Ua Taʻimua Faifeau Faataimi-Atoa i le Galuega Talaʻi

Atonu o le uluai Molimau a Ieova na talaʻi atu ia te oe o se faifeau paeonia faataimi-atoa po o se misionare. Talu ai e lē totogia le faiva a Molimau a Ieova, atonu la po o e tau manatu pe mafai faapefea e nei tagata ona auai i le faiva i taimi atoa.

O Molimau a Ieova uma o ē ua tuuina atu ma papatisoina o ni faifeau, peitai o le toatele o i latou e fai aiga, po o isi tiute tauave ua lē mafai ai ona latou tuutoina ia sili atu na i lo o ni nai itula i le vaiaso i la latou faiva. Peitai ane, e faitau afe Molimau i le lalolagi atoa ua faaitiitia tulaga o o latou olaga ina ia mafai ona latou totogia a latou tupe faaalu ua faaitiitia i ni galuega faavaitaimi ma i lea ua mafai ai ona tuuina atu le 1,000 itula po o le sili atu foi i le faiva i tausaga taitasi.

E moni, e lē tele ni tupe a faifeau paeonia faataimi-atoa e faaalu mo i latou lava, ae ia i latou, o le auala lenei e muai saili ai le Malo o le Atua. Ma latou te maua ai le tele o faamanuiaga. Tau lava ina ia mafai ona talanoa atu i isi e uiga i le Afioga a le Atua mo le tusa ma le 90 itula i le masina, o se mea lelei lava lea e tofo i ai. E faaleleia e le faifeau faataimi-atoa lona tomai i le faiva ma e maua ai foi le taimi e tuliloa ai tagata fiafia i le auala e tatau. Ua aumaia e lenei mea iʻuga e sili ona faalaeiau. Latou te maua mea faaletino latou te moomia, ma latou te matuā talisapaia tele nei mea ua latou maua.​—Mataio 6:33.

Ia Fepuari 1943, na faavaeina ai e le Sosaiete o le Olo Matamata le Aʻoga Faale-Tusi Paia o le Olomatamata o Kiliata. O le fuafuaga ina ia toleni faifeau paeonia faataimi-atoa ua iai le poto masani, ina ia auauna o ni misionare i atunuu ese. O le aʻoaʻoga lea e lima masina, e aofia ai le suesueina maeʻaeʻa o le Tusi Paia, le talafaasolopito o le Tusi Paia, le faalapotopotoga a Ieova, ma isi mataupu e fesootai atu, i sauniuniga mo le auaunaga i se atunuu ese.

 E totogi e le Sosaiete femalagaaiga i mea ua tofia i ai misionare, ma saunia taumafataga lelei mo le soifua maloloina ma nofoaga e lē faapitoa lava e nonofo ai i aiga misionare. E tuuina atu foi e le Sosaiete i misionare taitoatasi se alauni itiiti mo tupe faaalu totino. E auauai misionare i le faagaoioiga o le aiga e ala i le faia o faatau, sauniunia o taumafataga, ma le faamamāina. Ona o lenei tausiga magafagafa, ua mafai ai e misionare ona tuutoina atu e lē itiiti mai i le 140 itula i le masina i le talaʻiga i lea fale ma lea fale, ma le faia o suesuega faale-Tusi Paia faatasi ma tagata naunau fiafia.

O le toatele o nei misionare ua tofia i atunuu e faitau afe maila le mamao mai o latou fale ma aiga. Ua manaomia ona latou fetuutuunai i tulaga eseese o le soifuaga ma aganuu, i ituaiga o taumafa fou e taumamafa ai, le eseesega i le tau, ma le tautala i se isi gagana ese. Ua latou faia lenei galuega talu ai lo latou alolofa i tagata ma se faanaunauga malosi ina ia fesoasoani ia i latou e aʻoaʻo e uiga i le Malo o le Atua.

Mai le 1943 e oo atu i le 1988, na aʻoaʻoina ai e le Aʻoga Faale-Tusi Paia o le Olomatamata o Kiliata vasega e 86 ma ua auina atu ai misionare e sili atu i le 6,200. I lalo o le vaavaaiga a le Sosaiete, o i latou nei ua taʻimua i le faalauteleina o le aʻoaʻoga faale-Tusi Paia i nuu atoatoa o Aferika, Amerika Tutotonu ma Saute, atunuu i Sasaʻe, atoa ma le Pasefika i Saute, ma ua latou faataunuuina foi le tele i Europa.

E tusa lava pe auai Molimau a Ieova i le faiva faataimi-atoa i le avea o ni paeonia, po o ni misionare, pe galulue foi faavaitaimi, ae latou te auauna lava e aunoa ma le maua ai o ni taui tautupe. Latou te faaaluina o latou lava taimi ma tupe, faapea ma i latou lava, ina ia fesoasoani ai i isi ia mauaina le poto e taʻitaʻi atu ai i le ola e faavavau.​—Ioane 17:3.

• Ua mafai faapefea e nisi o Molimau a Ieova ona tuutoina o latou taimi atoa i le faiva, ma aiseā ua latou faia ai lenei mea?

• Ua faapefea ona toleni faifeau mo le galuega faamisionare?

• E faapefea ona lagolagoina misionare i o latou tofiga i atunuu ese?

[Ata i le itulau 22]

Itu agavale: Le potu aʻoga a le Aʻoga o Kiliata, Brooklyn, Niu Ioka, Iunaite Setete

Itu taumatau: O loo aʻoaʻo e se misionare le Afioga a le Atua i Papua Niu Kini

[Ata i le itulau 23]

Talaʻiga o le Afioga a le Atua i atunuu eseese e faifeau paeonia ma misionare

Pasili

Malo Faiperesitene o Tominika

Sepania

Siera Lione, Aferika