Leoleoina le Lafu Mamoe a le Atua i le Autasi

Ua fesili nisi: ʻE faapefea ona pulea le faapotopotoga a Molimau a Ieova i le lalolagi aoao?’ O la matou tali: O le faatulagaga e pulea ai e mulimuli lava i le faaaʻoaʻoga a le faapotopotoga Kerisiano o le uluai senituri.

I le sefulu tausaga na amata i le 1870, na tausolomua ai Charles T. Russell ma ana aumea i le faasalalauina o iʻuga o a latou suesuega faale-Tusi Paia, e ala i lauga ma faaupuga lomia. I le atunuu atoa, o i latou sa filifili e aufaatasi atu i lenei galuega sa vaavaai atu ia Russell ma ana aumea vavalalata, o le ʻau o tane e sili ona poto masani i le faia o le galuega a le Alii, ma o ē sa mafai ona saili atu i ai mo ni fautuaga e fesootai ma a latou gaoioiga.

I le 1884 sa tuufaatasi ai loa le Zion’s Watch Tower Tract Society (Sosaiete a Siona o Savali a le Olo Matamata) e tusa ma le tulafono a le Taupulega a Pennsylvania. Sa aafia vavalalata Russell ma ana aumea i le taʻitaʻiina o lenei Sosaiete, faapea foi ma gaoioiga a Tagata Aʻoga o le Tusi Paia. I le 1909 na siitia atu ai lo latou ofisa ulu i Brooklyn, Niu Ioka. I le faagasologa o tausaga, ua auauna ai faatonu o le Sosaiete o le Olo Matamata ma isi aumea vavalalata o ē agavaa faaleagaga, o ni tane faauuina, e avea o se vaega pule mo Molimau a Ieova.

E faia aʻe le Vaega Pule i se vaega o ni tane Kerisiano ua faauuina (e toʻa 12 i le 1988), e aofia ai ma le toʻa 7 o loo auauna i le komiti o faatonu o le Sosaiete o le Olo Matamata. O i latou nei e taʻitaʻia gaoioiga a Molimau a Ieova i le lalolagi aoao. E lē o faagaeeina i latou e le Atua ma o lea e lē faapea ai e lē masese, peitai latou te faalagolago i le Afioga lē masese a le Atua e avea o le pule silisili ona maualuga i le lalolagi, ma ua maua le poto masani i le tele o tausaga o o latou olaga i le gauai atu i le finagalo o le Atua. E taitoatasi ma se talaaga o le sili atu i le 40 tausaga i le faiva faataimi-atoa faatasi ma Molimau a Ieova.

E vaavaaia e le Vaega Pule mea o loo faasalalauina e le Sosaiete. O mea o loo tusia ai e faavae mai le matauina o manaoga faaleagaga o le lafu, ma o iʻuga o suesuega maeʻaeʻa ma sailiiliga i le Afioga a le Atua faatasi ai ma le tatalo. A o faaauau pea ona suesue e nei tane le Tusi Paia ma matau le agaʻigaʻi i luma o le galueaiina o fuafuaga a le Atua, le faataunuuga o valoaga i mea tutupu i le lalolagi, ma le tulaga o tagata o le Atua i le lalolagi, atonu i nisi taimi latou te iloa ai e  manaomia ona faia ni fesuiaiga i le faamalamalamaga o nisi o aʻoaʻoga ona ua malamalama atili ai. I lenei auala, ua sili ai ona faatupuina pea le anoanoai o le poto saʻo i le upu moni.​—Salamo 97:11; Faataoto 4:18; Tanielu 12:4.

Ua tofia e le Vaega Pule se Komiti o le Lala o ni tane e toʻatolu pe sili atu foi ua agavaa faaleagaga i lala taitasi o le sili atu i le 90 i le lalolagi aoao, e vaavaaia gaoioiga i atunuu ma atumotu e sili atu i le 200. E fesootai lala ma faapotopotoga i lalo o la latou vaaiga. E iai le fesootaiga e lē aunoa i le va o le Vaega Pule ma Komiti o Lala, ma e asiasi totino atu foi tane o le Vaega Pule i le tele o lala i tausaga taitasi, ina ia fesootai ai pea ma tulaga o iai.

O nei tane e lē o ni alii e pule i le faatuatua o isi ae o ni faifeau e galulue mamafa ina ia mafai e isi e toatele ona aʻoaʻo e uiga i le Afioga a le Atua. E lē auauna i latou ina ia maua ai ni taui tautupe, ae ua saunia a latou mea faaletino e manaomia i se tulaga tutusa e pei o isi uma tagata o aiga Peteli. O le faamaoniga o lo latou auauna ma le faamaoni ua vaaia i le maelega, le autasi, tulaga maualuluga tau amio mamā, ma le faamaoni i aʻoaʻoga a le Tusi Paia ua faaalia mai e Molimau a Ieova i le lalolagi aoao.​—1 Korinito 3:5-9; 4:1, 2; 2 Korinito 1:24; 3:1-3; 1 Peteru 5:2, 3.

• O le ā le faatulagaga o le puleaina ua tuputupu aʻe?

• O ai o auauna i aso nei i le Vaega Pule, ma o ā o latou tiute tauave?

• Ua faapefea ona vaavaaia le galuega i isi atunuu?

[Faafanua i le itulau 26]

(Tagaʻi i le lomiga mo le ata atoa)

Oganuu o loo faia ai e Molimau a Ieova le Finagalo o le Atua

[Ata i le itulau 26]

O peresitene o le Watch Tower Society

C. T. Russell, 1884-1916

J. F. Rutherford, 1916-1942

N. H. Knorr, 1942-1977

F. W. Franz, 1977-

[Ata i le itulau 27]

O nai isi lala ia mai ofisa o lala e sili atu i le 90 o loo vaavaaia ai gaoioiga a Molimau a Ieova i le lalolagi aoao

Kanata

Samepia

Siamani

Iapani

Ausetalia

Pasili