O SE TALANOAGA maeaea o talitonuga faalelotu o Molimau a Ieova e lē o le fuafuaga lea o lenei polosiua. Nai lo lea, ua matou taumafai ina ia faamatala atu nisi o mataupu silisili e talitonu i ai Molimau ma faaali manino atu le ituaiga o taaʻiga faaleaiga o faapea ona aafia ai lau tamaitiiti aʻoga pe afai o se tasi o ona mātua po o ona mātua uma o ni Molimau.

E faatāua tele e Molimau le tuputupu aʻe faaleagaga o a latou fanau. Ma latou te lagona ma le mautinoa e mafai e lenei mea ona faaleleia ai le tuputupu aʻe o a latou fanau i isi o vala. O talitonuga o latou tausisia ma mataupu silisili o latou mulimuli i ai ua avatu ai i o latou olaga le uigā ma ua fesoasoani ia i latou ina ia faafetaiaia o latou faafitauli i aso taitasi. E faaopoopo atu i ai, o na talitonuga ma mataupu silisili e tatau ona uunaia ai i latou ina ia avea o ni tamaiti aʻoga e sogasoga ma tagatanuu lelei i o latou olaga atoa.

E taumafai Molimau ia ola e tusa ma tulaga moni o le olaga, o lea latou te faatauaina ai tele aʻoaʻoga. O lo latou moomooga la, e fia galulue soosoo tauʻau ma oe i le tele latou te mafaia ai. I o latou aiga ma nofoaga o tapuaiga i le lalolagi atoa, o le a faaauau ai ona faia e Molimau la latou vaega i le faalaeiauina o a latou fanau e faataunuuina la latou vaega i lenei galuega aogā fai faatasi.