Mataupu 18

Pe Alagātatau Amioga Mamā Faaleituaiga?

O le vaega lona iva lenei o le faasologa o la tatou tusi. O loo talanoaina ai le vaaiga a le Tusi Paia e faatatau i amioga faaleituaiga ma Tuugatala i le va o tama ma teine.

1-3. E faapeī le lagona o le toatele o tagata o le lalolagi e faatatau i feusuaiga faaleituaiga a o leʻi faaipoipo?

O LE uunaiga ina ia auai i feusuaiga faaleituaiga a o leʻi faaipoipoina i aso nei o loo malosi naʻuā i le tele o nofoaga. O le mea moni, ua puʻea faamanu o ofaga le lalolagi i se “fouvalega faaleituaiga.” Ua faamatalaina mai e le Daily News a Niu Ioka e faapea: “Ua tauāloa lautele nei e mātua, kolisi ma tagata a lautele feusuaiga faaleituaiga e aunoa ma le faaipoipoina. O loo iai se ituaiga o faatagaga lē leoa o amioga lē mamā, e peiseai ua lē aogā ona liaʻieseina se talutalu fou lē mataofiofia.”

² O le toatele o tagata latou te matuā mananao i le saolotoga ina ia faia ai feusuaiga faaleituaiga ma so o se tagata lava latou te mananao ai ma so o se auala latou te filifilia. O uiga faapena ua faapogaia ai le lē mautinoa i le toatele o tagata. Ua taʻua e se teine aʻoga i se kolisi se faafitauli e masani ai na ia oo i ai i se tuugatala: “Sa ia faapea mai, Aiseā e lē faia ai? Sa ou faaalu le afa o le taimi o le tuugatala e taumafai ina ia faamatala ia te ia le mea e tāua faapitoa ai amioga mamā. Ona uma lea o lena, sa ou fesili ifo ia te aʻu lava ia, Aiseā e lē faia ai?” Faamata sa e tau manatunatu foi oe ia pe “Aiseā e lē faia ai?” Pe alagātatau moni lava amioga mamā faaleituaiga?

³ Ua taatele i talavou le talitonuga faapea, talu ai latou te mafaia faaletino ona faia feusuaiga faaleituaiga, ma talu ai ua lipotia mai faapea o ʻse mea mālie tele,’ o le mea la lea mo latou. Ae pe moni lea? Pe tatau le faia o feusuaiga faaleituaiga a o leʻi faaipoipoina? Pe fesoasoani ina ia avea ai le olaga o se mea taʻuaogāina e ola ai?

 E MAUA AI EA NI IʻUGA LELEI PO O LE LEAGA

4-7. (a) O ā nisi o iʻuga taatele e maua mai le auai i feusuaiga faaleituaiga a o leʻi faaipoipo? (e) O le ā e faaalia ai faapea o faiga lē faatuaoia tau feusuaiga faaleituaiga e lē o se amioga mamā “fou” moni? (Faamasino 19:22-25; Iuta 7) (i) Aiseā e avea ai o se mataupu matuiā le fautuaga o loo i le 1 Korinito 6:18? (Galuega 15:28, 29; 1 Tesalonia 4:3, 7, 8)

⁴ Ae faapefea le manatu o nisi faapea e aumaia e le saolotoga tau feusuaiga faaleituaiga le fiafiaga totino e sili atu, faapea o se mea ʻe mālie tele’? Sa lipotia mai e The Journal of the American Medical Association lenei faaiʻuga a se talavou o lē sa faia feusuaiga faaleituaiga ma le toatele o teine a o leʻi faaipoipoina: “Ua ou iloaina sa leʻi aumaia e lenei mea se fiafiaga ia te aʻu.” E foliga mai o teine e itiiti atu lo latou iloaina o le fiafiaga e maua mai feusuaiga a o leʻi faaipoipoina. Sa faapea mai se tasi tagata aʻoga talavou i se kolisi e faatatau i se mea faapena na tupu: “E mautinoa e leai sona aogā​—sa lē mālie i lena taimi, ma ua faapopoleina ai aʻu talu mai lena taimi.”

