Se Malaga i Iutaia Ona o le Alofa Mutimutivale
Mataupu 89
Se Malaga i Iutaia Ona o le Alofa Mutimutivale
I NI nai vaiaso muamua atu, i le taimi o le Tausamiga o le Faaulufalega i Ierusalema, na taumafai ai tagata Iutaia e fasioti i a Iesu. O lea na malaga atu ai o ia i mātū, e foliga mai i se vaipanoa e lē mamao tele mai le Sami o Kalilaia.
E leʻi leva tele atu, sa ia toe agaʻi atu ai i le itu i saute i Ierusalema, ma talaʻi atu ai i le ala i nuu o Perea, o se itumalo i sasaʻe o le Vaitafe o Ioritana. Ina ua uma ona faamatala atu le tala faatusa e uiga i le tagata mauoa ma Lasalo, sa faaauau pea ona ia aʻoaʻoina ona soʻo i mea na ia aʻoaʻo atu muamua a o iai i Kalilaia.
Mo se faaaoaoga, na ia fetalai atu e sili ona lelei i se tagata “pe afai e nonoa se maaolo i lona ua ma lafoina o ia i le sami” na i lo o lona faatausuaiina o “ē faatauvaa” a le Atua. Na ia faamamafaina foi le manaoga ina ia faamagalo e faapea: “E tusa lava pe faafitu i le aso ona agasala mai [se uso] i a te oe, ma foi faafitu atu i a te oe, ma faapea atu, ‘Ua ou salamō,’ e tatau ona e faamagalo i a te ia.”
Ina ua talosaga ane le ʻau soʻo e faapea, “Ia e faatuputeleina lo matou faatuatua,” na tali atu Iesu: “Afai e tusa lo outou faatuatua ma le fua o le sinapi, e mafai ona outou fai atu i lenei laau o le sukamina, ‘Ia liaiina oe ma totōina i le sami!’ ona usiusitai lava lea i a te outou.” O lea, e oo lava i sina faatuatua itiiti e mafai ona faataunuuina ai mea tetele.
Ona sosoo ai lea ma le faamatalaina e Iesu o se tulaga moni i le olaga e faaalia ai le manatu saʻo e tatau ona iai i se auauna a le Atua e Ona le Malosi Uma Lava. Na fetalai atu Iesu: “O ai foi so outou e ana le auauna na te suatia le fanua pe leoleo i mamoe, e fai atu i a te ia pe a sau o ia mai le fanua, ‘Sau loa, inā taoto e ʻai’? Na i lo o lea, pe lē fai atu ea o ia i a te ia, ‘Inā sauni mai ia saʻu meaai o le po, ma ia fusi ou ofu ma auauna mai i a te aʻu seia uma ona ou ʻai ma inu, ona e ʻai ai lea ma inu mulimuli ane’? E lē faafetai atu o ia i le auauna, auā po ua lē faia ea e le auauna o mea na tofia atu na te faia? O lea, e faapena foi outou, pe a uma ona outou faia o mea na tofia atu i a te outou, ia faapea atu, ‘O auauna lē aogā i matou. O mea ua matou faia, o mea ia e tatau ona matou faia.’” O lea, e lē tatau i auauna a le Atua ona manatu faapea ua latou faia se mea lelei mo le Atua, ona ua latou auauna i a te ia. Na i lo lea, e ao lava ona latou manatua i taimi uma le faaeaga ua latou maua, o le tapuai atu lea i a te ia i le avea ma sui maufaatuatuaina o lona aiga.
E foliga mai e leʻi umi lava ona taʻu atu e Iesu lena tala faatusa ae taunuu ane loa se avefeau. Sa auina ane o ia e Maria ma Mareta, o tuafāfine o Lasalo, o ē sa nonofo i Petania i Iutaia. Na faapea atu le avefeau: “Le Alii e, faauta! o loo maʻi lē ua alofagia e oe.”
Na tali atu Iesu: “O lenei maʻi e lē iu ina oti, ae e mo le viiga o le Atua, ina ia viia ai foi le Atalii o le Atua i lea mea.” Ina ua mavae aso e lua o nofo ai pea i inā, ona fetalai atu lea o Iesu i ona soʻo: “Ia tatou toe ō atu ia i Iutaia.” Peitai, sa latou faamanatu ane i a te ia e faapea: “Rapi e, faatoʻā mavae atu lava ona saili tagata Iutaia e fetogi i a te oe, ae e te toe maliu atu ea i ai?”
Na tali atu Iesu e ala i se fesili: “Pe e lē sefululua ea itula o le ao? Afai e savali se tasi i le ao, e lē fetoʻai lava o ia ma se mea, auā o loo vaai o ia i le malamalama o lenei lalolagi. Ae afai e savali se tasi i le po, e fetoʻai o ia ma se mea, auā e lē o iai se malamalama i a te ia.”
E foliga mai o le uiga o le fetalaiga a Iesu, o “itula o le ao,” po o le taimi sa atofaina e le Atua mo le faiva faalelalolagi a Iesu, e leʻi uma, ma e leai se tasi e mafai ona faia se mea leaga i a te ia seʻi vaganā ua uma lena taimi. Sa manaomia ona ia faaaogaina atoatoa le taimi puupuu o le “ao” na totoe mo ia, auā o le a oo mulimuli mai le “po,” pe a fasiotia o ia e ona fili.
Na faaopoopo atu Iesu: “O loo moe la tatou uō o Lasalo, ae ou te alu atu e fafagu i a te ia.”
Atonu i lo latou manatu faapea o loo moe Lasalo, ma o se faailoga mautinoa lea e iloa ai e mafai ona ia toe ala mai, na tali ane ai le ʻau soʻo: “Le Alii e, afai o moe o ia, o le a toe malosi.”
Ona taʻu saʻo atu lea e Iesu i a te i latou: “Ua oti Lasalo, ma ou te olioli ona o outou i loʻu lē iai i inā, ina ia talitonu ai outou. Ae tatou ō atu ia i a te ia.”
I le naunau e lagolagoina o ia, e ui ina iloa e ono fasiotia ai Iesu i Iutaia, na faalaeiau atu ai Toma i ona uso a soʻo e faapea: “Ia tatou ō atu foi ia, ina ia tatou oti faatasi ma ia.” O lea, e ui ina lamatia ai o latou ola, ae na ō faatasi le ʻau soʻo ma Iesu i lenei malaga i Iutaia ona o le alofa mutimutivale. Luka 13:22; 17:1-10; Ioane 10:22, 31, 40-42; 11:1-16.
▪ E leʻi leva tele atu na talaʻi ai Iesu i fea?
▪ O ā aʻoaʻoga na toe aʻoaʻo atu e Iesu, ma o le ā se tala moni i le olaga na ia faamatalaina atu e faaalia ai le ā le manatu?
▪ O le ā le tala na maua e Iesu, ma o le ā na ia faauiga i ai le “ao” ma le “po”?
▪ O le ā le uiga o le tala a Toma e faapea, “Ia tatou ō atu foi ia, ina ia tatou oti faatasi ma ia”?