Mataupu 65

Se Malaga Faalilolilo i Ierusalema

UA OO i le tau e āfu ai mea i le 32 T.A., ma ua latalata i le Tausamiga o Faleapitaga. Sa tele lava ina faia galuega a Iesu i Kalilaia, talu mai le Paseka o le 31 T.A., ina ua taumafai tagata Iutaia e fasioti i a te ia. E foliga mai, e talu mai lena taimi sa na ona asiasi atu lava o Iesu i Ierusalema ina ia auai i tausamiga faaletausaga e tolu a Iutaia.

Sa uunaia Iesu e ona uso: “Ia e tuua lenei mea, ma e alu ane i Iutaia.” O Ierusalema o le laumua lena o Iutaia ma o le taulaiga o faiga faalotu i le atunuu atoa. Sa manatu ona uso: “E leai se tasi na te faalilolilo se mea a o loo manao e faaalia atu o ia.”

E ui ina sa lē talitonu Iakopo, Simona, Iosefa, ma Iuta e faapea o lo latou uso matua o Iesu, o ia moni lea o le Mesia, ae sa latou mananao i a te ia ina ia faailoa atu lona mana faivavega i a i latou uma sa faatasi ai i le tausamiga. Peitai, sa silafia lelei e Iesu le lamatia ai. Ua ia fetalai atu: “E lē mafai e le lalolagi ona inoino i a te outou; ae inoino mai i a te aʻu, auā ou te molimau i ai ua leaga ana amio.” O lea na fetalai atu ai Iesu i ona uso: “Ō aʻe ia outou i le tausamiga; e leʻi oo i le taimi ou te alu aʻe ai i lea tausamiga.”

O le Tausamiga o Faleapitaga, o se faamanatuga lea e fitu aso e faia ai. O le aso lona valu e faaiuina ai i sauniga tāua. O lenei tausamiga e faailogaina ai le iuga o galuega faafaatoaga i le tausaga, ma o se taimi e olioli tele ai ma avatu ai taulaga faafetai. Ina ua mavae ni nai aso, talu ona tuumuli ese uso o Iesu ina ia faatasi ma le aumalaga e toatele, ona ia maliu faalilolilo atu ai lea ma ona soʻo, ina ia aua neʻi iloa i latou e ni tagata. Sa ui atu i latou i Samaria, na i lo le auala sa uia e le toatele o tagata e lata i le Vaitafe o Ioritana.

Talu ai sa manaomia e Iesu ma lana au malaga ni mea latou te api ai i se nuu i Samaria, o lea na ia muai aauina atu ai ni avefeau e faia ni sauniuniga. Peitai, sa mumusu tagata e faia se mea mo Iesu ona talu ai sa latou faalogo ua agaʻi atu o ia i Ierusalema. Ona feita ai lea o Iakopo ma Ioane ua fesili atu: “Le Alii e, pe e te finagalo ea ma te fai atu ia totō ifo le afi mai le lagi, ina ia fano ai i latou?” Sa matuā aoaia i laua e Iesu ona o le fautuaina o lena mea, ma latou malaga atu ai i le isi aai.

A o latou savavali i le ala, a ua fai ane se tasi tusiupu i a Iesu: “Le aʻoaʻo e, ou te mulimuli atu i a te oe i mea uma e te maliu atu i ai.”

Na tali ane Iesu, “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.” Sa faamatala atu e Iesu, o le a oo ni tulaga faigata i le tusiupu pe afai o le a avea o ia ma Ona soʻo. Ma e foliga mai o lona faatatauga, ona o le faamaualuga tele o le tusiupu na lē talia ai lenei ituaiga o olaga.

Sa fetalai atu foi Iesu i se isi tamaloa: “Inā mulimuli maia i a te aʻu.”

Ae na tali mai le tamaloa: “Tuu mai ia i a te aʻu, seʻi ou alu e muai tanu i loʻu tamā.”

Ona tali atu lea o Iesu: “Inā tuu pea ia i ē ua oti e tanu i o latou tagata oti, a o oe, e te alu ma talaʻi atu le malo o le Atua.” E mautinoa e leʻi oti le tamā o le tamaloa, auā ana faapea ua oti, semanu e lē auai lona atalii i inā e faalogologo i a Iesu. E foliga mai sa talosaga atu le atalii mo se taimi e faatali ai seia oti lona tamā. Sa leʻi sauni o ia e faamuamua le Malo o le Atua i lona olaga.

A o latou agaʻi atu i le ala i Ierusalema, ae fai ane foi le isi tamaloa i a Iesu: “Le Alii e, ou te mulimuli atu i a te oe; a ia tuu mai i a te aʻu, seʻi oʻu muai faamavae i loʻu aiga.”

Na tali atu Iesu: “O lē tago lona lima i le suotosina, ma tepa i tua, e lē tatau ia i le malo o le Atua.” O i latou o le a avea ma soʻo o Iesu e tatau ona taulai atu la latou vaai i le auaunaga o le Malo. E pei lava ona piʻo o le laina palapala pe afai e lē vaai saʻo i luma le tagata sua palapala, e faapena foi ona tautevateva se tasi e toe tepa i tua i lenei faiga tuai o mea, mai le auala e taitaiina atu ai i le ola e faavavau. Ioane 7:2-10; Luka 9:51-62; Mataio 8:19-22.

▪ O ai uso o Iesu, ma sa faapeī o latou lagona e uiga i a te ia?

▪ Aisea na soona agaleaga ai tagata Samaria, ma o le ā na mananao i ai Ioane ma Iakopo e fai?

▪ O ā talanoaga e tolu na faia e Iesu i luga o le auala, ma sa ia faamamafaina faapefea le manaoga mo se auaunaga e faataulagaina totino?