Se So‘o Uigaese
Mataupu 45
Se Soʻo Uigaese
PAGĀ se vaaiga taufaamatau, a o savali atu Iesu i le matafaga! E toalua ni tagata feai uigaese na ō aʻe mai tuugamau ma taufetuli ane i a te ia. Ua uluitinoina i laua e temoni. Ona o le tasi o i laua, sa foliga mai e sili atu ona faavalemalosi na i lo le isi, ma sa umi atu foi ona puleaina e temoni, o lea na uai totoʻa atu ai i a te ia.
Sa mau lenei tagata puapuagatia e lē lavalavā i se taimi umi i tuugamau. I le ao ma le po, sa faaauau ai pea ona ia ‘alaga ma selei i a te ia i maa. Ona o lona sauā tele, sa lē mafai ai ona lototele se tasi e ui atu i lena auala. Sa faia ni taumafaiga ina ia noanoatia o ia, ae sa ia motusia filifili uamea ma faamau uamea sa i ona vae. Na matuā leai lava ma se tasi e mafai ona puea o ia.
A o faalatalata atu le tagata i a Iesu ma tootuli atu i ona aao, sa uunaia o ia e temoni na puleaina o ia ina ia alaga atu e faapea: “Se ā lau na i a te aʻu nei, Iesu e, le Alo o le Atua Silisiliese? Ou te fai atu i a te oe ia e tauto mai i le suafa o le Atua, e te lē faatiga mai i a te aʻu.”
Na fetalai atu Iesu: “Alu ia i fafo i le tagata, o oe na le agaga leaga.” Ona toe fesili atu lea o Iesu: “O ai lou igoa?”
Na tali ane o ia e faapea: “O Lekeono loʻu igoa; auā e toatele i matou.” Sa fiafia tele temoni e vaavaai atu i mafatiaga o i latou sa mafai ona latou uluitinoina, ma e foliga mai sa latou matuā fiafia lava e fuifui faatasi i ia tagata, i se agaga palaʻai tuufaatasi. Ae ina ua fesagai ma Iesu, sa latou aioi atu ina ia aua neʻi aauina atu i latou i le to e lē gata. Ua tatou toe iloa ai foi, sa iai i a Iesu le malosi tele; lea na mafai ai ona ia faatoilaloina e oo lava i temoni feai. Na faaalia ai foi i lena mea e faapea, sa iloa lelei lava e temoni, o le lafoina o i latou i le to e lē gata, faatasi ma lo latou taʻitaʻi o Satani le Tiapolo, o le faamasinoga faaiu lava lea a le Atua mo i latou.
Sa tataa latalata ane se lafu puaa e tusa ma le 2,000 i luga o le mauga. O lea na faapea atu ai temoni: “Ia e aauina i matou i puaa, matou te uluitino ai.” O le mea moni, sa maua e temoni se fiafiaga i se faiga saua e lē tatau ai, mai lo latou uluitinoina o mea faiola faaletino. Ina ua faatagaina i latou e Iesu e uluitino i puaa, sa faapea ona feosofi uma ifo ai lenei 2,000 i le tofē ma malelemo ai i le sami.
Ina ua iloa lenei mea e i latou sa fafagaina puaa, ona latou faataalise atu ai lea ua taʻu atu i aai ma faoa aai. O lea, sa ō ane ai tagata e matamata i le mea na tupu. Ina ua latou taunuu ane, ona latou iloa ai lea o le tagata na ō ese mai ai temoni. A ua fai ona ofu ma ua atamai, o loo nofo i aao o Iesu!
O ē na vāaitino i lea mea, sa latou faamatalaina atu le auala na faamaloloina ai lea tagata. Na latou taʻu atu foi i tagata le auala matautia na faatamaia ai puaa. Ina ua faalogo tagata i lenei mea, sa matuā fefefe lava i latou, ma na latou uunaia faamalosi ai Iesu ina ia maliu ese mai lo latou nuu. Sa usitai i ai o ia ma ua maliu aʻe loa i le vaa. Peitai sa talosaga ane i a Iesu lē na uluitinoina e temoni ina ia latou ō faatasi ma ia. A ua fetalai atu Iesu i a te ia: “Alu ia oe i lou fale, i lou aiga, ma ia e taʻu atu i a te i latou mea tetele ua faia e Ieova mo oe, ma lona alofa mutimutivale i a te oe.”
Sa masani lava ona faatonu atu e Iesu i latou na ia faamaloloina, ina ia aua neʻi latou taʻuina atu i se tasi, talu ai sa lē finagalo o ia e faia e tagata ni faaiuga, ona o ni tala o mea ofoofogia na tutupu. Peitai, sa talafeagai lelei lava lenei faatagaga, auā sa molimau atu ai lē na uluitinoina e temoni, i tagata o ē atonu sa lē mafai ona oo atu i ai Iesu. E lē gata i lea, o le a avea le faatasi ai o lena tagata, ma itu o le a avatu ai se faamaoniga, e uiga i le mana na faia ai e Iesu mea lelei, ma foia ai ni faamatalaga sese atonu o le a salalau solo e uiga i le faatamaia o le lafu puaa.
I le usiusitai i le faatonuga a Iesu, na alu ai loa le tagata na uluitino e temoni. Ua amata ona ia talaʻi atu i Tekapoli o mea uma sa faia e Iesu i a te ia, ma sa matuā maofa ai lava tagata. Mataio 8:28-34; Mareko 5:1-20; Luka 8:26-39; Faaaliga 20:1-3.
▪ Aisea atonu sa uaʻi totoʻa atu ai i le tagata e toatasi na uluitinoina e temoni, ae semanū e toalua tagata na iai?
▪ O le ā sa faaalia ai na iloa e temoni o le a lafoina i latou i le to e lē gata i se taimi o i luma?
▪ Aisea na foliga mai ai sa fiafia temoni e uluitinoina tagata ma manu?
▪ Aisea na faataga ai e Iesu le tagata na uluitinoina e temoni, ma faatonuina o ia ina ia taʻu atu i isi, mea na Ia faia mo ia?