Sauniga mo le Taufaatupu ai o le Alofa ma Galuega Lelei

Sa faatasitasi uluai Kerisiano, i le tele o taimi i fale o aiga, ina ia maua faatonuga ma olioli ai i le mafutaga faauso e atiina aʻe ai. I aso nei, e faatolu ona feiloai faapotopotoga o Molimau a Ieova i le vaiaso. Ua valaauliaina oe ina ia e auai i so o se isi o nei sauniga. O a latou sauniga e lē faia e pei o sauniga masani faalelotu ae taulaʻi saʻo atu i aʻoaʻoga tauatua. O sauniga a le faapotopotoga e amata ma toe faaiʻu i le pese ma le tatalo. E lē totogia le auai atu i ai, ma e leai ni lafoga po o peleti e aoina.​—Galuega 4:23-31; 14:22; 15:32, 35; Roma 16:5; Kolose 4:15.

Atonu o le uluai sauniga o le a e auai atu i ai o le lauga i le lautele e 45 minute, e feagai lea ma aʻoaʻoga faale-Tusi Paia, o valoaga, po o fautuaga i le olaga faa-Kerisiano. Pe a uma le lauga lea, ona sosoo lea ma le suesueina o le Tusi Paia, e faaaogā ai se mataupu i Le Olomatamata ua fuafuaina faapitoa mo le suesuega a le faapotopotoga. E fuafuaina faapenei le suesuega: E faitau le palakalafa mai Le Olomatamata, ona faatutu mai lea e le taʻitaʻi fesili e uiga i le mataupu, ia e mafai e le aofia ona ofo e taliina, e ala i le sii i luga o o latou lima. E masani ona fai ni nai manatu i palakalafa taitasi. O le umi o le sauniga e tasi le itula.

Mulimuli ane i le vaiaso, e lua foi isi sauniga e taʻi 45 minute e fai ai. O le tasi o le Aʻoga o le Faiva Faatiokarate. O loo saunia ai le toleniina i auala e aoaoina mai ai faamatalaga e uiga i mataupu faale-Tusi Paia ma aʻoaʻo atu ai ma le uigā. Pe a uma le 21 minute o faatonuga faapitoa, ona fai lea e tagata aʻoga na muai tofia a o leʻi taitai oo i ai ni taulimaga pupuu. A uma taulimaga taitasi, ona tuuina mai lea e le faiaʻoga o le aʻoga fautuaga e faasino ai auala e mafai ona faaleleia atili ai le tagata aʻoga. Ua saunia ni nai tusi aʻoga auā le faaaogāina i lenei aʻoga. O i latou o ē auai e lē aunoa i sauniga, e mafai ona tusia o latou igoa tau lava o loo latou ola ia tusa ai ma mataupu silisili faa-Kerisiano.

 Ona sosoo mai lea ma le sauniga ua taʻua o le Sauniga o le Auaunaga. E fai aʻe i vaega e tolu pe fa e feagai ma le taulimaina o le tala lelei i lea fale i lea fale, atoa foi ma isi vala o le faiva. E tauaaoina nei vaega i ni lauga, talanoaga, po o faataʻitaʻiga, faatasi ai ma sina va­ega a le aofia. O le tele o le polokalama e faavae mai i manatu e maua i La Tatou Faiva o le Malo, o se pepa o faatonuga e fa ona itulau ua lomia faalemasina e le Sosaiete o le Olo Matamata.

O se isi sauniga o le suesuega faalevaiaso e fai i ni vaega toaitiiti, e masani ona fai i fale o aiga i vaipanoa eseese o le oganuu a le faapotopotoga. E faavae le suesuega i le Tusi Paia ma se tusi e leʻi leva ona lomia mai e le Sosaiete. Talu ai e toaitiiti le vaega, ua iai la se avanoa sili mo tagata uma ina ia saosaolaumea ai i le talanoaga, ma ua iai foi se avanoa lelei mo le aofia e faamasani atili ai o le tasi i le isi.

O le tele o faapotopotoga e fai a latou sauniga i se Maota o le Malo ua fausia e Molimau a Ieova. O tau e totogia i ni meaalofa tauofo mai Molimau lava latou, ma i le tele o tulaga e fai fua lenei galuega e le au faigaluega tauofo e aunoa ma se totogi. E iai pusa mo meaalofa i sauniga uma mo le faaaogāina e i latou e mananao e foai.

Ua fesoasoani sauniga a le faapotopotoga i Molimau a Ieova ina ia mulimuli ai i le fautuaga i le Eperu 10:24, 25: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua [tatou] iloa o le aso o loo tāulata mai.”

• O ā vala o sauniga a uluai Kerisiano e mafai ona vaaia i sauniga a Molimau a Ieova?

• Otooto mai mea o loo tauaaoina i sauniga e lima o loo faia e lē aunoa e Molimau?

• Ua faapefea ona maua maota e fai ai sauniga?

[Ata i le itulau 14]

Se toeaina o loo ia taʻitaʻiina le Suesuega o Le Olomatamata, Iunaite Setete

Se vaaiga mai le Aʻoga o le Faiva Faatiokarate, Motu o Faeroe

Le suesuega a vaega i le fale o se aiga, Yap

Le Maota o le Malo, New Braunfels, Texas, Iunaite Setete, sa fausia i aso e lua e Molimau a Ieova

[Ata i le itulau 15]

Maota o le Malo i atunuu eseese

Iapani

Ausetalia

Oseteria

Sepania