NA TUSI mai se tagata poto mai Holani o Spinoza e faapea: “Ua ou taumafai ina ia aua neʻi ʻata i amioga a tagata, aua neʻi tagi i ai, aua foi neʻi ita i ai, a e ia malamalama i ai.” I le avea ma sē e aʻoaʻo atu, ua e fesagai ai ma le luʻi o le taumafai lea e malamalama i manatu, talaaga, ma mea o talitonu i ai tamaiti aʻoga o e vaaia, e aofia ai ma tamaiti aʻoga o ni fanau a Molimau a Ieova. I nisi taimi, e uia ai e ia tamaiti aʻoga tulaga e foliga mai e lē tusa ai ma le mea ua talia e le lautele i nisi o mataupu patino. Peitai, afai o na gaoioiga e mautinoa e māfua mai ona o se talitonuga faalelotu ma tau amioga a se tamaitiiti aʻoga, e aogā la ona e uai atu i ai. O lenei polosiua ua saunia e le Watch Tower Bible and Tract Society (le sui mo lomiga a Molimau a Ieova) ma ua fuafuaina ina ia fesoasoani ia te oe e malamalama atili ai i tamaiti aʻoga o avea o ni Molimau. E faamoemoe o le a e faaaluina se taimi ina ia faitau i ai ma le faaeteete.

O le malamalama i talitonuga faalelotu o se tasi tagata e lē tau manaomia ai ona e taliaina po o le mulimuli i na talitonuga, ma o le faailoa atu e lē tutusa ma le faaliulotu. E lē o taumafai lenei polosiua e faamalosia oe po o au tamaiti aʻoga e talitonu i manatu faalelotu a Molimau. O lo matou faanaunauga e na o le faailoa atu ia te oe e uiga i mataupu silisili ma talitonuga ua faapea ona aʻoaʻoina ai nisi o au tamaiti aʻoga e o latou mātua ia lē gata ina faigofie ai ona e malamalama i tamaiti Molimau, a e faapea ai foi ona outou galulue ma i latou. O le mea moni, a o fafau aʻe le olaga o le tamaitiiti lava ia faatasi ai ma lona lava loto fuatia ifo o tuputupu aʻe, o mea ua aʻoaʻoina ai fanau ma mea latou te faia e masani ona lē amioai faapea i taimi uma lava.

E pei lava o le tele o mātua, e mananao Molimau a Ieova ina ia maua e a latou fanau le tele o mea lelei mai i a latou aʻoaʻoga. O lena le mafuaaga ua latou aʻoaʻoina ai a latou fanau ina ia felagolagomai ma o latou faiaʻoga. Ua faapea ai foi ona talisapaia e mātua Molimau ma a latou fanau pe a feagai ai ē o gafa ma aʻoaʻoga ma i latou i se tulaga malamalama ma le faaaloalo.

O Molimau a Ieova o ni Kerisiano ua lauiloa i le lalolagi aoao. Peitai ane, e iai nisi taimi ua sese ai le malamalamaga e faatatau ia i latou. O lea la, o lo matou faamoemoe o le a fesoasoani lenei polosiua ia te oe ina ia e malamalama lelei ai i tamaiti Molimau o loo e vaaia. A e maise lava matou te faamoemoe o le a e silafia ai le mafuaaga i nisi o tulaga patino e tulai mai, e ono tausisi ai tamaiti Molimau i le aiā tatau e faaesea mai ai.