⁵ E masani ona taʻusaʻoina popolega faapena mo le tele o mafuaaga. I le faasino atu i se tasi o mafuaaga, sa faapea mai se ofisa tau le soifua malōlōina, ua faamataʻuina e le maʻiafi (gonorrhea) le pesia o le 50 pasene o talavou laiti o le Iunaite Setete i totonu o le na o le lima tausaga! Ma o loo faapea mai pule faafomaʻi, o loo faamaonia le lē aogā o vailaau faaonaponei i le taofia o le  tuputupu aʻe o le maʻiafi ma le sifilisi, o faamaʻi tau feusuaiga moni ia. E masani lava foi ona iloa ane e i latou uma ua afāina ai a ua tuai ona alofia o le faaleagaina tugā ma le lē masuia o o latou tino. Pe alagātatau ona lamatiaina i le ono pagatia ai i le faaleagaina tumau, atonu e oo lava ina tauaso ai pe lē toe fanau ai, e avea o se iʻuga o amioga lē mamā?

⁶ I le ma lea foi, e malosi tele le avanoa e ono maʻito ai. E faapena le faitau miliona o teine e leʻi faaipoipo. O le toatele o i latou nei e oo i ni tulaga lamatia ma popolega tau faalogona ootia o le faapaʻū tama. O isi ua faamalosia i ni faaipoipoga lē fiafia. Ae o loo fesagaʻi pea isi ma se tauiviga umi ma le lē fiafia ina ia tausia aʻe se tamaitiiti e leai se tamā po o se tinā. O lea, e faigofie ona iloa lena mea, e ui lava ina faateleina e talavou laiti le mauagofie o faiga tau aiga fuafuaina, ae lē aumaia ai le “faamaoniga” e saoloto mai ai i le maʻito.

⁷ O le mea moni, e leai se mea fou pe “faaonaponei” e uiga i amioga lē faatuaoia faaleituaiga. Ua leva ona iai mo se taimi umi lava. Sa faia ma masani e tagata o Sotoma ma Komoro toetoe lava lua afe tausaga a o lumanai le fanau mai o Iesu Keriso. Afai e te faitauina le talafaasolopito a le Emepaea Roma anamua, o le a e iloaina ai sa iloga i amioga lē faatuaoia faaleituaiga o so o se ituaiga uma ua faia i aso nei. O le mea moni, na mafua lona paʻū ona o le faiifo o amioga mamā. E moni, o se mea poto le utagia o le poloaiga a le Tusi Paia ina ia “faamamao outou ma le faitaaga.”​—1 Korinito 6:18.

PE O AMIOGA MAMĀ O SE FAAILOGA O SE VAIVAIGA?

8-11. (a) Aiseā e manaomia ai le malosi tau amio mamā i le taumafaiga ina ia aloese mai le faia o feusuaiga faaleituaiga a o leʻi faaipoipoina? (e) O le ā e faaalia ai sa leai se uunaiga lelei i le taulealea talavou o lē na aafia i se amioga lē mamā, e pei ona faamatalaina mai e le Faataoto mataupu e 7? (i) Ua faataʻitaʻia mai faapefea le mausalī o se tamaitai talavou mai Sunema i mataupu silisili saʻo?

⁸ Ae peitai, atonu e luʻia oe ina ia faia le faitaaga ma afai e te musu, atonu e faitioina oe e isi faapea o le vaivai. Ua avea le faitaaga i nisi nofoaga o se faiga ua taliaina. Ua matauina e ni fomaʻi e toalua o loo tusi i le Medical Aspects of Human Sexuality e faapea: “Ua oo i tagata talavou le faalogona ua agasala ona o le teena o le faia o feusuaiga ua maua loa i lena taimi, ma e iai tulaga ua faaalia ai e tamaitai talavou le masiasi i le nonofo taupou pea e oo i le 25 tausaga le matua.” O se faailoga ea o se vaivaiga le teena o le faia o feusuaiga faaleituaiga a o leʻi faaipoipoina? Ia, o lē fea o le a e fai mai e manaomia tele ai le malosi​—o le lolo atu i faalogona tau feusuaiga faaleituaiga po o le taofiofia?

⁹ O le mea mautinoa, so o se tagata e faavaivai e mafai ona lolo atu i le uunaiga faaleituaiga. Ae manaomia ai lava se “tama tane” moni  (po o se “tamaitai” moni) ina ia puleaina lea uunaiga seia oo ina ia maua se paaga faaipoipo. Ae manaomia atili atu ai le malosi i le taimi nei ona ua agaʻi atu i le isi auala gasologa o mea faalekelope, auā o lona uiga o loo tetee faasaga atu i le mea o loo tafe mai ai le āu.

