Lesona 9

E Tatau Ona Mamā Auauna a le Atua

Aisea e tatau ai ona tatou mamā i so o se itu? (1)

O le ā le uiga ia mamā faaleagaga? (2) mamā tau amio? (3) mamā le mafaufau? (4) mamā faaletino? (5)

O ā ituaiga tautalaga lē mamā e ao ona tatou alofia? (6)

1. O Ieova o le Atua e mamā ma paia. E faatalitalia e ia ona tagata tapuai ina ia tumau i le mamā​—faaleagaga, tau amio, i le mafaufau, ma le faaletino. (1 Peteru 1:16) E faaalu ai se taumafaiga tele ina ia faatumauina le mamā i le silafaga a le Atua. O loo tatou ola i se lalolagi lē mamā. O loo tatou tauivi foi faasaga i o tatou lava tuinanauga ia faia le leaga. Ae e lē tatau ona tatou faavaivai ai.

2. Mamā Faaleagaga: Pe afai tatou te mananao e auauna ia Ieova, e lē mafai ona faaauau ona tatou usiusitai atu i so o se aʻoaʻoga po o tū a lotu sese. E tatau ona tatou ō ese mai lotu sese ma lē toe lagolago atu i ai i so o se itu. (2 Korinito 6:14-18; Faaaliga 18:4) O le taimi lava tatou te aʻoaʻoina ai le upu moni e uiga i le Atua, e tatau ona tatou matuā faaeteete ia aua neʻi faaseseina i tatou e tagata o ē e aʻoaʻoina mea sese.​—2 Ioane 10, 11.

3. Mamā Tau Amio: E finagalo Ieova i ē e tapuai atu ia te Ia ina ia amioaʻi o ni Kerisiano moni i taimi uma lava. (1 Peteru 2:12) E  silafia mai e Ia mea uma tatou te faia e tusa foi lava pe faalilolilo. (Eperu 4:13) E tatau ona tatou alofia amioga lē mamā faaleituaiga ma isi faiga lē mamā o lenei lalolagi.​—1 Korinito 6:9-11.

4. Mamā le Mafaufau: Pe afai tatou te faatumuina o tatou mafaufau i manatu mamā ma manatu lelei, o le a faapea foi la ona mamā a tatou amio. (Filipi 4:8) Ae afai tatou te mafaufau tele i mea e lē mamā, o le a iu ai i le faia o amioga leaga. (Mataio 15:18-20) E tatau ona tatou alofia faafiafiaga e mafai ona faaleagaina ai o tatou mafaufau. E mafai ona faatumulia o tatou mafaufau i manatu mamā e ala i le suesueina o le Afioga a le Atua.

5. Mamā Faaletino: Talu ai ona o i latou o sui o le Atua, e tatau ai i Kerisiano ona tausia o latou tino ma lavalava ia mamā. E tatau ona fufulu o tatou lima pe a uma ona faaaogā le faleese, ma e tatau foi ona fufuluina lima a o lei faia le taumafataga po o le tauaaoina foi o meaʻai. Pe afai e leai ni faleese e faaaogā, e ao ona tanumia otaota o tagata. (Teuteronome 23:12, 13) O le tausia o le mamā faaletino e aogā lea mo le soifua mālōlōina lelei. E tatau ona manaia ma mamā fafo ma totonu o le fale o se Kerisiano. E tatau ona matuā iloga lona lelei e avea o se faataʻitaʻiga lelei i totonu o le nuu.

6. Mamā le Tautala: E tatau i auauna a le Atua ona tautala faamaoni i taimi uma lava. O ē tala pepelo e lē ulu atu i latou i le Malo o le Atua. (Efeso 4:25; Faaaliga 21:8) E lē faaaogaina e Kerisiano ni upu leaga. Latou te lē faalogologo atu pe faamatalaina ni tala tausua e leaga po o ni tala foi e lē mamā. Ona o le mamā o mea latou te tautatala ai, ua matuā ese ai lava i latou i a latou galuega po o aʻoga ma i tuaoi.​—Efeso 4:29, 31; 5:3.

[Ata i le itulau 18, 19]

E tatau i auauna a le Atua ona mamā i vala uma lava