Sosola ese Mai se Pule Sauā
Mataupu 8
Sosola ese Mai se Pule Sauā
NA FAFAGU e Iosefa Maria ina ia taʻu atu i ai se tala faanatinati. Faatoʻā uma lava ona faaali ane i a te ia le agelu a Ieova, ma taʻu atu i ai e faapea: “Tulai ia, inā ave le tamaitiiti ma lona tinā, ma sosola i Aikupito, ma nonofo ai seia ou fai atu i a te oe; auā o le a saili Herota i le tamaitiiti ina ia fasioti.”
Sa vave loa ona sosola ese i latou e toatolu. Ma sa fetaui lelei lava, auā ua iloa e Herota ua oole o ia e le au makoi ma ua ō ese mai le atunuu. Manatua, sa tatau ona latou toe foi atu e faailoa i a te ia, ina ua latou maua Iesu. Na matuā ita Herota. O lea, i se taumafaiga ina ia fasiotia Iesu, na ia poloai atu ai e fasiotia tamaiti uma lava i Peteleema ma ona itumalo, e afua i ē ua taʻilua o latou tausaga ma ē e i lalo ifo. Sa faavae lona fuafuaina o nei tausaga i faamatalaga na ia muai maua mai le au makoi o ē na ō ane mai Sasae.
Na matautia i le vaai le fasiotia o tamaiti laiti uma! Sa osofai atu fitafita a Herota i lea fale ma lea fale. Ma pe a latou maua ai se tamaitiiti, ona latou faoesea lea o ia mai lona tinā. Tatou te lē iloa pe toafia ni pepe na latou fasiotia, ae o auega tetele ma le fetagisi faanoanoa a tinā, na faataunuuina ai se valoaga i le Tusi Paia a le perofeta a le Atua o Ieremia.
O le taimi lena, ua taunuu saogalemu ai Iosefa ma lona aiga i Aikupito, ma ua latou nonofo ai i inā. Ae i se tasi po, na toe faaali atu ai foi le agelu a Ieova i a Iosefa i se miti. Na faapea atu le agelu: “Tulai ia, inā ave le tamaitiiti ma lona tinā, ma ō atu i le nuu o Isaraelu, auā ua feoti i latou na sailia le tamaitiiti e fasioti.” O lea, i le faataunuuina o se isi valoaga a le Tusi Paia e faapea, o le a valaauina le Alo o le Atua nai Aikupito, na toe foi atu ai le aiga i lo latou nuu moni.
Atonu sa faanaunau Iosefa e faamautu i Iutaia, i le mea na latou nonofo ai i le aai o Peteleema a o leʻi sosola atu i latou i Aikupito. Peitai na ia maua tala ua avea le atalii amioleaga o Herota o Arekilao ma tupu o Iuta i lena taimi, ma sa lapataia foi o ia e Ieova i se isi miti e uiga i le lamatia ai. O lea, sa malaga atu ai Iosefa ma lona aiga i le itu i matū ma faamautu ai i le aai o Nasareta i Kalilaia. I inā i lena nuu e mamao ese mai le faauluuluga o le olaga faalelotu a Iutaia, na ola aʻe ai Iesu. Mataio 2:13-23; Ieremia 31:15; Hosea 11:1.
▪ Ina ua lē toe foi ane le au makoi, o le ā le mea matautia na faia e Herota, ae na faapefea ona puipuia Iesu?
▪ Ina ua toe foi ane mai Aikupito, aisea na lē toe faamautu ai Iosefa i Peteleema?
▪ O ā valoaga o le Tusi Paia na faataunuuina i lena vaitaimi?