Ua Fanau mai le Teuteu Ala
Mataupu 3
Ua Fanau mai le Teuteu Ala
UA TOEITIITI lava fanau Elisapeta. Mo le tolu masina ua tuanai, sa la nonofo ai pea ma Maria. A o lea ua oo i le taimi e faamavae ai Maria ma toe foi atu i se malaga umi i lona aiga i Nasareta. E tusa toe ono masina, ona fanau foi lea o ia.
E leʻi umi lava talu ona toe foi Maria, ae fanau loa Elisapeta. Maeu le olioli ina ua manuia le fanauga ma sa malolosi uma Elisapeta ma le pepe! Ina ua faaali atu e Elisapeta le tamaitiiti i ona tuaoi ma aiga, sa latou olioli uma faatasi ma ia.
I le aso lona valu talu ona ia fanau mai, sa peritomeina ai o ia e tusa ma le Tulafono a le Atua i a Isaraelu, pe a fanau mai se tama tane. O le mea lena na asiasi ane ai uo ma aiga. Ua latou fai atu foi e tatau ona faaigoa le tama i le igoa o lona tamā, o Sakaria. A ua fai atu Elisapeta. “E leai! e ao ona faaigoa i a te ia o Ioane.” Ia manatua, o le igoa lena na fai atu ai le agelu o Kaperielu e ao ona faaigoa ai le tama.
Peitai, sa finau atu a la uo: “E leai se tasi o lou aiga e igoa i lea igoa.” Ma i le faaaogāina o tāga, sa latou fesili atu ai i lona tamā po o le ā se igoa e manao e faaigoa ai le tama. Sa maofa tagata uma ina ua tusia e Sakaria i le maatusi na ia fai atu e aumai e faapea: “O Ioane lona igoa.”
Ona o lena mea, sa faavavega ai ona toe tautala Sakaria. Atonu o e manatua, na gūgū Sakaria ina ua lē talitonu o ia i le tala a le agelu e faapea, o le a fanau mai e Elisapeta se tama. Ma ina ua toe tautala Sakaria, sa maofa uma ē na latou tuaoi ma faapea ifo i a i latou lava: “Pe iu ina faapefea lena tama?”
Ua faatumuina nei Sakaria i le agaga paia, ma ua ia vivii atu e faapea: “Ia faafetaia Ieova le Atua o Isaraelu, ina ua asiasi mai o ia, ma togiolaina lona nuu. Ua ia faatuina foi le nifo o le olataga mo i tatou i le aiga o lana auauna o Tavita.” O le mea moni, o lenei “nifo o le olataga,” o le Alii o Iesu Keriso, lea o le a fanau mai. Na faapea atu Sakaria, e ala i a te ia lea, o le a foai mai ai e le Atua ‘i a i tatou le faaeaga, o le tuuina atu ma le loto tetele o le auaunaga paia i a te ia, i le faamaoni ma le amiotonu i o tatou olaga atoa, pe a uma ona laveaiina i tatou mai lima o o tatou fili.’
Ona vavalo mai lea o Sakaria e faatatau i lona atalii, o Ioane: “O oe foi le tama, e taʻua oe o le perofeta a le Silisili Ese, auā e te muamua atu i luma o Ieova e sauni i ona ala; e faailoa atu le olataga i lona nuu e ala i le faamagaloina o a latou agasala, ona o le alofa mutimutivale o lo tatou Atua. Ona o lenei alofa mutimutivale, o le a asiasi mai ai i a i tatou se malamalama mai lugā, e faamalamalama ai i latou o loo nonofo i le pouliuli ma le ata o le oti, ae taitaiina ai o tatou vae i le ala o le manuia.”
O le taimi lea, na taunuu ane ai Maria i lona aiga i Nasareta, ma e mautinoa e leʻi faaipoipo lava o ia. O le ā o le a tupu i a te ia pe a iloa ane ua to? Luka 1:56-80; Levitiko 12:2, 3.
▪ O le ā le matua o Ioane i a Iesu?
▪ O ā mea na tutupu ina ua valu aso le matua o Ioane?
▪ Sa uai atu faapefea le finagalo o le Atua i ona tagata?
▪ O le ā le galuega sa valoia o le a faia e Ioane?