Mataupu 112

Ua Latalata le Paseka Faaiu a Iesu

A O LATALATA atu le Aso Lua, Nisani 11, i lona faaiuga, na faauma ai loa e Iesu le aʻoaʻoina o le au aposetolo i le Mauga o Olive. Maeu se aso o le tele o mea na fai ai ma le faigata na iai! O lea, atonu a o foi atu i Petania e tofā ai, sa ia taʻu atu i ona aposetolo: “Ua outou iloa a mavae aso e lua ona fai ai lea o le paseka, e tuuina atu ai le Atalii o le tagata ina ia faasatauroina.”

I le aso na sosoo ai, le Aso Lulu, Nisani 12, e foliga mai sa malōlō Iesu ma ona aposetolo mo sina taimi paganoa. I le aso na muamua atu, sa ia matuā aʻoaʻia ai taʻitaʻi lotu i le lautele, ma sa ia silafia, na latou saili e fasioti i a te ia. O lea i le Aso Lulu na ia lē faaali atu ai faalauaitele i a i latou, talu ai sa lē manao o ia e faalavelave atu se mea i lona faamanatuina o le Paseka faatasi ma ona aposetolo i le afiafi po e sosoo ai.

O le taimi lea, na faapotopoto ai faitaulaga sili ma toeaina o le nuu i le maota o le ositaulaga sili o Kaiafa. Ona o le tiga i le aʻoaʻiga mamafa a Iesu i le aso na tuanai, na latou faia ai fuafuaga e puʻea o ia i se auala poto faaʻoleʻole ma fasiotia ai. Ae sa latou faapea ane: “Aua le faia i le tausamiga, ina neʻi faanunununu ai le nuu.” Sa latou fefefe i tagata, o ē na olioli ai Iesu i lo latou alofa.

A o taupulepule faalilolilo ma le leaga taʻitaʻi lotu e fasiotia Iesu, ae asiasi atu loa i a i latou se tagata. Na latou matuā ofo, o se tasi lava o aposetolo o Iesu, o Iuta le Sekara, o lē na totō ai e Satani se manatu leaga o le faalataina o lona Matai! Maeu lo latou fiafia ina ua fesili atu Iuta: “Se ā le mea tou te au mai maʻu, ou te faalataina ai o ia i a te outou?” Na latou ioe atu ma le fiafia e totogi atu i a te ia le 30 tupe siliva, o le tau o le pologa e tusa ai ma le feagaiga o le Tulafono faa-Mose. Na amata mai ai i lena taimi, ona saili e Iuta se avanoa lelei e aunoa ma le toatele o ni tagata o iai e faalata ai Iesu i a i latou.

E amata Nisani 13 i le goto o le la i le Aso Lulu. Na taunuu atu Iesu mai Ieriko i le Aso Faraile, o le aso lona ono lenei ma o le po faaiu foi lea sa nofo ai o ia i Petania. O le aso e sosoo ai, le Aso Tofi, o le a manaomia ai ona faia ni sauniuniga faaiu mo le Paseka, lea o le a amata i le goto o le la. O le aso lena e tatau ai ona fasia le tamai mamoe o le Paseka ma tunu atoa. O fea o le a latou faamanatuina ai le tausamiga, ma o ai o le a faia sauniuniga?

Sa leʻi taʻuina atu e Iesu ni faamatalaga auiliili, atonu ina ia taofia ai Iuta mai i le avatua o ni faamatalaga i ositaulaga sili faapea e mafai ona latou puʻeina Iesu i le taimi o le faamanatuga o le Paseka. Ae i lea taimi, atonu i le amataga lava o le aoauli o le Aso Tofi, na aauina atu ai e Iesu Peteru ma Ioane mai Petania, ma fetalai atu i ai: “Lua te ō e sauni le paseka mo i tatou, tatou te aai ai.”

Na la fesili atu: “O ifea e te finagalo i ai ma te saunia?”

Na faamatala atu e Iesu: “A oo oulua i totonu o le aai, tou te fetaiai ma le tagata o ave le vai omea, lua te mulimuli atu i a te ia i le fale e ulu atu ai o ia. Lua te fai atu i le matai o le aiga, ‘Ua fai mai le aʻoaʻo i a te oe, “Po o ifea le afeafe e api ai malo, ina ia matou aai ai le paseka, o aʻu ma oʻu soo?”’ Ona tusi atu ai lea e ia i le afeafe tele aupitoaluga ua uma ona teu; lua te sauni ai le paseka.”

E lē taumatea o le matai o le aiga o se soʻo o Iesu o lē atonu sa naunau atu e talia le talosaga a Iesu ina ia faaaogā lona fale mo lenei sauniga faapitoa. O lea la, ina ua taunuu atu Peteru ma Ioane i Ierusalema, na la iloa ai mea uma e pei ona muai taʻuina atu e Iesu. O lea na faamautinoa ai loa e nei tane e toalua, sa saunia le tamai mamoe ma faia uma isi faatulagaga ina ia tausia ai manaoga o le toʻa 13 o ē faamanatuina le Paseka, o Iesu ma ona aposetolo e toʻa 12. Mataio 26:1-5, 14-19; Mareko 14:1, 2, 10-16; Luka 22:1-13; Esoto 21:32.

▪ O le ā na foliga mai sa faia e Iesu i le Aso Lulu, ma aisea?

▪ O le ā le faatasiga na faia i le fale o le ositaulaga sili, ma mo le ā le fuafuaga na asiasi atu ai Iuta i taʻitaʻi lotu?

▪ O ai na aauina atu e Iesu i Ierusalema i le Aso Tofi, ma mo le ā le fuafuaga?

▪ O le ā sa maua e i laua na aauina atu, sa toe faaalia ai foi ia mana faavavega o Iesu?