TALU AI le faatauaina ua latou tuu atu i la latou galuega tau le aʻoaʻoga faale-Tusi Paia, atonu ua manatu ai nisi e faapea e le fiafia i latou i aʻoaʻoga faalelalolagi. Peitai, e le o le tulaga moni lena. Ina ia aʻoaʻo atu i isi, e tatau ona muai aʻoaʻoina se faiaoga, ma e manaomia ai i lena mea toleniga ma faatonuga tatau. O lea la, e faaopoopo atu i le faaaogā tatauina o aʻoga faalelalolagi, ua faapena foi ona mauaina i le tele o tausaga  e Molimau a Ieova aogā mai i polokalama eseese ma aʻoga ua faia e ala mai i le Watch Tower Society. Ua fesoasoani na mea i Molimau ma isi ina ia faaleleia ai o latou mafaufau, o amio, ma le itu faaleagaga.

Mo se faaaʻoaʻoga, i le tele o atunuu, ua fesagai ai Molimau ma se luitau faapitoa—le faapefea lea ona aʻoaʻo tagata o ē na itiiti avanoa po o le matuā leai o se avanoa na maua ai ni aʻoaʻoga talafeagai, ma ua māfua ai ona lē iloa faitau ma tusitusi. Ina ia faafetaiaia nei manaoga, ua faamaopoopoina ai e le Watch Tower Society polokalama auā le aʻoaʻoina o tagata ina ia iloa faitau ma tusitusi.

Mo se faataʻitaʻiga, i Nigeria, ua faia ai e Molimau a Ieova vasega e aʻoaʻoina ai le tusitusi ma le faitau talu mai le 1949. O le iʻuga, ua faitau sefulu afe tagata Nigeria ua iloa faitau. Na faaalia i se suʻesuʻega, e silia i le 90 pasene Molimau a Ieova i Nigeria ua iloa faitau ma tusitusi. Ae pe a faatusatusa atu i le faitau aofaʻi atoa o tagata e nonofo ai i lea atunuu, e itiiti ifo i le 50 pasene tagata e iloa faitau ma tusitusi. I Mekisikō, na faia ai e Molimau a Ieova vasega e aʻoaʻo ai le faitau ma le tusitusi talu mai le 1946. I totonu o le tausaga e tasi, e silia ma le 6,500 tagata na aʻoaʻoina. E silia ma le 100,000 i latou na mafai ona fesoasoani i ai ia iloa faitau ma tusitusi. A o faagasolo tausaga, na faatulaga foʻi vasega e aʻoaʻoina ai le faitau ma le tusitusi i atunuu e pei o Polivia, Cameroon, Nepale ma Zambia. Ua saunia e Molimau a Ieova le silia i le 7,000,000 kopi o le tusi Apply Yourself to Reading and Writing i le silia ma le 100 gagana.

O polokalama faapena e aʻoaʻo ai le faitau ma le tusitusi, ua masani ona talia aloaia e ē mautofiga i aʻoaʻoga, i atunuu o faatinoina ai. Mo se faaaʻoaʻoga, i Mekisikō, na tusi ai se tagata faigaluega mo le lautele e faapea: “Ou te matuā faafetaia la outou lagolagosua, ma e fai ai aʻu ma sui o le malo o le setete e molioo atu ai ia te outou la latou faafetai faamaoni i la outou galuega agaigai i luma faatamalii, auā le lelei o tagata i le faaoo atu lea i ai o le faasusuluina o le poto i ē lē iloa faitau ma tusitusi. . . . O oʻu moomooga ia manuia la outou galuega tau le aʻoaʻoga.”

Talu ai e matuā faatāua e Molimau a Ieova le aʻoaʻo atu o le Tusi Paia i le lalolagi aoao, ua latou taumafai ai e faaleleia lo latou tomai e faamatala atu ai aʻoaʻoga a le Tusi Paia i isi. O se faataʻitaʻiga, ua maua e tagata aæoga taʻitoʻatasi i le silia ma le 119,000 faapotopotoga i le lalolagi aoao, toleniga i le auala e faaleleia ai le faitau ma le tautala i le lautele. E oo foi lava i ē e laiti, e mafai ona tusia o latou igoa i lea aʻoga ia maua lea toleniga i le taimi lava e amata ai ona latou iloa faitau, ma mulimuli ane e aogā tele mo i latou i nisi o vala, e aofia ai a latou aʻoaʻoga e lē faalelotu. E toatele ē o gafa ma tulaga tau aʻoaʻoga ua latou faamautinoa mai e faapea, e lelei le faamalamalamaina atu o mea o i manatu o tamaiti aʻoga a Molimau.

E faaopoopo atu i ai, ua faalaeiauina faapotopotoga taitasi o Molimau a  Ieova ina ia iai se fatatusi o iai ni lomiga e fesoasoani i le suesueina o le Tusi Paia, se lomifefiloi, ma isi faasino tusi, i la latou lava Maota o le Malo, po o le nofoaga mo faatasitasiga. O lenei fatatusi ua avanoa mo tagata uma o faatasi atu i sauniga i le Maota o le Malo. Ua faalaeiauina ma le mafana le faitau tusi i a latou faapotopotoga, ma ua faapea foi ona faamalosiau atu i aiga taitasi ina ia iai se fatatusi i le aiga o iai ni lomiga eseese se tele e faamalieina ai manaoga o tamaiti ma ē foi ua matutua.

Ua faia foi e le Watch Tower Society isi aʻoga mo le toleniina o misionare  tane ma tamaitai, e faapena foi ma aʻoga e aʻoaʻoina ai tane o iai tiute tau i le faiva i faapotopotoga. O nei aʻoga o faamaoniga faaopoopo ia e iloa ai e faatauaina tele aʻoaʻoga e Molimau a Ieova.