NA LOMIA e le U.S. National Institute of Mental Health le iuga o se suesuega sa faia i mātua o ē na manatu i ai na taulau manuia a latou taumafaiga—o mātua na avea uma a latou fanau ua silia i le 21 tausaga le matutua, o ni “tagata ua matutua, e faia mea aogā ma mautinoa le manuia o le fetuunai atu i lo tatou sosaiete.” Na fesiligia nei mātua e faapea: ‘E faavae i mea na oo  totino ia te oe lava, o le ā le fautuaga e sili ona lelei e mafai ona e tuuina atu i isi mātua?’ O tali nei e tele ina aumaia: ‘Ia tele lou alofa i lau fanau,’ ‘aoaia ina ia atinaʻe ai,’ ‘faaalu le taimi ma i latou,’ ‘ia aʻoaʻo lau fanau ia iloa le lelei ma le leaga’ ‘ia atiina aʻe le feavatai,’ ‘faalogologo moni atu ia i latou,’ ‘ofo atu taiala nai lo le lauga atu i ai,’ ma ‘ia iai i se vaaiga saʻo.’

A e peitai, e lē na o mātua o galulue e tausi aʻe tamaiti ina ia avea o ni talavou matutua e lelei ma iloa fetuutuunai. O ē o gafa ma aʻoaʻoga, e tāua foi la latou vaega i lenei mea. O se faatonu tau aʻoga e tele lona poto masani na ia mātauina e faapea: “O le faamoemoega autū o aʻoaʻoga i aʻoga, o le lagolago atu lea i mātua i le atiina aʻe o ni talavou matutua o ē ua lelei le tuputupu aʻe i le tulaga faalemafaufau, i le tino, ma faalogona.”

O lea o mātua ma ē o gafa ma aʻoaʻoga e tasi lo latou sini—ina ia fuaina mai ni talavou o ē o le a mulimuli ane avea  ma ni tagata matutua e taumatuaina ma paleni ma fiafia i le olaga, ma e mafai ona latou iloa lo latou tulaga i le sosaiete o tagata o latou mau faatasi ai.

Peitai, e tulai mai faafitauli pe a lē taulau i mātua ona soosoo tauau ma ē o gafa ma aʻoaʻoga. O se faaaʻoaʻoga, o nisi mātua e matuā lē ano lava i aʻoaʻoga a a latou fanau; o isi mātua ua taumafai e faatavā i faiaoga. I le talanoaina o lenei tulaga, ua faapea mai ai se nusipepa Falani: “Ua lē toe avea na o le faiaoga e kapetenia le vaa. Ua matuā pupū tele mātua i le manuia o a latou fanau, ma iloilo maeaea ʻapi aʻoga, faamasino ma faitio i auala e aʻoaʻo ai, ma fulufulu lele i le taimi muamua lava e leaga ai togi a a latou fanau.” O amioga faapena e mafai ona aiā valea ai i le tofi a le faiaoga.

E lagona e Molimau a Ieova e faapea, o le a sili ona lelei le aʻoaʻoina o a latou fanau pe a soosoo tauau mātua ma ē o gafa ma aʻoaʻoga, e ala i le faaalia o se naunau moni, ma le loto fesoasoani i aʻoaʻoga a a latou fanau. Ua latou talitonu e faapea, o lea soosoo tauau, e matuā tāua tele ona ua faateteleina le faigata o lau galuega o se faiaoga.

Ona e atagia mai i faiga tau aʻoaʻoga le ituaiga sosaiete o tagata o iai, ua lē sao ai la aʻoga mai faafitauli lautele. Ua saosaoa le faateteleina o faafitauli i le vafealoai o tagata lautele a o faagasolo tausaga. I le faamatalaina o tulaga o mea i se tasi aʻoga i le Iunaite Setete o Amerika, na lipotia mai ai e le New York Times e faapea: “E momoe tamaiti i le vasega, latou te faamataʻu atu i isi i vaega o savavali ai ua tumu i faaupuga ua tusia ai, latou te aamu i tamaiti lelei o le aʻoga. . . . E toetoe lava o tamaiti aʻoga uma o onosaia faafitauli e pei o le tausia o pepe, mātua ua faafalepuipuiina ma le faasaoina mai sauaga a  kegi. I so o se aso patino lava, e toetoe lava o le tasi vaelima o tamaiti o le aʻoga e lē o aʻooga.”

Ua sili ona faapopoleina i le faatuputeleina o faafitauli o faiga sauā i aʻoga i le tele o atunuu. O fusuaga ma tautuleiga sa seāseā tupu, ua suia nei i taugā fana ma taugā naifi o loo tutupu pea. Ua taatele le vaaia o auupega, ua sili ona matuia fetauiga, ma ua vave tele ona liliu atu tamaiti i faiga sauā a o laiti o latou tausaga.

E mautinoa e lē o atunuu uma o fesagai ma tulaga matuia faapena. E ui i lea, o le toatele o ē o gafa ma aʻoaʻoga o loo fesagai ma le tulaga e pei ona taʻua e le nusipepa faalevaiaso a Falani, o Le Point e faapea: “Ua lē o toe iai se faaaloalo mo faiaoga; ua lē o ia te ia le pule.”

O sea lē faaaloalo mo le pule ua tulai mai ai se faamatauga i tamaiti uma lava. O lea, e taumafai ai Molimau a Ieova ina ia totōina i a latou fanau le usiusitai ma le faaaloalo i le pule, o uiga e lē o masani ona maua i le olaga aʻoga i aso nei.