MAI LE va o le 500 T.A seia oo i le 1500 T.A., sa masani ona tasi le lotu e tapuai ai se atunuu atoa. E talu ai nei lava i le taufaaiuiuga o le lona 19 o senituri, sa lauiloa ai i Europa na o nai lotu tetele nei: le Faa-Katoliko ma le Faa-Porotesano i le itu i sisifo, o le Orthodox ma le Isalama i le itu i sasaʻe, ma le Faa-Iutaia. E aunoa ma se masalomia, o le eseese o lotu, ua taatele i Europa i aso nei ma faapena foi i le lalolagi atoa. Ua i ai ni lotu e lē masani ai ua faamautuina, a lē o le talia e tagata moni o lea lava atunuu po o le faaulufale atu foi e ni tagata aumau ma tagata sulufai.

O lea, i ona po nei, o atunuu e pei o Ausetalia, Peretania, Falani, Siamani, ma le Iunaite Setete o Amerika, o loo iai le toatele o Mosalemi, o Puta, ma Hinitū. I le taimi foi e tasi, o loo auauna faamaoni Molimau a Ieova i atunuu e 239. I atunuu nei e 14, e silia ma le 150,000 Molimau a Ieova o loo auauna ai.​—Tagai i le pusa “ Molimau a Ieova—O se Lotu i le Lalolagi Aoao.”

O le eseesega o faiga tau lotu i se vaipanoa lava ia atonu e faatulai mai ai ni luʻi i ē o gafa ma aʻoaʻoga. O se faaaʻoaʻoga, atonu o le a tulai mai nisi o fesili tāua e tusa ai ma le faamamaluina o aso faamanatu lauiloa: Pe e tatau ea ona faamalosia tamaiti aʻoga uma taitoatasi ina ia faamamaluina​—e tusa lava po o le ā lana lotu? E toatele o le a latou lē tetee atu i le faamamaluina o na aso. A e peitai, pe e lē tatau foi ona amanaia manatu o aiga o loo faia aʻe ai se vaega toaitiiti o lea atunuu? Ma e iai foi se isi vala e ao ona manatu i ai: I atunuu o tuu eseese ai lotu e le tulafono mai le Malo, ma o aʻoaʻoga faalelotu e lē tatau ona faaaofia ai i mataupu a aʻoga, pe ua talafeagai ea la i isi le faamalosia o le faamamaluina o na aso faamanatu i le aʻoga?

E oo foi lava i nisi o faamanatuga e foliga mai e itiiti po o le matuā leai lava o ni sootaga faalelotu, e ono tulai mai ai foi le lē femalamalamaai. Ua moni lenei mea e tusa ai i aso fanau o faamamaluina i le tele o aʻoga. E ui lava e amanaia e Molimau a Ieova le aiā tatau a isi e faamanatu ai aso fanau, a e atonu ua e silafia lelei la latou filifiliga, e lē auai i latou i faamanatuga faapena. A e atonu e te lē o silafiaina mafuaaga ua filifili ai e i latou ma a latou fanau e lē auai i nei faamanatuga.

Ua taʻua e se tusi o faamatalaga auiliili ua taatele lona faasalalauina i Falani o le Le livre des religions (Le Tusi i Lotu), o lenei tu o se mea faaleaganuu ma ua faatulaga faatasi ma “aganuu e lē faalelotu.” E ui ina manatu i ai o se tu e lē faalelotu e lē leaga, a e o faamanatuga o aso fanau, e faapaupau moni lava lona tupuaga.

Ua faapea mai le Encyclopedia Americana (lomiga 1991) e faapea: “Na faamanatuina e malo anamua o Aikupito, Eleni, Roma, ma Peresia aso fanau o atua, tupu, ma alii sili.” Ua faaalia e tusitala o Ralph ma Adelin Linton le mafuaaga o lenei mea. Na la tusia i le la tusi The Lore of Birthdays, e faapea: “O Mesopotamia ma Aikupito, o le tupuga o tupulaga malamalama, na avea foi ma atunuu muamua na faamanatu ma faamamaluina ai e tagata o latou aso fanau. O le tausia o faamaumauga o aso fanau sa tāua tele i aso anamua, a e maise ona o le aso na fanau ai na manaomia i le fafauina aʻe o valovaloga e tusa i le fetu na fanau ai.” O lenei fesootaiga tuusao ma lena faiga o le saili atu i fetu, o se mea e manatu mamafa i ai so o se tasi o lē na te teena le vaavaai atu i fetu mo ni faailoga, ona o le mea ua taʻua e le Tusi Paia e faatatau i ai.​—Isaia 47:13-15.

E lē faateia ai la, lo tatou faitau i le World Book Encyclopedia e faapea: “Sa lei faamanatuina e uluai Kerisiano  Lona aso fanau [le aso fanau o Keriso], ona sa latou manatu o le faamamaluina o le aso fanau o se tasi o se aganuu faapaupau.”​—Tusi 3, itulau 416.

I le matauina o na faamatalaga, ua filifili ai Molimau a Ieova e le auai i fiafiaga o le faamanatuina o aso fanau. E mautinoa lava, o le fanau mai o se pepe o se mea e matagofie ma maua ai le fiafia. O se mea e masani ai ona olioli mātua uma lava a o tutupu aʻe a latou fanau, ma faasolo matutua i le mavae atu o tausaga taitasi. E maua foi e Molimau a Ieova le olioli tele i le faaalia o lo latou alofa i o latou aiga ma uo e ala i le tuuina atu i ai o ni meaalofa, po o le faia o ni tafaoga faatasi. Peitai ane, e tusa ai ma le amataga o le faamanatuina o aso fanau, latou te lē fia faia ai faapea i taimi o aso fanau, a e i isi taimi ese, a o faagasolo le tausaga.​—Luka 15:22-25; Galuega 20:35.

