Mataupu 3

Tuputupu aʻe e Avea ma Taulealea

O le vaega e 2 lenei o la tatou faasologa, lea e talanoaina ai suiga e oo i ai tama a o latou tuputupu aʻe e avea ma taulelea ma suiga na e oo i ai teine a o latou tuputupu aʻe e avea ma tamaitai

1-6. O ā nisi o mea moni ofoofogia e faatatau i lo tatou tuputupu aʻe seia oo i le taimi e fanau mai ai? E iai ea se tasi o lē e ao ona mauaina le faamalo ona o nei mea uma? (Salamo 139:13-18)

E MAFAI ona tatou mauaina aogā i le iloiloina pe na faapefea ona iai o tatou amataga o ni tagata taitoatasi. Seʻi tau lava ina manatu e uiga i ai: E leʻi tele naʻuā ni tausaga ua mavae talu ona avea oe o se fuā sela se tasi ua afuafua e itiiti ifo na i lo le piliota o loo i le faaiʻuga o lenei fuaiupu. Mai lena amataga itiiti, na amata ai ona e tuputupu aʻe i totonu o le toala fanau o lou tinā. Pe a mavae sina taimi ona faatoʻā atoatoa ai lea o lou tino faatasi ma se faiʻai e mafaufau ai, o mata e vaai ai, o taliga e faalogo ai, atoa ma le tele o isi totoga ofoofogia. Na faapefea ona iai lenei tuputupu aʻe iloga?

² Sa leʻi tusia e ou mātua ni ata o gaoioiga ina ia maua mai ai oe. Na i lo lea, na faia uma lava lenei i totonu o le fuā sela ua afuafua na foafoaina e ala i le faatasia o le sela fanautama (sperm cell) mai lou tamā ma le fuā sela (egg cell) i totonu o le toala fanau o lou tinā. I ni nai minute, ua tusia ai loa le ata i totonu o lena sela itiiti mo le tagata fou atoa lava lea na iʻu ane ai, o oe!

³ O faamatalaga uma lava na manaomia ina ia foafoaina ai oe o loo maua uma i le DNA * o lena sela itiiti ua afuafua. O le DNA o le mea matuā manaomia e genes (mea ninii e pulea foliga tuufaasolo) e faitau tai sefuluafe, ma ua soosoofaatasia genes nei i ni seti e luasefulutolu o chromosomes.  E tele naunau faamatalaga ua faotuʻi i totonu o sela taitasi, ana fai e tusia i le gagana faaletagata, o le a manaomia ai se potu atoa ua tumu i ni tusi. Peitai, atonu o le mea e sili atu ona ofoofogia, o le mea moni faapea, o nei faamatalaga uma auiliili ua faasolo atu i sela fou taitasi o le tino. O lea, ua iai i sela taitasi faamatalaga tutusa uma na aofia i le fuā sela na afuafua mai ai i le amataga!

⁴ Peitai, atonu e te fesili faapea: E mafai faapefea e le DNA ona faaaogā na o faamatalaga e manao i ai, ma i le na o le taimi e manaomia ai, mo le fausiaina o vaega eseese e tele o itutino o se tagata? Mo se faaaʻoaʻoga, e mafai faapefea ona la fili mai na o faatonuga ua manaomia ina ia fausia aʻe ai le mata? Ma pe afai ua fausia le mata, ona faapefea lea ona taofia faamatalaga uma mo le fausiaina o ou taliga, fatugaʻo, ate, ma faapena ai lava?

⁵ O se mea lilo. E leʻi iloaina e tagata. O le fuafuaga a Lē Sili na Foafoaina mea! Ona o mea na iloa e se tasi tusitala o le Tusi Paia e uiga i le tino faaletagata, o lea na ia faapea atu ai i le Atua: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea.” (Salamo 139:14) O faapena ea lou lagona?

⁶ I le na o le iva lava o masina, o le fuā sela na afuafua e tasi lea na e fanau mai ai ua avea nei o se pepe ua tuputupu aʻe atoatoa, o se faamaopoopoga lavelave tele ma le ofoofogia o nisi o sela e faitau piliona. O le a lē taitai ona toe vave faapena lou tupu aʻe! Ae pe ā ma le sefulutolu po o le sefulufa tausaga pe a mavae lou fanau mai, ona amata ai lea o se isi oso vave aʻe o lou tupu. I lea taimi faapitoa ua amata ai ona e sui mai se tamaitiiti i le avea ma se taulealea. * O le vaitaimi atoa lava o lea suiga, ua taʻua o le talavou (adolescence), e tumau mo ni nai tausaga. E uma pe a e aulia taimi o lou matua faaletino, e masani lava i le va o le luasefulu ma le luasefulutolu tausaga. O lenei vaitaimi e lē o se taimi e sili ona faigofie i lou olaga, peitai e matuā tāua tele lava. O se faamaoniga faavae lea mo lou tuputupu aʻe i le lumanai.

