Se Pule Manaomia e Silisili i Tagata
Mataupu 53
Se Pule Manaomia e Silisili i Tagata
INA ua fafagaina faavavega e Iesu le faitauafe o tagata, sa matuā maofa i latou. Ua latou faapea ane: “E mautinoa o le perofeta lenei o le a afio mai i le lalolagi.” Fai mai lo latou manatu e lē gata atonu o Iesu o le perofeta lea e sili i a Mose, ae o le a avea foi o ia o se pule e sili ona manaomia. Ona latou taupulepule ai lea e puʻe i a te ia e fai ma tupu.
Peitai, sa silafia e Iesu le taupulepulega a tagata. Ona ia vave maliu ese lea ina ia alofia ai lo latou faamalosia o ia. Ua ia tuu atu foi i le motu o tagata e ō, a ua timai atu i ona soʻo ia feosofi i le vaa ma toe foi i Kapanaumi. Ona ia tuumuli lea i le mauga e tatalo ai. E na o Iesu sa iai i inā i lena po.
A o toeitiiti lava tafa mai ata, na silasila ifo ai Iesu mai le mea maualuga sa iai o ia ma matauina ai le sousou o peau o le sami ona o se matagi malosi. Ina ua sulugia i le malamalama o le masina ua tāli atoa, ona ua latalata i le Paseka, na silafia ifo ai e Iesu le vaa, atoa ma ona soʻo o loo tauivi ina ia sao mai peau o le sami. Sa tuu uma iai le malosi o nei tamaloloa i le taualoina o le vaa.
Ina ua silafia e Iesu lenei mea, ona ia maliu ifo ai lea nai le mauga ma savali atu i luga o peau o le sami agaʻi i le vaa. E tusa o le tolu i le fa maila (po o le lima i le ono kilomita) le mamao na folau ese atu ai le vaa ae taunuu loa i ai Iesu. Peitai, sa savali pea o ia e pei o le a ia pāsia i latou. Ina ua iloa atu e le au soʻo, ona latou alalaga ai lea: “O se aitu!”
Na tali faamafanafana ane i ai Iesu: “O aʻu lava; aua tou te matatau.”
Ae na faapea atu Peteru: “Le Alii e, afai o oe, ia e fetalai mai i a te aʻu ou te alu atu i a te oe i luga o le vai.”
Sa tali ane Iesu: “Inā sau ia!”
Ona oso ese ai lea o Peteru mai le vaa, ma savali atu i luga o le vai i a Iesu. Ae ina ua ia vaai atu i le matagi malosi, ona fefe ai lea o Peteru, ma ua amata ona magoto ifo, ae sa ia alaga atu: “Le Alii e, ia e laveai mai i a te aʻu!”
Na aapa atu loa le aao o Iesu, faasao mai o ia ma fetalai atu i ai: “O oe na lē faatuatua itiiti, se ā e te masalosalovale ai?”
Ina ua toe foi Peteru ma Iesu i le vaa, ona pē lea o le matagi, ma sa ofo ai foi le au soʻo. Ae pe sa tatau ona latou maofa? Ana latou iloa “le uiga o areto,” e ala i le talisapaia o le vavega sili na faatino e Iesu i ni itula faatoʻā mavae atu, ina ua ia fafaga le faitauafe o tagata i na o ni nai areto e lima ma tamai iʻa e lua, semanu latou te lē matuā maofa i lona mafai ona savali i luga o le vai ma faafilemu i le matagi. E ui i lea, sa ō ane le au soʻo ma ifo i a Iesu ma faapea atu: “O oe moni lava o le Alo o le Atua.”
E leʻi umi, ae latou taunuu loa i Kenesareta, o se fanua laugatasi e matagofie toe fua tele mai, e latalata i Kapanaumi. O inā na latou taulaina ai le vaa. Ae ina ua latou ō atu i le matafaga, sa iloa ane ai Iesu e tagata ma latou ō atu ai i nuu e latalata ane e saili i ē o mamai. Ina ua aumaia i latou nei i o latou moega, ma tau ina papaʻi atu i le tuupao o le ofu tele o Iesu, sa matuā faamaloloina atoatoa ai i latou.
Na iloa ai e le motu o tagata o ē na molimauina le fafagaina faavavega o le faitauafe o tagata, ua maliu ese Iesu. O lea, ina ua taunuu ane tamai vaa mai Tiperia, sa latou feosofi loa i ai ma folau atu i Kapanaumi e saili i a Iesu. Ina ua latou maua o ia, ona latou fesili atu lea: “Rapi e, o anafea na e maliu mai ai i inei?” Sa matuā aʻoaʻia lava i latou e Iesu, e pei ona o le a tatou vaaia. Ioane 6:14-25; Mataio 14:22-36; Mareko 6:45-56.
▪ Ina ua uma ona fafaga faavavega e Iesu le faitauafe o tagata, o le ā sa mananao tagata e fai i a te ia?
▪ O le ā na silafia ifo e Iesu mai le mauga na ia tuumuli atu i ai, ma o le ā sa ia faia loa?
▪ Aisea sa lē tatau ai ona matuā maofa le au soʻo ona o nei mea?
▪ O le ā na tupu ina ua latou taunuu i le matafaga?