¹⁰ Ua aumaia e le tusi o le Tusi Paia o Faataoto se tala o loo faataʻitaʻia ai lea manatu. O loo faamatalaina mai ai le auala na savalivali atu ai i le auala tele se taulealea talavou mai le faapotopotoga ʻo ē leai ni mafaufau,’ e leai ni uunaiga lelei mai loto, i le mea sa faalatalata ane i ai se fafine talitane. Sa ia lolo atu i le malosi o lona faatauanau faatogafiti ma “mulimuli loa o ia ia te ia, e pei o le povi ua alu a fasia; e pei o le vale ua alu i le aoaiga o noanoaga [po o le noatia i ni filifili].” (Faataoto 7:6-23) Sa lē iai ia te ia le malosi tau amio mamā e tetee atu ai.

¹¹ Peitai, i se mataupu muamua atu o lenei tusi na tatou faitau ai e uiga i le tamaitai talavou lalelei mai Sunema, o lē na teena faatosinaga uma na mafai ona ofoina atu i ai e le Tupu mauoloa o Solomona, sa sili ia te ia le tumau i le faamaoni i le leoleo mamoe talavou sa ia faamoemoe e faaipoipo i ai. Ioe, na i lo le avea e pei o se “faitotoa” e faigofie ona tatala, sa ia faamaonia i ona tuagane matutua faapea, sa ia mausalī e pei o se “pa” i lona lotomau ina ia tausia lona tulaga taupou mo le tane sa ia faatalitali i ai.​—Pese a Solomona 8:8-10.

LE POGAI E ALAGĀTATAU AI AMIOGA MAMĀ FAALEITUAIGA

12-14. (a) Aiseā e alagātatau ai ona ōgatasi ma tulafono a le Atua e faatatau i feusuaiga faaleituaiga? (e) O le ā o loo fai mai ai le Eperu 13:4 ma le 1 Korinito 6:9, 10 e faatatau i le mea o loo taofia mai e le lumanai mo ē faitaaga? O le ā le uiga o le faitaaga?

¹² O le mafuaaga autū lava e alagātatau ai amioga mamā faaleituaiga, ona o le auala lea na faataatiaina e Lē na te silafia mea e tele e uiga i le fiafiaga faaletagata: O Ieova le Atua. Seʻi mafaufau i ai. Ua faia ma le alofa e Ieova le Atua sauniuniga mo le tuuina atu o le ola faaletagata e auala i feusuaiga faaleituaiga, ma o se mea lenei e matagofie tele ma paia. Ua tatou mauaina uma lava ona aogā, ona o loo tatou feola nei. Afai tatou te taliaina ona aogā, pe lē tuua ai e lenei mea se tiute tauave i o tatou luga ina ia taliaina tulafono a le Atua e faatatau i le faagasologa o le gaoioiga atoa?  E moni, ua ia Ieova le Atua le aiā i le avea ai ma o tatou Foai Ola, ina ia faataatia tulafono e faatatau i amio e tusa ai ma le faaaogāina o o tatou totoga faafanau tama faatasi ai ma le malosiaga e tuuina atu ai le ola.

¹³ Ua taʻu mai e le Atua ia i tatou e auala mai le aposetolo o Paulo faapea: “Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.” (Eperu 13:4) O le faitaaga e lē gata e aofia ai feusuaiga faaleituaiga lē faatapulaaina ma so o se tasi​—ae aofia ai foi ma feusuaiga faaleituaiga a o leʻi faaipoipoina, e pei o le va o tagata o ē ua faamau ae leʻi oo ina faaipoipo.

¹⁴ E matuā manino lava le Afioga a le Atua i le taʻusalaina o le faitaaga ma isi amioga lē faatuaoia. O loo faapea mai o tagata e faia ma masani ia mea o le a leai sa latou vaega i le malo o le Atua. O loo faapea mai le Tusi Paia: “Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.”—1 Korinito 6:9, 10.

15-19. (a) Aiseā e tatau moni ai ona tatou inoino i amioga lē mamā faaleituaiga? (Salamo 97:10) (e) O le ā e mafai ona fesoasoani ia i tatou ina ia faatupuina aʻe ai sea inoino e tatau ai?

¹⁵ O lenei mautinoa o le tulafono a le Atua e mo lo tatou lelei moni lava. E mafai ona malolosi tele uunaiga faaleituaiga, ma e oo mai taimi i le olaga o le toatele o tagata o le a faigofie ai ona lolo atu i lalo o le malosi o faaosoosoga.  Ana fai e vaivai pe lē manino tulafono a le Atua e uiga i le mataupu, e mautinoa le lē fesoasoani tele ia i tatou i na taimi. Ae ona e matuā manino lelei ma malosi, o lea e fesoasoani ai ia i tatou ina ia maua pea le mafaufau saʻo, e faamalosia ai lo tatou lototele, ma le mea e sili ona tāua, e fesoasoani ai ia i tatou ina ia iloa inoino i le auala sese. Pe e te inoino moni lava i le auala o amioga lē mamā faaleituaiga? Aiseā e tatau ai ia te oe?

