Mataupu 110

Ua Faaiuina le Faiva i le Malumalu

UA AFIO atu nei Iesu mo le taimi mulimuli i le malumalu. O le mea moni, ua ia faaiuina ai lana faiva i le lautele i luga o le lalolagi seʻi vaganā ai mea na tutupu i lona faamasinoga ma lona faasalaina i le oti, lea sa toe tolu aso oo i ai. O lea, sa ia faaauau pea ona matuā taʻusalaina le au tusiupu ma Faresaio.

E faatolu lava ona ia folafola atu: “Oi talofa i a te outou o tusiupu ma Faresaio, o tagata pepelo!” Muamua na ia folafola atu le auē i a i latou ona sa latou faamamā “tua o le ipu ma le tanoa, a o totonu sa tutumu i mea na fāoa ma le amioleaga.” O lea na ia apoapoai atu ai: “Ia e muai faamamā i totonu o le ipu ma le tanoa, ina ia mamā atoa ma le tua.”

Ona sosoo ai lea ma lona fetalai atu o auē i tusiupu ma Faresaio ona o lo latou taumafai e nanā i totonu mea inosia ma le pala, i foliga fia mapolotu mai fafo. O lea na fetalai atu ai o ia: “E tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma.”

I le faaiuga, na faaalialia ai lo latou faagutugutulua i lo latou fiafia e fausia tuugamau mo le au perofeta ma teuteu i ia tuugamau ina ia tosina mai ai tagata i a latou lava galuega agalelei. Peitai, e pei ona faaalialia e Iesu, o i latou o fanau “a ē na fasiotia perofeta.” E moni, so o se tasi na te faaalialia lo latou faafiaamiotonu sa i se tulaga mataʻutia!

I le faaauau pea, na fofoga atu ai e Iesu ana upu sili ona malolosi e taʻusalaina ai. Na fetalai atu o ia: “O outou gata, o fanau a gata feai, pe faapefea ona outou sosola i le faasala i Kēna?” O Kena o le vanu sa faaaogā e lafoai i ai otaota i Ierusalema. O lea na fetalai atu ai Iesu faapea, ona o lo latou tausisi i o latou ala leaga, o le a pagātia ai tusiupu ma Faresaio i le faaumatiaga e faavavau.

E faatatau i a i latou o ē na ia aauina atu e avea ma ona sui, sa fetalai atu ai Iesu: “O isi o i latou tou te fasiotia ma faasatauroina; a o isi tou te sasaina i o outou sunako, ma tulituliloa i a te i latou i lea aai ma lea aai; ina ia oo i a te outou le toto uma o ē amiotonu ua faamaligiina i le lalolagi, e afua i le toto o Apelu le tagata amiotonu, e oo i le toto o Sakaria le atalii o Parakaio [na taʻua o Ieoiata i le 2 Nofoaiga a Tupu], na outou fasiotia i le va o le malumalu ma le fata faitaulaga. E moni, ou te fai atu i a te outou, e oo mai nei mea uma i luga o lenei tupulaga.”

Talu ai ona sa matuā aʻoaʻia e Sakaria taʻitaʻi o Isaraelu, o lea “na latou au faatasi i taupulepulega faasaga i a te ia ma fetogi i a te ia i maa i le faatonuga a le tupu i le lotoā o le malumalu o le fale o Ieova.” Ae, e pei ona sa valoia e Iesu, o le a oo le taui i a Isaraelu ona o le toto o ē amiotonu uma na faamaligiina. I le 37 tausaga mulimuli ane, i le 70 T.A., na oo le taui i a i latou ina ua faaumatia e autau a Roma Ierusalema, ma sa sili atu i le miliona tagata Iutaia na faaumatia ai.

A o manatunatu Iesu i lena tulaga mataʻutia, sa tiga o ia. Ona ia toe alaga tasi atu ai lea: “Ierusalema e, Ierusalema e, ua tele lava loʻu manao e faapotopoto i lau fanau, e pei o le moa ona ofaofatai i lana toloai i lalo o ona apaau, ae sa leʻi mafafai outou. Faauta, ua tuua lo outou fale, e faatafunaina.”

Na toe faaopoopo atu Iesu: “Tou te lē toe iloa mai aʻu, seia outou fai mai, ‘Ia manuia lē maliu mai i le suafa o Ieova.’” O lena aso, o le toe faatasi mai lea o Keriso, pe a ia afio mai i le mamalu o lona Malo, ma o le a iloa atu o ia e tagata ona o le faatuatua.

Ona maliu atu lea o Iesu i se nofoaga i se mea e mafai ai ona ia silasila atu i pusa e teu ai tupe i totonu o le malumalu ma le motu o tagata o lafo tupe i totonu. Na lafo i ai e tagata mauoa le tele o tupe. Peitai, na alu ane se fafine mativa ua oti lana tane ma lafo i ai ni tupe iti faatauvaa se lua.

Ona faapotopoto mai lea e Iesu o ona soʻo, ua fetalai atu: “E moni, ou te fai atu i a te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai.” Atonu na latou tau mānatu pe aisea na faapea ai. Ona faamatala atu lea e Iesu: “O i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa i a te ia, o ana mea uma e ola ai.” Ina ua uma ona fetalai atu i na mea, ona maliu ese lea o Iesu mai le malumalu, ma sa o le taimi mulimuli foi lea.

Ona sa maofa i le telē ma le matagofie o le malumalu, na fai atu ai ma le ofo se tasi o ona soʻo: “Le aʻoaʻo e, inā silasila ia i nei maa ua tetele lava, ma nei fale, ua tetele lava!” E moni, o maa, na taʻua e faapea e sili atu i le taʻi 35 futu [po o le 11 mita] le uumi, e sili atu i le 15 futu [po o le 5 mita] le lautetele, ma e sili atu i le 10 futu [po o le 3 mita] le maualuluga!

Na tali atu Iesu: “Ua outou iloa ea nei fale tetele? E lē toe iai se maa e toe tietie i luga o le isi maa, auā, e uma ona soloia i lalo.”

Ina ua uma ona fetalai atu o na mea, ona sopo atu lea o Iesu ma ona soʻo i le Vanu o Ketarono ma aʻeaʻe atu i le Mauga o Olive. Ma sa mafai ona latou vaavaai mai ai i inā i le malumalu e ese le matagofie. Mataio 23:25–24:3; Mareko 12:41–13:3; Luka 21:1-6; 2 Nofoaiga a Tupu 24:20-22.

▪ O le ā sa faia e Iesu i le taimi o lana asiasiga mulimuli i le malumalu?

▪ Sa faapefea ona faaalialia le faagutugutulua o tusiupu ma Faresaio?

▪ O le ā le uiga o le “faasala i Kēna”?

▪ Aisea na fetalai ai Iesu faapea sa sili mea na lafo e le fafine ua oti lana tane na i lo mea na lafo e ē mauoa?