 SUIGA I LE AMATAGA O LE OLAGA TALAVOU

7-12. (a) O ā suiga e tutupu i se tama i le vaitaimi o le amataga o le olaga talavou? O iai ea so o se mafuaaga e popole ai e uiga i nei suiga? (e) E mafai faapefea ona iloa e se taulealea talavou ua tuputupu aʻe ona totoga faaleituaiga ina ia mafai ai ona ia faatamāina ni fanau?

⁷ O le vaitaimi ua taʻua o le amataga o le olaga talavou e aofia ai le vaitaimi amata o le talavou (adolescence). E faasino faapitoa lava i le tausaga e aliaʻi mai ai āuga o le matua faaleituaiga. Ua taatele lava ina faamautuina le tausaga lenei i le sefulufa tausaga mo tama ae sefululua mo teine, peitai e tele lava se eseesega mai le mea ua masani ai. Atonu ua e ulu atu i le amataga o le olaga talavou i le sefulutasi po o le sefululua, pe atonu foi ua e sefululima po o le sefuluono ae leʻi amata lava ona e matua faaleituaiga. Peitai, e lē o se mea e lē masani ai le vave po o le tuai foi ona matua, e leai la se pogai e atugalu ai. O ā nisi o faafitauli e mafai ona e faatalitalia i le vaitaimi o le amataga o le olaga talavou?

⁸ O se tasi o mea, atonu o le a e tofo i nisi o tulaga faavasivasi ma le lē fetaui o gaoioiga. Ua mafua lenei mea ona ua amata ona uumi atu ou ponaivi ma e tatau i ou musele ona fālō atu ai faatasi ma ponaivi. I lenei faatelēina o le tino e foliga mai ai ua tutupu vave nisi vaega o le tino, a o isi atonu e tutupu gese.  Ae peitai, so o se gaoioiga faavasivasi lava ua iai, o le a toe teʻaese. E lē o se mafuaaga lea e popole tele ai, e ui lava ina mautinoa e aogā tele faaeteetega faaopoopo, auā e ono mafai ona laveaʻiina ai oe mai se mea e faaono lamatia ai e ala i se faalavelave faafuaseʻi.

⁹ E aofia ai i vaega o le tino ua fālōina o afuafu ia e lua e mafua mai ai le leo (vocal cords). O le uumi teisi atu o ia afuafu e faaʻoʻoloina ai le leo. Peitai, i le vaitaimi o le faagasologa o le faauumiina o ia afuafu, atonu e masani ona “taʻe” ai lou leo, e faafuaseʻi lava ona oo i se leo ii ae e te leʻi faatalitalia e faapena. O lea foi la mea, o se vaega o “tiga o le tuputupu aʻe” o le talavou (adolescence). O lea la, pe a tupu mai ma toē ai isi, tau lava ina outou taliē faatasi ma i latou ma o le a vave ona teʻaese atu ai so o se faalogona maasiasi e tupu mai.

¹⁰ O le aʻa autū o nei suiga o le tino o ou puna (glands), ia e aofia ai le thyroid, adrenals, ma gonads (o punā faaleituaiga). O ia puna e saunia mai ai isi suiga. O se tasi o ia suiga o le tutupu aʻe lea o fulufulu faataamilo i totoga fanautama, e faapena foi i lalo o ou aoao ma lou fatafata. O le tele o ia fulufulu e eseese lava i lea tagata ma lea tagata ma e lē o se faailoga lea i so o se tulaga lava o le, po o le ā le tele o le “faatamatane” ua e oo i ai. Ua amata foi ona tutupu aʻe fulufulu o le ʻava. E ui ina ua na o sina ʻava manifinifi, ae ua latalata nei ona e feagai ma le seleina o lau ʻava.

¹¹ Atonu o le suiga e sili ona masani ai e avea ma pogai e faataluā i tama o loo tutupu aʻe e avea ma taulealea, e aafia ai totoga faafanautama, o totoga sa ia. I le vaitaimi o le amataga o le olaga talavou, ua lē gata ina atoatoa lo latou lapopoa ae ua amata foi ona galulue ma ua ola. O loo faasino le Tusi Paia, i le Levitiko 15:16, 17, i le ʻalu o le sua o le tino (ola).’ Afai ua lē taulau i ou mātua ona talanoaina muamua faatasi ma oe lenei mataupu, e lē taumate la o le uluai taimi lava e alu ai lea sua o le ola, atonu o se mea ua tupu e te atuatuvale ai. O le ā le mafuaaga o le alu o lea sua o le ola?

