Mataupu 104

Ua Lagonaina Faatolu le Siufofoga o le Atua

A O IAI i le malumalu, na ātu le finagalo o Iesu ona o le maliu lea na toeitiiti oo ane. O lona popolega autū, o le faapefea lea ona aafia ai le suafa o lona Tamā, o lea na ia tatalo ai: “Loʻu Tamā e, ia e tuuina atu le mamalu i lou suafa.”

Ona o lena mea, na oo mai ai se leo malosi mai le lagi, sa faalauiloa mai e faapea: “Ua ou tuuina atu le mamalu, ou te toe tuuina atu foi i ai le mamalu.”

Na atuatuvale le motu o tagata sa tutū latalata ane. Na amata ona faapea ane nisi: “Ua fetalai se agelu i a te ia.” O nisi sa faapea ane o se faititili. Ae, o le mea moni, o Ieova le Atua lea na fetalai! Ae peitai, sa lē o le taimi muamua lena na faalogoina ai le siufofoga o le Atua i le fesootai atu ma Iesu.

I le papatisoga o Iesu, i le tolu ma le ʻafa tausaga muamua atu, na faalogo ai Ioane le Papatiso i le Atua o fetalai ane e uiga i a Iesu: “O loʻu atalii pele lenā, ua ou fiafia lava i a te ia.” Ma, i se vaitaimi ina ua mavae le Paseka muamua, ina ua liua faamamaluina Iesu i o latou luma, na faalogo ai Iakopo, Ioane ma Peteru i le siufofoga o le Atua o folafola mai: “O loʻu Atalii pele lena, ou te fiafia i a te ia; ia outou faalogo i a te ia.” Ma o le taimi lona tolu ai lea i a Nisani 10, i le toe fa o aso a o leʻi maliu Iesu, na toe faalogoina ai foi e tagata le siufofoga o le Atua. Ae i lea taimi na fetalai atu ai Ieova ina ia lagona e le vao o tagata e toatele!

Ona faamatala atu lea e Iesu e faapea: “E leʻi oo mai lenei siufofoga ona o aʻu, ae ona o outou.” Na saunia ai i lea mea le faamaoniga faapea, o Iesu e moni lava o le Alo o le Atua, o le Mesia na folafolaina. Na fetalai atu atili Iesu: “O loo faamasinoina nei lenei lalolagi, e tulia nei le alii o lenei lalolagi.” O le soifuaga faamaoni o Iesu, na faamautinoa ai faapea, o Satani le Tiapolo, le alii o lenei lalolagi, ua tatau iai le “tulia,” faasalaina.

I le faasino atu i iʻuga o lona maliu na latalata ane, na fetalai atu ai Iesu e faapea: “O aʻu foi, afai e siitia aʻu ai le eleele, ou te faatosina uma mai tagata i a te aʻu.” O lona maliu sa lē o se toilalo lea, auā o lena le auala na tosina atu ai isi tagata i a te ia ina ia mafai ona latou olioli foi i le ola e faavavau.

Ae na tetee atu le motu o tagata e faapea: “Ua matou faalogo i le Tulafono, e tumau pea le Keriso e faavavau; pe faapefea foi ona e fai mai, E tatau ona siitia i luga o le Atalii o le tagata? O ai ea lenei Atalii o le tagata?”

E ui lava i faamaoniga uma, sa aofia ai ma le faalogoina o le siufofoga o le Atua lava ia, ae toatele sa lē talitonu faapea o Iesu o ia moni o le Atalii o le tagata, le Mesia na folafolaina. Peitai, e pei ona sa ia faia i le ono o masina na muamua atu i le Tausamiga o Faleapitaga, na toe fetalai ai foi Iesu e uiga i a te ia lava o “le malamalama” ma faalaeiau atu i lana au faalogologo: “Ia outou talia le malamalama, manū o i a te outou le malamalama, ina ia avea outou ma fanau a le malamalama.” Ina ua uma ona ia fetalai i nei mea, ona maliu ese lea o Iesu ma lafi mai i a i latou, e mautinoa lava sa lamatia lona soifua.

O le leai o se faatuatua o tagata Iutaia i a Iesu ua faataunuuina ai upu a Isaia e uiga i ‘le faatauasoina o mata o tagata ma le faamaaaina o o latou loto ina ia aua ai neʻi liliu i latou ma faamalōlōina.’ Na vaaia e Isaia i se faaaliga le afioaga o Ieova i le lagi, e aofia ai ma Iesu i lona mamalu sa iai i tafatafa o Ieova a o leʻi avea o ia ma tagata. Peitai, i le faataunuuina o upu na tusia e Isaia, na teteeina ai ma le faaua maaa e tagata Iutaia, faamaoniga faapea o Ia lena o lo latou Faaola na folafolaina.

I le isi itu, o le toatele na oo lava i pule (atonu o sui o le faamasinoga maualuga a Iutaia, le au Saniterini) na latou faatuatua moni i a Iesu. O Nikotemo ma Iosefa le Arimataia o nisi ia o le toalua mai nei pule. Ae o pule, i lea taimi, sa lē taulau ona latou tautino atu lo latou faatuatua, ona o le fefefe ina neʻi faateʻaeseina mai i o latou tulaga i le sunako. Pagā le tele o mea lelei na latou misia!

Sa faaauau ona fetalai atu Iesu faapea: “O lē faatuatua mai i a te aʻu, e lē faatuatua mai o ia i a te aʻu, ae i a te ia ua auina mai aʻu; O lē vaai mai foi i a te aʻu, e vaai atu o ia i a te ia ua auina mai aʻu. . . . Afai foi e faalogologo se tasi i aʻu upu, ae lē talitonu i ai, ou te le faasala i a te ia; auā ou te leʻi sau e faasala i le lalolagi, a ia ou faaolaina le lalolagi. . . . O le upu ua ou tautala atu ai, e faasala lea i a te ia i le aso gataaga.”

O le alofa o Ieova mo le lalolagi o tagata na uunaia ai o ia e auina mai Iesu ina ia faaolaina i latou uma o ē faatuatua i a te ia. O le faasaoina o tagata o le a fuaina lea pe latou te usiusitai i mea na fetalai iai Iesu e pei ona faatonu atu e le Atua. O le a faia le faamasinoga “i le aso gataaga,” i le taimi o le Pulega a Keriso i le Afe o Tausaga.

Na faaiʻu e Iesu i lona fetalai mai: “Ou te lē tautala fua na o aʻu; a o le Tamā ua auina mai aʻu, na ia tuu mai le poloaiga i a te aʻu i mea ou te fai atu ai, ma mea ou te tautala atu ai. Ua ou iloa foi o lana poloaiga o le ola e faavavau lea. O lenei, o mea ou te tautala atu ai, faapei ona fetalai mai ai le Tamā i a te aʻu, e faapea ona ou tautala atu ai.” Ioane 12:28-50; 19:38, 39; Mataio 3:17; 17:5; Isaia 6:1, 8-10.

▪ O ā taimi e tolu na faalogoina ai le siufofoga o le Atua e faatatau i a Iesu?

▪ Na faapefea ona vaaia e le perofeta o Isaia le mamalu o Iesu?

▪ O ai pule na tuu atu lo laua faatuatua i a Iesu, ae aisea na laua lē taʻutaʻu atu ai o ia i le lautele?

▪ O le ā “le aso gataaga,” ma o le ā le faavae o le a faamasinoina ai tagata i lea taimi?