¹⁶ Afai e foliga mai e faatosina lena auala i nisi o taimi, fesili ifo ia te oe lava ia: ʻPe o le a ou manao ia i latou o loʻu lava aiga ina ia auai ai, oʻu mātua po o oʻu tuagane, uso ma tuafafine? Pe o le a ou manao ia i latou ina ia iai ni a latou fanau e leai ni tamā po o ni tinā ua faaipoipoina faaletulafono? Pe o le a faateleina e lenei mea loʻu alofa ma le faaaloalo mo i latou?’ Afai e leai, pe lē tatau ai la ona inoino i lena auala? E mautinoa lava e te lē manao ina ia avea oe ma solo fafano mo tagata a lautele, lea e solo ai lima o so o se tane po o so o se fafine e auala i amioga lē mamā.

¹⁷ Ae faapefea tamaiti na fananau mai i lena auala lē mamā? Faapea o oe, pe afai o se teine, na fanauina mai se tamaitiiti faapena​—o ai o le a na tausia o ia? O lou tinā ea ma lou tamā? O oe lava ia? O le a faapefea ona e faia? Ma e faapeī le faalogona o le tamaitiiti pe a tuputupu aʻe ma iloa le auala na afuafua ai? Pe afai foi ua e musu e tauave le tiute tauave ma tuu atu le tamaitiiti ina ia tausi e se isi tagata, e faapeī faalogona o isi tagata e uiga ia te oe?  E faapeī lou faalogona ia te oe lava ia? Atonu e te taumafai ina ia nanā le fanau mai o le tamaitiiti, ona aveesea lea o le tamaitiiti ia aua neʻi iloa e ala i le tuuina atu e tausia e se isi tagata ma faapea ona taumafai ai ina ia solaese mai le faalumaina ma tiute tauave. Ae lē taitai ona mafai ona e sola ese mai ia te oe lava ia, a ea?

¹⁸ Afai o oe o se tama tane, na e fanauina se tamaitiiti ae leʻi faaipoipo, pe o le a toʻafilemu lou loto fuatiaifo? Seʻi mafaufau i faafitauli uma ma le faalumaina ua aumaia i le tinā faapea foi ma lau tamaitiiti. E mautinoa lava o se mea lena e tatau ona aloese ai.

¹⁹ O le mea moni, o le ā se lelei e maua mai le auala o amioga lē mamā faaleituaiga? Aiseā ea ua tele naunau ai mea lē moomia ua fesootai atu i ai, e aofia ai faamaʻi afi e faamaʻia ai e mafua ona o feusuaiga, faapaʻū tama, o misa ona o le fuā ma e oo lava i fasiotigā tagata? Aiseā e masani ai ona maualuga talagā faaipoipoiga i atunuu o le lalolagi e faatagaina ai le “saolotoga” tele faaleituaiga? Pe o taʻu mai ai e talagā faaipoipoga le manuia po o se faamaoniga o le lē taulau? O se faailoga ea o le fiafiaga moni po o le lē fiafia ma le lē faamalieina?

20, 21. E mafai faapefea i le aloese mai amioga lē mamā faaleituaiga ona faaleleia atili ai ou faamoemoega mo se faaipoipoga manuia?

²⁰ I le isi itu, e alagātatau amioga mamā faaleituaiga ona o i latou o ē tausi mau i ai, e sili mamao atu ona foliga mai e maua se faaipoipoga manuia. Ua mafua lea ona ua latou tausia le faaipoipoga i se tulaga maualuga, i le faaaloalo i le faatulagaga a le Atua, ma faaaloalo i a latou paaga o le a faaipoipo i ai i le lumanai, ma la latou aiā tutusa ina ia mauaina se paaga mamā i le taimi o le faaipoipoga.

²¹ O le mea moni, o le tele lava o lou faaeteete ina ia aloese mai le amio lē faatuaoia po o le faaaogāina o le saolotoga i le taimi o evaga ma vaitaimi o le faamau, o le tele foi lena e foliga mai ai lou manuia i lau faaipoipoga. O le a leai la ni au faitioga masalosalo faapena foi i lau paaga e uiga i le moni o le alofa o le isi ona o masalosaloga faapea o feusuaiga faaleituaiga sa avea ma uunaiga atoa o le faaipoipoga. Ae ui i na mea uma, o le faaipoipoga,  e lē na o se faatasiga o ni tino e lua​—o se faatasiga o ni tagata e toalua. Ma e tatau ona iai se manatu maualuga tutusa faapea ma le alofa mo le tagata pe afai e tatau i le faaipoipoga ona aumaia ai le fiafiaga tumau.