 ¹² Pe a oo ina lava lou tuputupu aʻe ina ia mafai ai ona faatamāina ni fanau, ona amata lea e ou totoga faaleituaiga ona faamatuu mai le sua e taʻua o le sua o le ola. O se sua e totoo atu i lo le suavai, ma e ui lava ina e lē tele, ae faitau miliona sela fanautama ninii o loo iai. So o se tasi o nei sela e mafai ona faaafuafuaina ai se fuā sela o se fafine ma faatupuina mai ai se pepe. I lea taimi ma lea taimi, o le a faateʻaese mai e lou tino lea sua o le ola. E masani lava ona alu le sua lea a o e moe ma o loo faia sau miti.

LE FUAFUAGA O LE FEUSUAIGA FAALEITUAIGA

13-15. (a) Ua saunia e le Atua feusuaiga faaleituaiga mo le ā le fuafuaga? Aiseā na ia faataatitiaina ai ni tulafono ina ia puleaina ai? (Eperu 13:4) (e) O fea e sili atu ona foliga mai, o le mea sili ona lelei lea ina ia mauaina ai faamatalaga maufaatuatuaina e faatatau i feusuaiga faaleituaiga? (Faataoto 6:20)

¹³ Na saunia e Lē na Foafoaina i tatou le feusuaiga faaleituaiga o se auala mo se tane e faaalia ai lona alofa naunautai i se fafine ma faatamāina ai a la fanau. Peitai, na faataatia e le Atua tulafono e tusa ai ma feusuaiga faaleituaiga, o loo faamalamalamaina mai ai e faapea, e na o se tane ma se fafine o ē ua faaipoipo le tasi i le isi e tatau ona faia feusuaiga faaleituaiga. Ua ala ona faapea auā na finagalo le Atua faapea o pepe uma lava e fananau mai i le lalolagi e tatau ona iai se tamā ma se tina o ē tauaveina le avega tauave atoa mo le tausia o lena tamaitiiti. O le mea lea, e sese ai i le silafaga a le Atua le auai o tagata e leʻi faaipoipoina i feusuaiga faaleituaiga.

¹⁴ I le isi itu, o feusuaiga faaleituaiga mo tagata o ē ua faaipoipoina, o se auala matagofie lea mo i laua ina ia faaalia ai le  alofa o le tasi i le isi. E taoto faapipii atu le tane i lana avā ina ia fetaui lelei lona totoga sa tau tane i totonu o le ala fanau o lana avā. E mafai e lenei mea ona aumaia ai ia i laua taitoatasi le fiafiaga sili. I le faia faapea, e alu ese mai sela faafanautama a le tane mai lona tino e auala atu i lona totoga sa tau tane agaʻi tonu lava i totonu o le ala fanau o lana avā. E ō atu nei sela faaleituaiga e ui atu i le ala fanau, ma afai o loo iai i inā i totonu o le avā se fuā sela ua matua, ona mafai lea e se sela faafanautama o le tane ona faatasia ma le fuā sela lea o le avā, ma amata ai loa e le sela ua afuafua ona tuputupu aʻe e avea ma pepe. Ua e iloa la, na faia e le Atua totoga sa faaleituaiga mo se fuafuaga paia, o le tuuina atu lea o le ola. O le pogai lena e tatau ai ona faaaogāina ia totoga sa e tusa ma tulafono a le Atua.

¹⁵ O le auala sili ona lelei e maua mai ai tali mo au fesili e uiga i le tuputupu aʻe faaleituaiga, o le fesili lea i ou mātua, ae maise lava lou tamā. Ua uma ona oo lou tamā i mea uma lava ua e oo i ai atoa ma isi mea e tele. I le ma lea, atonu o le a aveina atu e isi talavou ia te oe ni faamatalaga e lē moni atoatoa​—e itiiti ni mea moni ae tele i tala lē saʻo, lē faavaea​—ae tatau ona mafai e lou tamā ona avatu ia te oe faamatalaga lelei o le a fesoasoani ia te oe ma maua ai iʻuga aogā mo lou fiafiaga. Afai e lē o iai lou tamā i se tulaga e avatu ai ia te oe faamatalaga po o fautuaga ua faavae i le Afioga a le Atua, o le a aogā tele mo oe le iloaina o mea ua fai mai ai le Afioga a le Atua. O le a e iloaina o le a fiafia lava toeaina i le faapotopotoga o Molimau a Ieova e fesoasoani atu ia te oe.

