E Matou te Valaauliaina Oe

Sa avea o se fiafiaga iā i matou le talatalanoa ma oe e ala atu i itulau o lenei polosiua. E iai le faamoemoe sa faafiafiaina oe ina ua e a‘oa‘oina atili nisi mea e uiga i Molimau a Ieova. Faamolemole, ia e talia la matou valaaulia ina ia e asiasi mai iā i matou i so matou Maota o le Malo o loo lata ane iā te oe. Se‘i e silasila i le auala o loo faafoeina ai a matou sauniga. Se‘i e silasila i le auala o loo matou taumafai e tufa atu ai i isi le tala lelei, e uiga i se lalolagi parataiso o le a pulea mai e le Malo o Keriso.

O le Atua na ia folafolaina mai. “E faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13) Ua mavae atu le tele o senituri. Ua lata nei ina faai‘uina le taimi sa faatalitali ai. Ua faamaonia lenei mea i tulaga o loo iai le lalolagi.

Na faapea mai le aposetolo o Paulo: “Ina ua outou iloa o le Aso o loo tāulata mai,” “ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou.” (Eperu 10:24, 25) E matou te valaauliaina oe ina ia e utagia le fautuaga a Paulo, e ala i lou aufaatasi mai iā i matou.