Mataupu 60

Se Vaaiga Faataimua i le Mamalu o Keriso i le Malo

NA OO atu Iesu i laufanua o Kaisareia Filipi, ma sa ia aʻoaʻo atu i le motu o tagata, e aofia ai ma ona aposetolo. Ona ia taʻuina atu lea i a te i latou o lenei faasilasilaga faamaniti tino e faapea: “E moni, ou te fai atu i a te outou, o loo tutū mai i inei nisi e lē oo i a te i latou le oti, seia latou vaaia le Atalii o le tagata ua sau i lona malo.”

Atonu sa tau mānatu le au soʻo, ‘po o le ā sa uiga i ai le fetalaiga a Iesu?’ E tusa o se vaiaso mulimuli ane ai, na ave ai e Iesu, Peteru, Iakopo, ma Ioane, ma latou ō atu i se mauga matuā maualuga. Atonu sa latou ō atu i le po, fua i le momoe o le au soʻo. A o tatalo Iesu, sa liua o ia i o latou luma. Na amata ona pupula ona fofoga e pei o le la, ma ua sinasina mai foi ona ofu e pei o le malamalama.

Ona aliaʻi mai lea o ni foliga o ni tagata se toalua e pei o “Mose ma Elia,” ma ua amata ona latou fetautalatalai ma Iesu e uiga i lona ‘tuumuli ese lea o le a faia i Ierusalema.’ O lona tuumuli ese, sa faasino lea i le maliu o Iesu ma lona toe faatuina aʻe i se taimi mulimuli. O lea, o lenei talanoaga sa faamaonia ai faapea, o lona maliu tiga, e lē o se mea e tatau ona alofia, e pei ona faanaunau i ai Peteru.

Sa matuā feala loa le au soʻo, ua vaavaai atu ma faalogologo ma le ofo tele. E ui lava o se faaaliga lenei mea, ae ona sa foliga o se mea moni, na amata ai ona auai atu Peteru i lena vaaiga, ma faapea atu: “Le Alii e, e lelei ona tatou nonofo i inei; a e finagalo i ai, matou te faia i inei ni fale apitaga se tolu; o le tasi mo oe, e mo Mose le tasi, a o le tasi mo Elia.”

A o tautala atu Peteru, ae ufitia loa i latou i se ao pupula, ma ua faapea mai se siufofoga mai le ao: “O loʻu Atalii pele lena, ou te fiafia i a te ia; ia outou faalogo i a te ia.” Ina ua latou faalogo atu i le siufofoga, ona faapauu faō ai lea o le au soʻo. A ua fetalai atu Iesu: “Inā tutū ia i luga; aua tou te matataʻu.” Ina ua latou tutū aʻe, e leai se tasi na latou iloa ua na o Iesu.

I le aso na sosoo ai ina ua latou ō ifo nai le mauga, ona poloai atu lea o Iesu: “Aua neʻi outou taʻu atu i se tasi le mea na outou vaaia, seia toe tu mai le Atalii o le tagata nai ē ua oti.” O le aliaʻi mai o Elia i le faaaliga na lāgā ai se fesili i mafaufau o le au soʻo. Ua latou fesili ane foi: “Se ā le mea ua fai mai ai le au tusiupu, e ao ina muai sau o Elia?”

Ona fetalai atu lea o Iesu: “Ua mavae ona sau o Elia, ae leʻi iloa o ia e i latou.” Peitai, sa fetalai Iesu e uiga i a Ioane le Papatiso, o lē na faataunuuina se galuega e pei o lea na faia e Elia. Sa saunia e Ioane le ala mo Keriso, e pei ona sa faia e Elia mo Elisaia.

Maeu se faamalosiau o lena faaaliga, e lē gata i a Iesu ae faapea foi i le au soʻo! O le faaaliga e pei ona vaaia, o se ata lea o le mamalu o le Malo o Keriso. O lona uiga, na vaaia e le au soʻo “le Atalii o le tagata ua sau i lona malo,” e pei lava ona sa folafola atu e Iesu i le vaiaso ua tuanai atu. Ina ua mavae le maliu o Iesu, sa tusia ai e Peteru e uiga i le avea o i latou ma ‘molimau vaaitino i le mamalu uigaese o Keriso, a o latou iai ma ia i luga o le mauga paia.’

Na tāpā e le au Faresaio mai i a Iesu se faailoga e faamaonia ai o ia lea sa folafolaina mai i le Tusi Paia o le a fai ma Tupu filifilia a le Atua. Ae sa leʻi avatua i a te i latou se faailoga faapena. I le isi itu, sa faatagaina soʻo vavalalata o Iesu e vāai i lona faaliliuina e fai ma faamautinoaga o valoaga o le Malo. O lea, na tusia mulimuli ane ai e Peteru: “O loo i a te i tatou foi le upu o le valoaga e sili lona mautinoa.” Mataio 16:13, Mataio 16: 28–17:13; Mareko 9:1-13; Luka 9:27-37; 2 Peteru 1:16-19.

▪ A o leʻi oo i lona maliu, sa vaaia faapefea e nisi le afio mai o Keriso i lona Malo?

▪ I le faaaliga, o le ā sa talanoa i ai Mose, Elia ma Iesu?

▪ Aisea sa avea ai lenei faaaliga o se fesoasoani e faamalosiau ai i le au soʻo?