Ua Oo Nei le Fuafuaga a le Atua i Lona Tumutumuga

O le fuafuaga a le Atua i le foafoaina o le lalolagi, sa faia ina ia ʻainā e tagata fiafia o ola i lalo o tulaga amiotonu. Ina ia faaauau pea ona ola, e tatau i le fanau a tagata ona usiusitai i tulafono a le Atua, ae peitai na lē usiusitai le uluai ulugalii ma avea ai o ni tagata agasala, na faasalaina i le oti. O lenei mea na aumaia ai le agasala ma le oti i a la fanau uma lava.​—Kenese 1:27, 28; 2:16, 17; 3:1-19; Roma 5:12.

O lea, na filifilia ai e le Atua, o lē o lona suafa o Ieova, ina ia aveesea āuga o le lē usiusitai ma le agasala mai le lalolagi. Ina ua mavae sina taimi, sa ia silasila mai ai i le lalolagi, ma na ia silafia ai i le fanau a tagata se tagata faatuatua o Aperamo, lea na Ia suia lona igoa ia Aperaamo. Na folafola e le Atua ia Aperaamo e faapea o le a avea lana fanau ma se nuu e toatele, ma e ala i lena nuu, o le a aumaia ai e le Atua se fanau, e auala i lea fanau e faamanuiaina ai aiga uma o le lalolagi e i latou lava.​—Kenese 12:1-3; 18:18, 19; 22:18; Salamo 83:18; Eperu 11:8-16.

Ina ua latalata atu i le faaiʻuga o le 16 senituri T.L.M., na avea ai le fanau a le atalii o le atalii o Aperaamo o Iakopo, po o Isaraelu, ma ituaiga e 12 o loo nonofo o ni pologa i Aikupito. Na laveaiina e Ieova nei tagata Isaraelu mai Aikupito ma faia aʻe ai i latou o se nuu. I le Mauga o Sinai, na ia tuuina atu ai ia i latou le Tulafono e ala ia Mose e avea ma o latou faavae faalemalo. Sa avea Ieova ma lo latou Tupu, Faamasino, ma Fai Tulafono. Na avea le nuu o Isaraelu ma tagata filifilia o le Atua, o ana molimau, na faamaopoopoina e faataunuuina lana fuafuaga. O le a auala mai ia i latou le Mesia, o lē o le a na faavaeina se malo e faavavau mo le manuia o tagata o atunuu uma.​—Esoto 19:5, 6; 1 Nofoaiga a Tupu 17:7-14; 1 Tupu 4:20, 25; Isaia 33:22; 43:10-12; Roma 9:4, 5.

Ina ua mavae senituri e 15, pe tusa ma le 2,000 tausaga ua mavae, sa auina mai e le Atua lona Alo e toatasi mai le lagi i le lalolagi, ina ia fanau mai i se taupou talavou Iutaia o Maria. Sa faaigoaina o ia ia Iesu, ma sa fai ma ona tofi le Malo lea na folafola atu e le Atua i lona augātamā o Tavita. I le 30 o ona tausaga, ona papatisoina ai lea o Iesu e Ioane le Papatiso ma na amata ai ona faalauiloa le Malo o le Atua. I lona faamalōlōina o ē mamaʻi, na ia faaalia ai pe o le a faapefea e lena Malo o loo sau ona faamanuia ai le fanau a tagata. Na ia faamatala e ala i faataʻitaʻiga, o mea o le a manaomia e i latou uma o ē mananao i le ola e faavavau.  Ona fasiotia lea o Iesu i le faatautauina i se laau, ua avea ai lona soifua lelei atoatoa faaletagata ma togiola mo le fanau a tagata.​—Mataio 1:18-24; 3:13-16; 4:17-23; 6:9, 10; mataupu 13; 20:28; Luka 1:26-37; 2:14; 4:43, 44; 8:1; Ioane 3:16; Galuega 10:37-39.

Na faamatalaina e Iesu faapea, o le Malo faa-Mesia o le a faavaeina i le lumanai e mamao lava, i le faaiʻuga o le faiga o mea. I lena taimi, o le a faatasi lē vaaia ai o ia i le lagi e avea o le Tupu e pule ma o le a ia faailoa mai lona faatasi mai, i lona uaʻi mai i le lalolagi. Ua faaalia e mea tutupu i le lalolagi faapea ua tatou ola i lenei taimi talu mai le 1914. E pei ona sa valoia e Iesu, o loo talaʻiina atu nei le tala lelei o le Malo i le lalolagi aoao e fai ma molimau i atunuu uma. O le iʻuga, ua aoaoina nei tagata mai atunuu uma i le itu o le Malo o le Atua. O le a faasaoina ia tagata mai le iʻuga o le faiga o mea o iai nei, ma maua ai le ola e faavavau i le lalolagi i lalo o le Malo faa-Mesia.​—Mataio mataupu 24 ma le 25; Faaaliga 7:9-17.

E tele lotu o loo faapea mai o latou faia le finagalo o le Atua i aso nei. Ae faapefea ona e mataulia le faapotopotoga Kerisiano moni? E ala lea i le iloiloina lelei o Tusitusiga Paia e uiga i le faapotopotoga Kerisiano o le uluai senituri ona iloa ai lea po o ai i aso nei o mulimuli i lena lava faataʻitaʻiga e tasi.

• O le ā le vaega na faia e Aperaamo ma Isaraelu i le faataunuuina o le fuafuaga a le Atua?

• O le ā na faataunuuina e Iesu i lana faiva ma lona maliu?

• O ā mea tutupu na valoia e faailogaina ai o tatou aso nei?