E PEI ona fautua mai e nei upu sii mai le World Book Encyclopedia, o le tasi o sini autū o aʻoga o le toleni lea o tamaiti e tusa ai ma le olaga i aso taitasi, e aofia ai le mafaia ona latou tausia manaoga o se aiga i se taimi i le lumanai. E talitonu Molimau a Ieova o se tiute tauave e paia lenei mea. Ua faapea mai le Tusi Paia lava ia: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8) O tausaga ua faaalu i aʻoga ua saunia ai tamaiti mo tiute tauave o le a latou tauaveina mulimuli ane i le olaga. Ona o lea, ua lagona ai e Molimau le tatau ona matuā faatauaina aʻoaʻoga.

E taumafai Molimau e ola e tusa ai ma le poloaiga a le Tusi Paia e faapea: “O mea uma lava tou te faia, ia faia ma le loto, peiseai ua faia i le Alii, a e le o tagata.” (Kolose 3:23) O lenei mataupu silisili e faatatau i vala uma o le olaga i aso taitasi, e aofia ai ma aʻoga. O lea ua faalaeiau ai e Molimau a latou fanau iti ina ia suesue ma le maelega ma ia manatu mamafa i tofiga ua tuuina atu ia i latou i aʻoga.

Ua aʻoaʻoina foi e le Tusi Paia le usiusitai atu i tulafono a le atunuu o ola aʻe ai se tasi. O lea, afai ua faamalosia le auai i aʻoga seia ausia tausaga maʻoti ua faatulagaina, e usitaia e Molimau a Ieova lenei tulafono.​—Roma 13:1-7.

A o aunoa ma le manatu faatauvaa i le tāua o le toleniina mo le olaga i aso fai soo, ua faaalia foi e le Tusi Paia ua lē na o le pau lea o le faamoemoega ma le sini autū o aʻoaʻoga. E tatau foi i se aʻoaʻoga e taulau manuia ona ati aʻe i tamaiti le olioli i le olaga ma fesoasoani ia i latou ina ia avea ma sui taitoatasi e mautū ma paleni lelei i le sosaiete o tagata. O lea, ua lagona ai e Molimau a Ieova, o isi mataupu e ese mai i lo ia e faia i totonu o vasega, e faatauaina ai tele filifiliga e tatau ona faia i ai. Latou te talitonu o tafaoga e mamā, o musika, o mea e fiafia i ai, o faamalosi tino, o asiasiga i faletusi ma falemataaga, ma isi mea faapena, e iai sona vaega tāua i le mauaina o se aʻoaʻoga e paleni. E faaopoopo atu i ai, latou te aʻoaʻoina a latou fanau ina ia āva i tagata matutua ma vaavaai mo ni avanoa e fesoasoani atu ai ia i latou.

Ona o masini fou faaonaponei, ua lē mapu ai le suia o galuega fou e faigaluega ai. O le iuga, o le toatele o le au talavou o le a faigaluega i nofoaga po o matatā latou te lei mauaina ai lava se avanoa e aʻoaʻoina faapitoa ai. Ona o lea le tulaga, o la latou amio agaʻi i le faia o galuega ma le toleniga totino, a e maise lava lo latou tomai e fetuutuunai atu i suiga, o le a sili atu ona iai se aogā ia i latou. E tusa ai ma lenei mea, e sili ona  lelei le avea o se tagata aʻoga ma faapei o sē e faatagata matua, e pei ona faamatalaina e se tusitala i le vaitaimi o le Renaissance, o Montaigne, e faapea, ‘o se ulu e lelei ona faaaogā na i lo o se ulu e tau ina faatumulia i le poto.’

O le leai o ni galuega ua faapea ona aafia ai atunuu tamaoaiga ma atunuu matitiva, ma ua masani ona faamataʻuina ai tagata talavou e lē lava le agavaa i tulaga tau i galuega. O lea la, afai e manaomia i le tulaga tau i galuega ni toleniga atili na i lo ia o loo faatulaga mai e le tulafono, e tuu atu la i le faitalia a mātua e faatonutonu ai a latou fanau i le faia o se faaiuga e tusa ai ma aʻoaʻoga faaopoopo, e ala lea i le faavasega lelei o aogā e ono maua mai ai, ma mea o le a faataulagaina ona o le faataunuuina o na aʻoaʻoga faaopoopo.

E ui i lea, atonu e te ioe mai e faapea, ina ia taulau manuia i le olaga, e aofia ai nisi mea e sili atu na i lo le manuia i le itu faaletino. I ni taimi e lei mamao atu, o tane ma fafine o ē na matuā pupū atu o latou olaga ia latou galuega, na lē taulau taumafaiga uma i le olaga ina ua aveesea a latou galuega. O isi mātua ua faataulagaina o latou olaga faaleaiga ma le taimi sa ono faaalu ma a latou fanau, ma ua misia ai le avanoa e fesoasoani atu ai ia i latou a o tutupu aʻe e avea ma tagata matutua, talu ai lo latou pupū atu i galuega.

E manino lava la, o se aʻoaʻoga e faatulaga lelei, e tatau ona manatua lelei, e iai nisi mea e sili atu na i lo le manuia faaletino tatou te manaomia ina ia tatou fiafia moni ai. Na fetalai faapea  Iesu Keriso: “Ua tusia, ‘E le na o mea e ʻai e ola ai le tagata, a o afioga uma e tūlei mai i le fofoga o le Atua.’” (Mataio 4:4) I le avea o ni Kerisiano, e talisapaia ai e Molimau a Ieova le tāua o le faatupuina aʻe o amioga mamā ma uiga faaleagaga, e faapena foi i le itu o le sauniunia o i latou mo le tausia o o latou manaoga faaletino.