Mataupu 124

Ua Tuu atu ma Taʻitaʻiina Ese

I NA ua toe taumafai Pilato o lē na ootia i le toʻafilemu ma le mamalu o Iesu ua faataugāina, ina ia tatalaina o ia, sa atili ai ona matuā feita le au ositaulaga sili. Na latou maumauai ia lē faatagaina se mea e aiā i la latou fuafuaga leaga. O lea na latou toe alalaga atu ai: “Inā faasatauro ia, faasatauro ia.”

Na tali atu Pilato: “Inā ave ia e outou i a te ia, ma ia outou faasatauroina.” (I le tuufaafeagai ma la latou uluai tuuaʻiga, atonu sa iai i tagata Iutaia le pule e faasalaoti tagata solitulafono ona o agasala matuiā i mea tau lotu.) O lea, a itiiti mai, o le faalima ai lea ona faalauiloa atu e Pilato le leai o se agasala a Iesu, i le faapea atu: “Ou te leʻi iloa se mea e sala ai o ia.”

Ina ua iloa e tagata Iutaia sa lē taulau i a latou moliaga faapolotiki ona aumaia ai ni iuga, ona toe foi atu lea i moliaga faalotu faapea, sa upuvale o ia, lea sa faia i uluai itula i le faamasinoga o Iesu i luma o le au Saniterini. Na latou faapea atu: “O i a te i matou le tulafono, ma e tusa ai ma le tulafono ua tatau ona oti o ia, auā ua fai e ia o ia ma Alo o le Atua.”

Na fou i a Pilato lena moliaga, ma na faapogaia ai lona fefe tele. I le taimi lea, na ia iloa ai o Iesu e lē o se tagata faatauvaa, e pei lava ona faaalia i le miti a lana avā, atoa ma le malosi uigaese o Iesu. Ae po o ia ea o le “Alo o le Atua”? Na iloa e Pilato o Iesu e mai i Kalilaia. Peitai, faamata sa soifua muamua o ia? I le toe avatua o ia i totonu o le maota, na fesili atu ai Pilato: “Se fea ea oe?”

Sa lē gagana Iesu. I le taimi muamua na ia taʻu atu ai i a Pilato o ia o se tupu, ae o lona Malo e lē mai i lenei lalolagi. Na leai se aogā e toe fai atu atili ai nisi faamatalaga. Ae peitai, na tiga le loto faamaualuga o Pilato ona o le musu o Iesu e tali atu, ma na ia oso atu ai ma le ita ma faapea atu i a Iesu: “E te lē gagana mai ea i a te aʻu? Po ua e lē iloa, o i a te aʻu le pule e faasatauro i a te oe, o i a te aʻu foi le pule e tatala i a te oe?”

Na tali atu ma le faaaloalo Iesu: “E leai sau pule i a te aʻu, pe ana lē tuuina mai i a te oe mai lugā.” Sa ia faasino atu i le tuuina mai e le Atua o le pule i taʻitaʻi faaletagata latou te pulea ai mataupu a le lalolagi. Na faaopoopo atu Iesu: “O le mea lea ua matuā tele ai le agasala a le tagata na ia tuuina mai aʻu i a te oe.” O le mea moni, na matuā mamafa lava le avega sa tauaveina e le ositaulaga sili o Kaiafa ma lana au lagolago ma Iuta le Sekara na i lo Pilato, ona o faiga lē tonu sa faia i a Iesu.

I le matuā maofa atili i a Iesu ma le fefe faapea atonu e iai se amataga tauatua o Iesu, na toe taumafai ai Pilato e tatalaina o ia. Ae peitai na tetee atu tagata Iutaia i a Pilato. Na toe fai atu foi la latou tuuaʻiga faapolotiki, i le faamataʻu atu faatogafiti: “Afai e te tatalaina lena tagata, e te lē alofa i a Kaisara; o sē fia fai ma tupu, e fou o ia i a Kaisara.”