Ua faamanatuina le Kirisimasi i le lalolagi aoao, e oo foi lava i le tele o atunuu e le o ni Kerisiano. Ona ua talia e le tele o lotu a Kerisinetoma lenei aso paia, e foliga ai la o se mea e faateia ai  le filifilia e Molimau a Ieova le lē faamamaluina o lenei faamanatuga. Aisea ua latou faia ai faapea?

E pei ona taʻua manino e le tele o tusi o faamatalaga auiliili, o le aso fanau o Iesu na faavaeina e nisi e aunoa ma ni faamaoniga o Tesema 25 ina ia paʻūū faatasi ma le tausamiga faapaupau a Roma. Mātau tautinoga nei ua aumaia mai nisi o faasino tusi eseese:

“E lē o iloa le aso na fanau mai ai Iesu. Ua lē o faailoa maia e Evagelia le aso po o le masina.”​—New Catholic Encyclopedia, Tusi II, itulau 656.

“O le tele o aganuu o le Kirisimasi o loo faia nei i Europa ma aganuu faamaumauina i taimi ua mavae, e lē o ni aganuu moni faa-Kerisiano, a e o aganuu faanuupo ua taliaina ma faatagaina e le Lotu. . . . O le aso faamanatu na faamamalu ai le atua o Saturn a tagata Roma ua saunia ai le tele o aganuu fiafia i le vaitaimi o le Kirisimasi.”​—Encyclopædia of Religion and Ethics (Edinburgh, 1910), toe teuteuina e James Hastings, Tusi III, itulau e 608-609.

“Ua faamanatuina pea le Kirisimasi ia Tesema 25 i lotu Kerisiano uma talu mai le senituri lona fa. O le taimi lea sa fai ai le tausamiga faapaupau e fesootai atu i le aso aupito puupuu o le tau mālūlū e taʻua o le ‘Fanau mai (faa-Latina, natale) o le La,’ ona e foliga mai ai ua toe fanau le la ona ua uumi taimi o le ao. I Roma, na talia ai e le Lotu lenei aganuu na matuā sili ona lauiloa . . . e ala i le faapipii i ai o se uiga fou.”​—Encyclopædia Universalis, 1968, (faa-Falani) Tusi 19, itulau 1375.

“O le tupu aʻe o le tausamiga o le Kirisimasi na tele foi sona aafiaga pe a faaeseese atu i le tausamiga faapaupau e taʻua o le Sol Invictus (Mithra). I le isi itu, ona o Tesema 25 o le aso aupito puupuu o le tau mālūlū, na faauiga foi i ai e faapea o le aso na pupula mai ai le malamalama i le lalolagi e ala mai ia Keriso, ma o lea ua faaliliu atu ai le faailogaina o le Sol Invictus e fai ma faamanatuga o Keriso.”​—Brockhaus Enzyklopädie, (faa-Siamani) Tusi 20, itulau 125.

Ina ua aʻoaʻoina mea moni e faatatau i le Kirisimasi, ua faapefea ona tali atu i ai isi? Ua matauina e le Encyclopædia Britannica e faapea: “I le 1644, na faasaina ai e se vaega porotesano (puritans) i Egelani e ala mai i le  Palemene, so o se fiafiaga po o se sauniga faalelotu, talu ai [o le Kirisimasi] sa avea o se tausamiga faanuupo, ma sa poloaia ia tausia e ala i le anapogi. Na toe faaolaolaina e Salesa II ia tausamiga o le Kirisimasi, a e na gauai atu pea tagata Sikotilani i le vaaiga a le au Puritan.” Sa lei faamanatuina e uluai Kerisiano le Kirisimasi, e faapena foi ona lē faia e Molimau a Ieova i aso nei po o le faia foi o se vaega i faiga e fesootai atu i le Kirisimasi.

E ui i lea, ua faatagaina e le Tusi Paia le foai atu o ni meaalofa po o le valaaulia o aiga ma uo i se faigaʻai fiafia i isi taimi. Ua faalaeiau atu ai i mātua ina ia toleni a latou fanau ina ia faamaoni lo latou lima mafola atu, na i lo le avatu o ni meaalofa ona ua faatalitalia o le a faia faapea e le lautele. (Mataio 6:2, 3) Ua aʻoaʻoina fanau a Molimau a Ieova ina ia faapalepale ma faaaloalo, ma e aofia ai i lena mea le iloa e i ai aiā a isi e faamanatu ai e i latou le Kirisimasi. I se tulaga tutusa, e faapea foi ona latou talisapaia pe a amanaia la latou filifiliga o le lē auai i le faamanatuina o le Kirisimasi.

E faapea foi le tulaga o Molimau a Ieova i isi aso mālōlō faalelotu, po o aso e iai sina fesootaiga faalelotu e faia i le vaitaimi o le tausaga a o faagasolo aʻoga i atunuu eseese, e pei o le aso faamanatu faalelotu ia Iuni i Pasili, le aso faamanatu o le Epiphany i Falani, le Carnival i Siamani, le Setsubun i Iapani, ma le Halloween i le Iunaite Setete o Amerika. E tusa ai ma na aso faamanatu po o isi lava aso faamanatu e lē o taʻua i inei, o le a fiafia tele mātua Molimau po o a latou fanau e tali i so o sau fesili atonu o iai.