O Aogā o le Tala Lelei i Lou Vaipanoa

I LE lalolagi i aso nei, ua masani ona tatou faalogo i le manatu lenei: “E lē aogā mataupu silisili o le Faa-Kerisiano. E lē toe aogā mai i le sosaiete lavelave o aso nei.” Peita‘i ane, i se talanoaga na lipotia mai sa faia e le ta‘ita‘i Hinitū o Mohandas K. Gandhi ma lē sa avea muamua ma kovana o Peretania i Initia, o Lord Irwin, sa ta‘ua ai se manatu e matuā ese lava. E ta‘ua faapea sa fesili atu Lord Irwin iā Gandhi po o le ā sona manatu i se auala o le a fo‘ia ai faafitauli i le va o Peretania Tele ma Initia. Na uu a‘e i luga e Gandhi se Tusi Paia ma tatala i le mataupu lona lima o le Mataio ma faapea atu: “Pe afai e usitai lou atunuu ma lo‘u atunuu i a‘oa‘oga ia na faataatitia mai e Keriso i lenei Lauga i luga o le Mauga, o le a tatou fo‘ia faafitauli e lē gata mo o ta atunuu, ae mo atunuu o le lalolagi atoa.”

O loo tautala lenā lauga i le sa‘ili ina ia avea o se tagata e faaleagaga ma lotomaulalo, e to‘afilemu, e alofa mutimutivale, e alofa i le amiotonu. O loo ta‘usalaina ai e lē gata o le fasioti tagata ae o le lotoa fo‘i i isi, e lē gata o le mulilua ae faapea fo‘i i mafaufauga i amioga lē mamā. O loo tautala tetee i talaga faaipoipoga e faia ma le lē talafeagai, na e malepelepe ai aiga ma aafia ai fua nai fanau. Ua ta‘u mai iā i tatou: ‘Ia alofa atu e oo lava iā i latou e lē fiafia mai iā te oe, ia foa‘i atu i ē matitiva, aua le faamasinosino atu ma le lē alofa i isi, ia e feutaga‘i ma isi i le auala e te mana‘o e feutaga‘i mai ai fo‘i iā te oe.’ Pe afai e faatatauina nei fautuaga uma, e anoanoa‘i aogā o le a selesele mai ai. Pe afai e to‘atele ni tagata i lou nuu o le a latou faatinoina nei fautuaga, o le a faapena fo‘i ona faaleleia atili ai lou nuu!

Ua avea Molimau a Ieova o se taa‘iga i lenei itu. Ua a‘oa‘oina i latou e le Tusi Paia ina ia faaaloalo i le faaipoipoga. Ua toleniina a latou fanau i mataupu silisili tonu. E faamamafaina le tāua o le aiga. O aiga e autasi e avea o se faamanuiaga i lou nuu, e oo lava i lou atunuu. Ua tele faaa‘oa‘oga mai mea na tutupu i aso ua mavae, o le malepe ifo o ni malo malolosi o le lalolagi ina ua vaivai faiā faaleaiga ma faateteleina amioga lē tatau faaleituaiga. O le to‘atele lava o tagata ma aiga ua mafai ona taa‘ina e Molimau a Ieova ina ia ola e tusa ai o mataupu silisili faa-Kerisiano, o le faaitiitia fo‘i lenā o amioga lē taupulea, o amioga lē tatau faaleituaiga, ma solitulafono o le a iai i lou nuu.

 O se tasi o faafitauli tele o loo pagatia ai nuu ma atunuu o le faailogatagata i lanu ma ituaiga e tupuga mai ai. Ua ese lenā mai le manatu na ta‘ua e le aposetolo o Peteru e faapea: “Ua ou iloa e le faailogaina tagata e le Atua; a e peitai o le mata‘u ia te ia i nuu uma lava, ma fai le amiotonu, ua talia i latou e ia.” Ma sa tusi mai Paulo: “E le o i ai se Iutaia po o se Eleni, e le o i ai se pologa po o se sa‘oloto, e le o i ai se tane po o se fafine; auā ua tasi lava outou uma ia Keriso Iesu.” (Galuega 10:34, 35; Kalatia 3:28) E ioeina e Molimau a Ieova lenā manatu. E so o se ituaiga ma so o se lanu o tagata, o loo nonofo faatasi ma galulue faatasi i lo latou ofisaulu mo le lalolagi atoa, i lālā, ma i faapotopotoga.

I Aferika, e iai ni ituaiga patino e lē mafai ona faifaimea faatasi e aunoa ma le tutupu ai o ni fevesia‘iga. Ae peita‘i, i fonotaga a Molimau a Ieova o loo faia i inā, o loo iai tagata mai le tele o ituaiga eseese, ua latou aai, momoe, ma tapua‘i faatasi i se aufaatasiga atoatoa ma se feoeoea‘iga māfana. E matuā maofa tagata i tofiga aloa‘ia a le malo pe a latou vaai i lenei mea. O se faaa‘oa‘oga  o āuga autasi o le Faa-Kerisiano moni, sa faia i ai se faamatalaga a le nusipepa i Niu Ioka, le Amsterdam News o Aokuso 2, 1958. Na māfua le faamatalaga ona o le mātauina o le fonotaga faavaomalo lea sa mua‘i ta‘ua, o inā na faapotopoto ai le silia ma le kuata miliona o Molimau i le aai o Niu Ioka.

“I lenā nofoaga atoa, sa miomiō faatasi uma ai i le olioli ma le sa‘oloto tagata uli, o tagata papa‘e ma tagata mai Asia, o tagata mai tulaga uma o le olaga ma vaega uma o le lalolagi . . . O Molimau tapua‘i mai atunuu e 120 ua latou ola ma tapua‘i faatasi uma ma le fifilemu, e faaali atu ai i tagata Amerika le faigofie e mafai ona faia ai lea mea. . . . Ua avea le fonotaga o se faaa‘oa‘oga matilatila o le auala e mafai ai e tagata ona galulue ma ola faatasi ma le autasi.”

E to‘atele e ono faapea mai, e lē fetaui mataupu silisili o le Faa-Kerisiano i lenei lalolagi o ona pō nei. Ae peita‘i, o le ā la se isi mea sa aogā pe o le a aogā? E mafai ona matuā aogā moni mataupu silisili faa-Kerisiano pe afai e faatatauina i lou vaipanoa i le taimi nei, ma o le a avea fo‘i ma faavae mo le autasia o ‘atunuu uma, ma aiga, ma nuu’ i le lalolagi aoao pe a oo ina pule le Malo o le Atua i le fanau a tagata.—Faaaliga 7:9, 10.

[Faamatalaga faaopoopo i le itulau 23]

O loo galulue faatasi uma ituaiga eseese ma lanu

[Faamatalaga faaopoopo i le itulau 24]

E aogā tele le Faa-Kerisiano. O le ā se isi mea ua aogā?