E ui lava i ni mea matautia e ono tutupu mai, ae na toe avatu lava e Pilato Iesu i fafo. Na ia toe talosaga atu: “Faauta i lo outou tupu.”

“Ave ese ia, ave ese ia; ina faasatauro ia i a te ia.”

I lana toe taumafaiga mulimuli na fesili atu ai Pilato: “Ou te faasatauro ea i lo outou tupu?”

Sa lē mafai ona onosai tagata Iutaia i lalo o le pulega a Roma. O le mea moni sa latou inoino i le pulega a Roma! Peitai, sa fai atu ma le pepelo ositaulaga sili: “E leai so matou tupu, na o Kaisara.”

Ona o le fefe ina neʻi taʻuvalea lona tulaga faapolotiki ma lona talaaga, na iu ai ina lolo atu Pilato i le alaga faifai pea a tagata Iutaia. Ona ia tuuina atu lea i ai o Iesu. Ona saeia lea e fitafita le ofu talaloa violē pāuli o Iesu ae faaofu i a te ia i lona ofu tele. A o taʻitaʻiina atu Iesu ina ia faasatauroina, na tuuina atu ina ia aveina e ia lona lava satauro.

O le taimi lea pe tusa ua ta le sefulu i le taeao o le Aso Faraile, Nisani 14; atonu ua latalata i le aoauli. Na ala lava Iesu talu mai le taeao po o le Aso Tofi, ma na puapuagatia o ia i lea mea tiga ma lea mea tiga. Ma le malamalama, sa toeitiiti lava uma lona malosi ona o le mamafa o le satauro. O lea, sa faamalosia ai se tasi tagata na ui ane, o Simona le Kurene mai Aferika, ina ia amoina le satauro mo ia. A o latou agaʻi atu, sa mulimuli atu le motu o tagata e toatele, na aofia ai ma le toatele o fafine o ē na taufaitagituʻi ma taufaitagiauē ona o Iesu.

I le faliu atu i fafine, na fetalai atu ai Iesu: “Tama fafine a Ierusalema e, soia le tagi i a te aʻu, a ia outou tagi i a te outou, atoa foi ma a outou fanau. Faauta foi, e oo mai ona aso, e fai mai ai tagata, ‘Amuia fafine ua pa, ma manava e leʻi fananau, ma susu e leʻi susuina.’ . . . Auā afai e faia nei mea i le laau mata, se ā se mea e fai i le laau mago?”

Na faasino atu Iesu i le laau o le nuu o Iutaia, lea na mata pea, sa iai le sua e ola ai i totonu ona sa faatasi ai pea Iesu ma se vaega totoe na talitonu i a te ia. Ae pe a aveesea i latou na mai le nuu, o le a totoe ai na o se laau mate faaleagaga, ioe, se faalapotopotoga faalemalo ua mago. Oi, pagā se pogai mo le tagituʻi o le a iai i inā pe a faaumatia e autau a Roma, i le avea ma faaoosala a le Atua le nuu o tagata Iutaia! Ioane 19:6-17; 18:31; Luka 23:24-31; Mataio 27:31, 32; Mareko 15:20, 21.

▪ O le ā le moliaga na faia e taʻitaʻi lotu faasaga i a Iesu ina ua lē taulau ona aumaia ni iuga e a latou moliaga faapolotiki?

▪ Aisea atonu na atili mataʻu ai Pilato?

▪ O ai sa sili atu ona tauaveina le agasala mamafa ona o le mea na tupu i a Iesu?

▪ I le iuga sa uunaia faapefea e ositaulaga Pilato ina ia tuuina atu Iesu mo le faaooina i ai o le sala?

▪ O le ā na taʻu atu e Iesu i fafine o ē na fetagisi ona o ia, ma o le ā le uiga o lana fetalaiga e ala i le faasino atu i le laau “mata” lea na oo ina “mago”?