Faapotopotoga ua Faamaopoopoina mo le Talaʻia o le Malo o le Atua

A o iai Iesu Keriso i le lalolagi, sa ia talaʻia le Malo o le Atua, i le femaliuai mai lea nuu i lea nuu, ma i lea aai i lea aai. Sa ia toleniina foi ma aauina atu ona soʻo ina ia faia le galuega lava lea e tasi. A o leʻi afio aʻe i le lagi, sa ia poloaiina ona soʻo ina ia fai tagata o atunuu uma ma soʻo. Mai lava i lona tau amatamataga, na faamaopoopoina ai le faapotopotoga Kerisiano amata mo le talaʻiga o le tala lelei. Po o fea lava sa agaʻi atu i ai soʻo, e maua atu ai lava i latou o loo talaʻia le Malo o le Atua.​—Mataio 4:17, 23; 10:1-16; 28:19, 20; Luka 4:43, 44; 8:1; 10:1-9; Galuega 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.

I le valoaga a Iesu e uiga i le faaiʻuga o le faiga o mea, na ia taʻua ai: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” O lenei talaʻiga o se matafaioi muamua lava lea a le faapotopotoga Kerisiano i aso nei.​—Mataio 24:14; Mareko 13:10.

I le lalolagi aoao, ua faamaopoopoina ai faapotopotoga uma o Molimau a Ieova, ina ia galueaiina maeʻaeʻa lo latou vaipanoa i se auala maopoopo i le talaʻiga o le tala lelei o le Malo o le Atua. Ina ia faia i se auala solosolo lelei, ua tofia atu ai e le ofisa o le lala o le Sosaiete o le Olo Matamata i atunuu taitasi, se oganuu mo faapotopotoga taitasi mo le molimau atu. E vaevaeina e le faapotopotoga le oganuu ua tofia mai i ni vaega laiti, ona tofia lea o na vaega ia i latou o le a fai ma o latou tiute tauave le tagai i ai ua asia tagata.​—1 Korinito 14:33, 40.

E masani ona faafesootaia e Molimau tagata e ala i le ō atu i lea fale i lea fale. I a latou sauniga a le faapotopotoga, ua toleniina ai Molimau a Ieova ina ia faia ni taulimaga pupuu o le feau o le Malo i fale o aiga, e faaaogā ai a latou Tusi Paia. E tauaveina e Molimau lomiga faale-Tusi Paia  e tuu atu i ē ona fale o ē naunau e maua le poto e sili atu, i le Afioga a le Atua.

Ina ia maua e tagata uma i le oganuu se avanoa e faalogologo ai i le feau tāua o le Malo, ua tausia ai e Molimau se faamaumauga auiliili a o latou ō atu mai lea fale i lea fale, e faaalia ai nofoaga sa lē maua atu ai tagata i o latou aiga, po o nofoaga sa lē mafai ona tuuina atu ai se molimau maeʻaeʻa ona o nisi mafuaaga. O le a toe asiasi atu i ai i se isi taimi. Afai e faaalia ai le naunau fiafia, e faamauina ma e toe foi atu i ai Molimau e avatu ni faamatalaga faaopoopo faale-Tusi Paia. Afai ua manao i ai, o le a faia se suesuega faale-Tusi Paia e lē aunoa. O nei mea uma e faia e aunoa ma se totogi.

E ofo foi e Molimau a Ieova mekasini ia i latou e fegasoloai i ala tetele. I lenei auala ua mafai ai ona latou fesootai ma le toatele o tagata atonu sa latou leʻi maua atu i o latou fale. Ua faia ai se taumafaiga moni lava ina ia oo atu i tagata taitoatasi o ē o le a faalogo mai.​—Galuega 17:17; Faaaliga 14:6, 7; 22:17.

Aiseā e asiasi atu ai pea Molimau ae semanū o le toatele e lē o faaalia se naunau? Ua iloaina e masani ona fesuisuiai tulaga o tagata taitoatasi, ma latou te tali mai ma le mautonu i se isi asiasiga, pe feiloai ai foi i se isi tagata o le aiga atonu o le a ia faaalia le naunau.

Na fetalai Iesu i ona soʻo: “A ia outou muai saili pea le malo o le Atua ma lana amiotonu.” Ua faia e le talaʻiga o le Malo o le Atua se vaega matuā tāua i lo matou muai sailia o le Malo, ma ua avea ai lena i Molimau a Ieova o se sini e sili ona tāua i o latou olaga.​—Mataio 6:33, NW; 2 Timoteo 4:2.

• O le ā le galuega a Iesu ma uluai Kerisiano sa valoia e faia foi i o tatou aso?

• Ua faapefea ona faamaopoopoina le taualumaga o le talaʻiga a Molimau a Ieova?

• Aiseā e asiasi atu ai pea Molimau i tagata ae semanū o le toatele lava e lē faaalia se naunau?

[Ata i le itulau 16, 17]

O loo talaʻia e Molimau a Ieova le Malo o le Atua i atunuu eseese

Taialani

Mekisikō

Holani

Korea

Kuraseio

Kana

Peretania

Ausetalia