O ULUAI Kerisiano, sa iloga lo latou loto tetele. A o feagai ai ma sauaga matuitui i uluai senituri e tolu, o le toatele o i latou na fasiotia e tagata Roma faapaupau, ona o le lē tapuai atu i le emeperoa. I nisi o taimi sa faatū ai se fata mo  le tapuaiga i se malae mataaga. Ina ia faasaolotoina i latou, e pau lava le mea sa manaomia ona fai, o le faamuina lea e se Kerisiano o sina mea manogi e aloaia ai le tulaga tau atua o le emeperoa. A e peitai, e toaitiiti na malolo atu i ai. O le toatele sa sili ia i latou le oti na i lo le lafoaia o lo latou faatuatuaga.

I ona po nei, ua faapea foi ona uia e Molimau a Ieova se tulaga tutusa e faatatau i le solitu faapolotiki. Mo se faaaʻoaʻoga, o le tutū mausali ma le faamaoni e ui i sauaga a Nasi, ua mafai ona faamautinoa mai i talafaasolopito faamaumauina. A o lei oo i le taua lona lua o le lalolagi ma a o faagasolo foi, e tusa ma le tasi vaefa o Molimau a Ieova i Siamani na maliliu ai, o le tele lava i nofoaga i falepuipui ona sa latou solitu ma teena le fai atu “Heil Hitler” (Vivii ia Hitila). Na vavaeesea faamalosi fanau laiti mai i o latou mātua Molimau. E ui i omiga, na tutumau ma le mausali le au talavou ma teena le faaleagaina i aʻoaʻoga e lē faale-Tusi Paia na taumafai isi e faaoo faamalosi atu ia i latou.

I tulaga lautele, e lē o avea Molimau a Ieova ma tumutumuga o sauaga matuitui i aso nei. E ui i lea, e tulai mai ni lē femalamalamaai ona o se filifiliga o le loto fuatia ifo a se Molimau talavou e lē auai i sauniga faalotonuu, e pei o le faʻalo i le fuʻa.

Ua aʻoaʻoina tamaiti a Molimau a Ieova ina ia aua nei faalotovaivai atu fua i isi mai le faalo i le fuʻa; o le filifiliga patino lena a le tagata lava ia. Peitai ane, ua mausali le tulaga o Molimau: Latou te lē faalo i le fuʻa a so o se atunuu. E mautinoa e lē o fuafuaina  lenei mea ina ia faaalia ai se lē faaaloalo. Latou te faaalia le faaaloalo i le fuʻa a so o se atunuu o latou nonofo ai, ma faaalia lea faaaloalo i le usiusitai i tulafono a le atunuu. Latou te lē auai i so o se faiga e faasagatau atu i le malo. O le mea moni, e talitonu Molimau, o malo o iai nei o se “sauniga a le Atua,” ua ia faatagaina ia iai. O lea e manatu ai i latou, o loo i lalo o se faatonuga tauatua ina ia totogi atu lafoga ma usiusitai i na “faipule silisili.” (Roma 13:1-7) Ua talafeagai lenei mea ma le fetalaiga lauiloa a Keriso e faapea: “O mea a Kaisara, ia outou avatu ia Kaisara; a o mea a le Atua ia avatu ia i le Atua.”​—Mataio 22:21

Atonu e fesili mai nisi, ‘A e, aisea ua lē faaaloalo ai Molimau a Ieova i le fuʻa i le lē faalo i ai?’ Talu ai latou te manatu i le faalo i le fuʻa o se gaoioiga tau tapuaiga, ma o le tapuaiga o le mea lena e a le Atua lea; e lē mafai ona latou tuuina atu ma le loto i ai le tapuaiga i so o se tasi pe i so o se mea, vaganā ai le Atua. (Mataio 4:10; Galuega 5:29) O lea, latou te talisapaia ai pe a amanaia e ē o gafa ma aʻoaʻoga lena talitonuga ma faataga fanau a Molimau e tausisia lo latou faatuatuaga.

E lē o se mea e faateia ai la, e lē na o Molimau a Ieova e talitonu faapea o le faalo i le fuʻa, e fesootai atu lea i faiga tau tapuaiga, e pei ona faaalia mai i faamatalaga nei:

“O fuʻa i le taimi muamua, e toetoe lava a faaletapuaiga uma ōna tu. . . . O le fesoasoani a lotu ua foliga mai ai ua sailia pea lava e faapaia le fuʻa faaleatunuu.” (O upu faasisipa o a matou ia.)​—Encyclopædia Britannica.

“O le fuʻa, e paia e pei o le koluse. . . . E malolosi upu o tulafono ma tuutuuga e fesootai atu i vaaiga a tagata e faatatau i faailoga faaleatunuu, e pei o le, ‘Tautua i le Fuʻa,’ . . . ‘Migao mo le Fuʻa,’ ‘Tuutoina i le Fuʻa.’” (O upu faasisipa o a matou ia.)​—The Encyclopedia Americana.