FAAMAONIA E OE LAVA LOU MAUFAATUATUAINA

16-18. (a) I ā auala ua faalaeiauina ai oe e ou mātua ina ia faatinoina sina tutoatasi? E mafai faapefea e mea e te faia i na faaeaga ona aafia ai ou avanoa i le lumanai? (e) Aiseā e aufaatasi atu ai le tele o taulelea talavou i “keni”? O le ā atonu e taʻitaʻiina atu i ai e lenei mea? (1 Korinito 15:33)

¹⁶ A o e latalata atu i le avea ma taulealea, o se mea faalenatura mo oe le lagonaina o se faanaunauga mo lou lava tagata toatasi​—le faalogona faapea o oe o se tagata e tu maʻoti. O se mea faalenatura foi le iai ia te oe o se faanaunauga mo sina tutoatasi. Atonu o le a amata saunia oe e ou mātua mo lea taimi pe a oo ina mafai ai ona e tutoatasi. Faapefea?

 ¹⁷ E aunoa ma se masalosalo, e ala i le tuuina atu faasolosolo malie o tiute tauave e sili atu ma le faaeaga o le auai i le faia o nisi o faaiʻuga e uiga i mea o le a e faia. Atonu o le a la valaaulia oe ina ia faaali atu sou manatu e faatatau i nisi o mataupu o le a e suesueina i le aʻoga pe atonu foi o le a faatagaina oe ina ia galue i se galuega faavaitaimi. Atonu o le a faatagaina oe ina ia e faia au lava faatauga o nisi o au mea totino. Peitai, po o le ā lava le mea e iloa e ou mātua e fetaui ona fai e tusa ai ma lea itu, ae o le a tuu atu loa ia te oe e faaalia mai faapea ua ia te oe le maufaatuatuaina. Afai o le a e amio faatamaitiiti pe maua foi i le “ulu fefete [mimitavale],” atonu la o le a la faaitiitia ou faaega seia oo ina e faaalia e oe lava ua e faatama matua.

¹⁸ O lenei faanaunauga ia sili atu lou lava tagata toatasi ma sina tutoatasi e ō mai faatasi ma isi faanaunauga faalenatura. O le a e lagona se manaoga ina ia talisapaia oe e isi mo le ituaiga o tagata ua e iai ma mea e mafai ona e faia. Ua saili nisi talavou ina ia faamalieina o latou faanaunauga mo o latou lava tagata taitoatasi ma ʻse lagona o le sootaga atu i ai,’ e ala i le aufaatasi atu po o le amataina o ni “keni.” Peitai, o keni faapena e masani ona fai a latou lava tulafono tau amio, ma ua faaalia e mea moni faapea, o lenei mea e masani lava ona toetoe taʻitaʻiina ai i le faia o mea sese, i nisi taimi e oo atu ai lava i solitulafono matuiā. E lē taumate e sili atu i so o se isi lava vala e tasi, o faigauō leaga o le aʻa lava lea o le faafitauli pe a tutupu faalavelave i taulelea talavou.

19, 20. Aiseā e tāua ai se faiā lelei ma ou mātua? O le ā e faaono mafai ona faaleagaina ai? (Faataoto 23:24, 25)

¹⁹ I lenei vaitaimi o le olaga ua amata ai ona e tau iloa ou foliga mai faaletino i le avea ma se taulealea ua matua. Peitai, ua tatau foi ona amata ona e manatunatu atili ai pea pe o le a faapeī oe i totonu, le mea ua taʻua e le Tusi Paia “o le tagata lilo o le loto.” (1 Peteru 3:4) O lenei laasaga o lou olaga e lē o le taimi lea e faatagaina ai lou vavae ese mai ou mātua ma le aiga atoa e ala i se faanaunauga  mo le faateleina o le tutoatasi. O suiga o loo e oo nei i ai i le vaitaimi o le amataga o le olaga talavou, atoa ai ma uunaiga fou ua e lagonaina ma e tatau ona e iloa ona puleaina, o le mea moni lava, e faateteleina ai lou manaomia o lo la alofa ma a la taaʻiga mautū.

²⁰ O lea, na i lo le taumamao ese mai ma ou mātua ma faataga ai se va ina ia tuputupu aʻe, ia e pipii atu ia i laua ma aʻoaʻoina mea uma lava e te mafaia mai ia i laua, a o e taulalata atu nei i le avea ma tagata matua. O le a lē taitai ona e toe faanoanoa ai i lenei mea. Ma o le a e aumaia ai foi ia i laua le fiafiaga moni lava, e faamitamitaina ai i laua i le avea o oe o sa la tama.

[Faamatalaga pito i lalo]

[Fesili mo le Suʻesuʻega]

[Ata i le itulau 19]

I le na o le iva masina ua oo ai ina avea le sela e tasi o se pepe