻo ina ua latou foi atu i Kapanaumi, atonu i le fale o Peteru, ona latou fesili atu lea: “O ai ea e sili i le malo o le lagi?” Na silafia e Iesu le pogai na lāgā ai la latou fesili, auā sa ia iloa le mea na tupu i a te i latou a o latou mulimuli atu i ona tua i lo latou foi ane mai Kaisareia Filipi. O lea na ia fesili atu ai: “Pe se ā na outou fefinauai ai i le ala?” Ona o lo latou mamā, na lē toe tautala ai se isi o le au soʻo, auā sa latou fefinauai po o ai o i latou e sili.
Ina ua mavae le tusa ma le tolu tausaga o aʻoaʻoga a Iesu, pe foliga mai ea o se mea uigaese le fefinauai faapena o le au soʻo? Ioe, sa faaalia ai le malosi o aafiaga o le lē lelei atoatoa faaletagata, atoa ma o latou talaaga faalelotu. O le lotu Iutaia lea na ola aʻe ai le au soʻo, sa faamamafa ai tulaga po o tofiga i a latou feutagaiga uma. E lē gata i lea, ae atonu sa faasausili Peteru, ona o le folafolaga a Iesu e tuuina atu i a te ia ni “ki” faapitoa o le Malo. Atonu foi sa iai ni manatu faapena i a Iakopo ma Ioane, ona sa la maua le faaeaga e molimauina ai le faaliliuina o Iesu.
Po o le ā lava le mafuaaga, ae na faatulaga e Iesu se faataitaiga faagaee loto ina ia taumafai ai e faasaʻo o latou uiga. Na ia valaauina se tamaitiiti, ma faatū i o latou luma, ua ia tago atu foi i ai, ma fetalai atu: “A lē liua outou, ma avea ia pei o tamaiti, tou te lē sao lava i le malo o le lagi. O lenei o sē faamaulalo o ia i a te ia e pei o lenei tamaitiiti, e sili lea i le malo o le lagi; ai sē talia se tamaitiiti faapenei ona o loʻu igoa, ua ia talia aʻu.”
Maeu se auala ofoofogia na faasaʻo ai ona soʻo! Sa leʻi toatamai Iesu i a i latou ma taʻua i latou o ni ē e faamaualuluga, matapeapea, pe fiasili. E leai, ae sa ia faataitaia lana aʻoaʻoga e faasaʻo ai, e ala i lona faaaogāina o le faaaoaoga i tamaiti laiti, o ē e mamā o latou uiga ma e lē fiasili ma o ē lē popole i ni tulaga i lo latou lotolotoi i le lautele. O lea na faailoa atu ai e Iesu, e manaomia ona atiina aʻe e ona soʻo na uiga e pei ona iai i tamaiti loto maulalo. E pei ona fai mai le fetalaiga faaiu a Iesu: “O lē aupito itiiti i a te outou uma, e sili lava ia.” Mataio 17:22-27; 18:1-5; Mareko 9:30-37; Luka 9:43-48.
▪ I le foi atu i Kapanaumi, o le ā le aʻoaʻoga na toe taʻua e Iesu, ma na faapefea ona taliaina?
▪ Aisea sa lē tatau ai ona totogia e Iesu se lafoga i le malumalu, ae aisea na ia totogia ai?
▪ O ā mea atonu na mafua ai le finauga a le au soʻo, ma sa faapefea ona faasaʻoina i latou e Iesu?