Gaosia o Lomiga Faale-Tusi Paia e Viia ai le Atua

Ua lauiloa Molimau a Ieova i la latou talaʻiga o le Malo o le Atua e ala i itulau ua lomia. Talu mai le 1920, ua faaaogā e le Sosaiete o le Olo Matamata au faigaluega tauofo mai i Molimau ina ia gaosia mekasini ma tusi mo le tufatufaina atu. Ua faia lenei mea ina ia faamautinoaina ai se gaosiga maufaatuatuaina o lomiga i se tau e sili ona maulalo e mafai ai.

Mo ni tausaga e 60 pe a, ua atiina aʻe ai ma faalautele e le Sosaiete lana gaosiga o lomiga faale-Tusi Paia, muamua lava i Brooklyn ona sosoo ai lea i isi atunuu. O le galuega atoa lava ua faia e se au faigaluega tauofo ua faateleina.

I le tau faaiʻuiʻuga o le sefulu tausaga na amata i le 1970, na faasolosolo ai ina faagata auala o le taulimaina ma le lolomiina o faaupuga i faiga sa masani ai, ina ua iai taulimaga faakomepiuta, le tusia o le faaupuga i le masini puʻeata faakomepiuta, ma le faiga fou e lolomia ai e taʻua o le offset printing. O le faafitauli i lena, ona o masini sa mafai ona faatau mai sa na o se numera faatapulaaina o gagana na mafai ona ia taulimaina. Peitai ane, o le taimi lea ua uma ona gaosia e le Sosaiete lomiga i gagana pe tusa ma le 160, ma sa iai se manaoga mo nisi gagana e sili atu.

O lea la, sa aumaia ni tagata tauofo ina ia atiina aʻe se masini faaeletise ma le tusia o le faaupuga i le tulaga puʻeata faakomepiuta ina ia taulimaina gagana e tele. Sa matuā faafiafiaina i iʻuga na maua mai ai. Na manuia taumafaiga fou auiluma e pei ona manaomia, ma na atiina aʻe ai loa le faiga mo le tuuina i totonu o faaupuga, faatulaga i itulau, ma tusia ai i le tulaga puʻeata faakomepiuta, ua taʻua o le MEPS (Multilanguage Electronic Phototypesetting System). E mafai e lenei faiga ona taulimaina ai e tusa ma le 200 gagana. E mafai foi ona faaopoopo atu i ai ma nisi gagana.

I aso nei o le faiga faa-MEPS, na gaosia e Molimau a Ieova, ua faaaogāina i atunuu e sili atu i le 70, ma e iai isi atunuu ua fuafua mo lea lava faiga. Ua toleniina tagata galulue tauofo mai nei atunuu ina ia faagaoioia ma tausia lelei nei mea faigaluega. Ua gaosia nei e le Sosaiete mekasini i le sili atu i le 100 gagana i atunuu e tusa ma le 50, ma o atunuu e 8 mai nei atunuu ua gaosia ai foi tusi faavaamalo ma Tusi Paia.

Ina ia faia lenei galuega, e manaomia ai tagata​—o ē tusitusi, ē  faaliliu, ē siakiina le saʻo o le faaupuga, ē lolomia, ē tuufaatasia tusi, ma tagata e galulue i le laʻuga o lomiga. O isi e ao ona latou taulimaina fetusiaiga i faapotopotoga. O nisi latou te tausia faatoaga mo taumafa, saunia meaʻai, faamamā mea, fai tagamea, ma isi lava galuega. O nei mea uma e taulimaina e tagata galulue tauofo, o ē ua latou faaavanoaina i latou lava i atunuu eseese. I le lalolagi aoao i le 1988, e sili atu i le toʻa 9,000 ē galulue tauofo na auauna i ofisa, falegaosimea, aiga, ma faatoaga eseese.

O ai nei tagata? O i latou o tane ma fafine, o ē nofo fua ma ē ua faaipoipo, o ē talavou ma ē matutua, o i latou uma o Molimau tuuina atu a Ieova. O nisi ua iai i lenei galuega mo le 40, 50, e oo lava i le 60 tausaga. Ua latou faaaluina se fuafaatatau o itula a lē itiiti mai e 44 i le vaiaso i a latou galuega ua tofia i ai, faatasi ai ma ni taimi faaopoopo e pei ona manaomia. Ua tuutoina atu afiafi po ma faaiʻuga o vaiaso i le talaʻiga o le tala lelei i lea fale ma lea fale, ma i isi foi taualumaga a le faapotopotoga.

I le lalolagi aoao, ua saunia ai potu ma mea taumafa e lē faapitoa lava mo nei tagata faigaluega i se tasi o fale o nofoaga o le Sosaiete, ua taʻua o Aiga Peteli. E faaopoopo atu i ai, latou te maua se alauni e lē tele ina ia totogia ai tupe faaalu i femalagaaiga i la latou faiva ma sina aofaiga itiiti mo mea totino e manaomia.

Talu mai le 1920, ua gaosia ai e nei tagata galulue tauofo le sili atu i le iva piliona Tusi Paia, tusi, mekasini, ma pepa i le tusa ma le 200 gagana mo le tufatufaina atu i le lalolagi aoao. O loo latou faia la latou vaega ina ia mafai ai ona faalauiloa atu le tala lelei e faavavau e avea o tala fiafia i nuu ma ituaiga ma gagana ma tagata uma.​—Faaaliga 14:6, 7.

• O ā gaoioiga mo le lolomia ua iai i le Sosaiete o le Olo Matamata, ma aiseā?

• O ai o faia nei galuega uma, ma e faapefea ona ola i latou?

[Ata i le itulau 24]

O loo faatinoina e tagata tauofo matata e fesootai atu i le gaosiga o lomiga faale-Tusi Paia i le falegaosimea, le aiga, le ofisa, ma le faatoaga, i Brooklyn ma Wallkill, Niu Ioka, Iunaite Setete

[Ata i le itulau 25]

O loo faatinoina e tagata tauofo matata eseese tuusaʻo pe lē tuusaʻo foi e aofia ai i le gaosiga o Tusi Paia ma lomiga faale-Tusi Paia

Sepania

Siamani

Finilani

Kanata

Tenemaka

Suetena

Aferika i Saute

Pasili

Holani

Ausetalia