“Sa teena e Kerisiano le . . . faia o ni taulaga i le tulaga tauatua o le emeperoa [Roma]​—e toeitiiti lava a tutusa i aso nei ma le teena o le faalo atu i le fuʻa po o le taʻua o le tautoga o le faamaoni atu i le atunuu.”​—Those About to Die (1958), e Daniel P. Mannix, itulau 135.

I le toe taʻua o le manatu e pei ona taʻua muamua, e lē o faatupuina e Molimau a Ieova se lē faaaloalo mo so o se malo po o ona taʻitaʻi i le teena lea o le faalo i le fuʻa. Pau lava o lea, latou te le ifo pe faalo, o se gaoioiga lea faaletapuaiga, i se faatusa ua suia le Setete. Latou te manatu i ai e tutusa ma le tulaga na uia e taulelea Eperu e toatolu, o ē na mumusu e ifo i le tupua na faatuina e le tupu Papelonia o Nepukanesa i le laugatasi o Turu, i le vaitaimi o le Tusi  Paia. (Tanielu, mataupu 3) O lea la, e ui ina faʻalo ma taʻua e isi le tautinoga o le faamaoni i le atunuu, ua aʻoaʻoina fanau a Molimau a Ieova ina ia mulimuli i o latou loto fuatia ifo ua aʻoaʻoina e le Tusi Paia. O lea, ma le toafilemu ma le faaaloalo, latou te lē auai i na faiga. O mafuaaga tali tutusa ia e filifili ai fanau a Molimau e lē auai i le usuina po o le taina o le vii o le fuʻa.

I aso nei, o le tele o atunuu ua latou amanaiaina le aiā a mātua e faaoo atu ai i a latou fanau aʻoaʻoga faalelotu e talafeagai ma a latou talitonuga. E lagolagoina e lotu uma lenei aiā, e pei ona faataitaia mai e le tulafono e pulea ai le lotu o loo tausisia pea e le Lotu Katoliko: “Ua iai i mātua le tiute tauave tāua i le aʻoaʻoina o fanau auā na latou avatua le ola ia i latou, ma e ia i latou le aiā e faia ai faapea; o le pogai lea ua tatau ai ona avea mātua ma faavae autū mo le saunia o se aʻoaʻoga faa-Kerisiano mo a latou fanau e tusa ai ma talitonuga faale-Lotu.”​—Canon 226.

E na o le pau foi lea o le mea o faatalosagaina e Molimau a Ieova, o le aiā e aʻoaʻoina ai faa-Kerisiano a latou fanau. Ona o ni mātua e manatu tele i a latou fanau, latou te taumafai ai e totōina i totonu o a latou fanau mataupu silisili moni aogā moni faa-Kerisiano, ma faatupuina ia i latou le alofa atu i tuaoi ma le faaaloalo i mea totino a isi. Latou te faanaunau ina ia mulimuli i le fautuaga na faapea ona tuuina atu e le aposetolo o Paulo i Kerisiano i Efeso: “O outou mātua, aua le feagai ai ma a outou fanau i se auala e faaita ai ia i latou. Nai lo le faia o lena, ia tausi aʻe i latou i aoaiga ma faatonuga faa-Kerisiano.”​—Efeso 6:4, Today’s English Version.

I nisi o aiga, e toatasi ai le matua e Molimau a Ieova. I tulaga faapea, ua faalaeiau ai i le matua e Molimau ina ia amanaia aiā o le matua e lē o se Molimau  e faatonuina ai le tamaitiiti e tusa ai ma lona foi talitonuga faalelotu. O tamaiti e tatala atu i manatu eseese faalelotu e seāseā oo i ai po o le lē oo foi i ai o ni āuga leaga. * O faiga masani, o tamaiti uma lava o le a filifili i latou po o le fea le lotu latou te mulimuli atu i ai. O le mea e masani ona tupu, e le o talavou uma lava o le a latou filifili e mulimuli atu i mataupu silisili faalelotu a o latou mātua, e tusa lava po o ni Molimau a Ieova pe e leai.

E tatau foi ona e iloa, e faatauaina tele e Molimau a Ieova le loto fuatia ifo o Kerisiano taitoatasi. (Roma mataupu 14) O le Ioega i Aiā a le Tamaitiiti, na faavaeina e le Fonotaga Faalauaitele a Malo Aufaatasi i le 1989, na aloaia ai le aiā a se tamaitiiti, o saolotoga i manatu, loto fuatia ifo ma le tapuaiga, ma le aiā e faamatala saoloto ai ona lava taofi ma ia aloaia lena taofi i so o se tulaga po o se faiga e aafia ai le tamaitiiti.

E lē tutusa pau ni tamaiti se toalua. O lea, e te ono faatalitalia ai se eseesega i faaiuga e faapea ona faia e Molimau talavou po o isi tamaiti aʻoga pe a oo i nisi o faiga patino ma tofiga i le aʻoga. Matou te talitonu o le a faapea foi ona e amanaia le mataupu silisili o le saolotoga e faaaogā ai le loto fuatia ifo.