Sauaina ona o le Amiotonu

Atonu e te faalogo i ni au uo po o tauaiga o latou taʻua le oo o Molimau a Ieova i faalavelave i le va ma le tulafono, faapea ua faasaina i latou e se malo, po o le faapea foi o i latou o ni tagata leaga. Aiseā ua mafua ai lenei tautala tetee e uiga ia i latou?

E lē faapea ona ua lē faaaloalo Molimau i le tulafono, peitai ona o loo latou mulimuli atu i tulagaaao o Iesu. Na fetalai Iesu i ona soʻo faapea, o le a upuleagaina i latou e tagata, e sauaina i latou, ma faia ni tuuaʻiga pepelo ia i latou i mea pepelo ma le leaga uma. Ua mafua lenei ona o le tetee sili i le Atua, o Satani, o le atua o lenei lalolagi, ma e manao o ia ina ia faaliliueseina tagata mai le auauna atu i le Atua.​—Mataio 5:10-12; 10:16-22, 34-39; 24:9, 10; Ioane 15:17–16:3; 2 Timoteo 3:12; 1 Peteru 5:8; Faaaliga 12:17.

Ina ua pueina aposetolo ma tuuina atu i le faamasinoga, sa lē faapea ona o i latou o ni ē solitulafono, po o ni tagata faasaua, po o ni ē fouvale i le malo. Ae ona o lo latou talaʻia o le tala lelei. Ina ua toe talosaga e le aposetolo o Paulo lona faamasinoga i faamasinoga maualuluga, sa faia ina ia puipuia ai ma faavaeina ai faaletulafono le aiā a Kerisiano e talaʻi ai le tala lelei.​—Galuega 4:18-20; 5:28-32; Filipi 1:7.

I aso nei, o Molimau a Ieova o ni Kerisiano e tausi i tulafono, o ē e totogi a latou lafoga ma faaalia le faaaloalo mo i latou o iai le pule. Latou te totogi atu mea a Kaisara ia Kaisara ma mea a le Atua i le Atua. Afai e iai sa latou feteenaiga ma so o se pule faalemalo, e mafua lea ona ua lē amanaia e le malo la latou galuega talaʻi, pe ona o lo latou tulaga solitu i mataupu i le va o atunuu. Ae peitai i lenei mea e ao ai i Molimau a Ieova ona faia le tulaga lava lea e tasi e pei ona sa faia e le au aposetolo, o ē na faapea mai: ʻE sili lo matou anaana i le Atua i lo matou anaana i tagata.’​—Galuega 5:29; Mareko 12:17; Ioane 18:36; Tito 3:1, 2.

E lē sailia e Molimau a Ieova sauaga peitai e sili ia i latou le ola i se olaga toamalie ma le filemu. Peitai ane, afai e sauaina i latou ona o lo latou mulimuli i tulafono a le Atua ma le faaaʻoaʻoga a Iesu Keriso, latou te fiafia e tutumau ai.​—Mataio 5:10-12; Galuega 5:40, 41; 1 Korinito 4:12; 1 Timoteo 2:2; 1 Peteru 3:14, 15; 4:12-16.

• Aiseā e upuleagaina ai ma sauaina auauna a Ieova?

• Aiseā e oo ai i nisi taimi ni feteenaiga i le va o Molimau a Ieova ma pulega faalemalo, e pei ona sa faia e aposetolo Kerisiano?

• E faapefea ona vaai auauna a Ieova i sauaga?

[Ata i le itulau 29]

Sa aveina faamalosi Iesu i luma o Pilato ma na faafalepuipuiina le aposetolo o Paulo ona o le talaʻiga o le Malo o le Atua