FAIA SE FILIFILIGA SAʻO

22-24. (a) O le ā se lesona e fesoasoani ai e mafai e se tamaitai talavou ona aʻoaʻoina mai le tala faamaumau a le Tusi Paia e faatatau ia Amanono ma Tamara? (e) O le ā e faaalia ai faapea o le faalogona tau feusuaiga faaleituaiga na faaalia e le avā a Potifara e lē o se alofa e tumau?

²² O le alofa e faavae atoa lava i faalogona tau feusuaiga faaleituaiga, e lē o se alofa e tumau. O se alofa e manatu faapito ma matapeapea. Ua faataʻitaʻia lelei mai lena ituaiga o alofa i le Tusi Paia e le mea na tupu i se tasi o atalii o Tavita, ua igoa ia Amanono. Sa ia “manao” i lona afa tuafafine lalelei o Tamara. E auala la i le faatogafitia, na ia faamalosia ai o ia ina ia faia ni feusuaiga ma ia. Ona ā lea ina ua uma lena? Ua taʻu mai e le tala faamaumau ia i tatou: “Ona matuā ʻinoʻino tele lava lea o Amanono ia te ia, o lea ua sili lava lona ʻinoʻino ia te ia i lona luai manao.” Na ia tulia o ia i fafo i le auala tele. (2 Samuelu 13:1-19) O lea la, afai o oe o se tamaitai talavou, pe tatau ona e manatu faavalevalea faapea, ona o loo faaali atu e se tama le faanaunauga faaleituaiga ia te oe ma manao ia te oe ina ia lua faia ni feusuaiga faaleituaiga ma ia, o lona uiga ai e alofa faamaoni o ia ia te oe? E mafai ona avea o ia e pei tonu lava o Amanono.

²³ Ua taʻu mai e le Tusi Paia ia i tatou faapea na faaalia foi e le avā a le alii ofisa Aikupito o Potifara lea lava ituaiga o manao ia Iosefa talavou, o lē sa auauna i lo la maota. Ina ua ia [Iosefa] teena ana taumafaiga uma ina faatosina o ia, ona ia [avā a Potifara] faaali loa lea o lona tagata moni. Sa pepelo leaga lava o ia i lana tane e uiga ia Iosefa, na faapogaia ai lona faafalepuipuiina ma le lē tonu.​—Kenese 39:7-20.

²⁴ Ioe, o le mea ua taʻua o le “saolotoga” faaleituaiga ua suia ai le mea e tatau ona faafiafiaina ai ma mamā e avea ma mea taugofie ma le inosia.  O lea, o lē fea e te manao i ai​—o se taimi puupuu o fiafiaga tau feusuaiga faaleituaiga faatasi ai ma lamatiaga uma ma faafitauli o loo aafia ai, po o le faamalieina ona o le maua o se loto fuatiaifo mamā i luma o le Atua ma tagata uma, faatasi ai ma le faaaloalogia o lou lava tagata, mai lea aso i lea aso?

25, 26. O ā mea o le a fesoasoani ia i tatou ina ia aloese ai mai le aafia i amioga lē mamā faaleituaiga? (Efeso 5:3, 4; Filipi 4:8)

²⁵ Afai e te manao ina ia tumau pea ona saoloto mai amioga lē mamā, ia tumau pea la ona saoloto mai mea e taʻitaʻiina atu i ai: o talanoaga e masani ona faia faatatau i le isi ituaiga, faapea foi ma le faitau po o le matamata i ata e na o le tasi le faamoemoe​—ina ia faagaeeina ai faalogona tau feusuaiga faaleituaiga. Ia faatumuina pea lou mafaufau, ou mata ma lou laulaufaiva i mea mamā, mea mautinoa, ia galue agaʻi i sini taʻuaogāina e maua mai ai aogā tumau ma lē tuua ai i le faalumaina po o le loto tiga.

²⁶ Ae sili ai i na mea uma, ia faamalosia lou poto ma le talisapaia e uiga i Lē na Foafoaina oe ma le tonu ma le atamai o ona ala. Vaai atu ia te ia i le tatalo ma faataulai lou loto i mea na te folafolaina mai ia i latou o ē auauna ia te ia. E mafai ona e taofi mau i le auala o amioga mamā faaleituaiga pe afai e te manao moni i ai, auā o le a aumaia e Ieova le Atua ma lona Alo ia te oe le malosi e te manaomia ina ia faia ai faapea.

[Fesili mo le Suʻesuʻega]